Retomadas as actividades divulgativas nos colexios de A Coruña

Unha vez finalizadas as vacacións de Nadal, retomáronse as actividades divulgativas das ARPSI do grupo IV nos centros escolares galegos. Durante o pasado mes de xaneiro, visitáronse oito centros da provincia da Coruña: CEIP Vos Casais (Fene), CEIP Arteixo (Arteixo), CEIP Ponte dos Brozos (Arteixo), CEIP Plurilingüe Isidro Parga Pondal (Oleiros), CEIP Ría do Burgo (Culleredo), CEIP Manuel Murguía (A Coruña), CEIP Sal Lence (A Coruña) e CEIP Lamas de Abade (Santiago).

Trátase dunha iniciativa enmarcada no Plan Estratéxico de Divulgación das ARPSI de Augas de Galicia, que consiste no desenvolvemento de actividades divulgativas en centros educativos para axudar a comprender aos estudantes de primaria como funciona a natureza e especialmente os ríos. Nas xornadas, que teñen unha duración de aproximadamente unha hora, abórdase o estudo dos cursos fluviais de maneira amable e divertida, un tema científico traducido a unha linguaxe fácil de entender para os máis pequenos da casa.