O IESP de Ames investiga sobre a historia do presente

Coa pandemia de covid-19 tivemos que suspender o proxecto de historia oral que comezaramos a realizar ao abeiro deste proxecto de Educación Patrimonial no que entrevistabamos á xeración dos avós e avoas e bisavós e bisavoas; pero con ela xurdiron tamén novas oportunidades, como a liña de Historia do presente que puxeron en marcha durante o terceiro trimestre os alumnos e alumnas de 4º de ESO da materia de Xeografía e Historia, na que as persoas entrevistadas foron os pais e nais cos que os alumnos compartían confinamento, testemuños da historia de Ames nos últimos 40 anos no marco da historia global.

Os temas que máis atraeron a atención do alumnado para investigar cos seus pais e nais foron: O desastre do Prestige, o narcotráfico, ETA e o terrorismo, a movida dos 80, o efecto 2000, a crise económica de 2008, o comezo da TVG, os atentados do 11S en Nova York e os atentados do 11M en Madrid. Nas fotografías de abaixo seguro que recoñecedes algún destes temas.

Como sempre, podedes ver os resultados da investigación no museo virtual KaleidoScapes

Dentro desta investigación na Historia do presente, parte dos alumnos e alumnas optaron por converterse eles mesmos en testemuñas directas da historia de Ames a través da súas vivencias durante a actual pandemia de covid-19, na actividade que titulamos Historias do confinamento.