O sábado, 18 de abril, gozamos na biblioteca do CSC As Fontiñas da representación da historia de Quebranoces representada polos monicreques da compañía “Musicreques”. Despois de escoitar o fermoso poema de Marwa Al Aqroubi feito para conmemorar o día do libro infantil e xuvenil deste ano, os monicreques contáronnos as historias do protagonista polo mundo adiante acompañados da música de Tchaicovsky interpretada en directo ó piano.

A actividade é bonita e vistosa, pero un pouco lenta para os nenos máis pequenos.

Os cativos divertíronse escoitando as emocionantes aventuras deste curioso pirata narradas polo grupo teatral “Polo Correo do Vento” e reparando nas simpáticas ilustracións que lles ían amosando, e ó final eles mesmos debuxaron  un pirata segundo as sinxelas explicacións que lles ían dando.

O día 27 de marzo David Gundín (GUN) entretivo ós cativos cun contacontos que buscaba achegarlles algunhas das obras máis coñecidas de Shakespeare, “Romeo e Xulieta” e “o Rei Lear”, dun xeito divertido e procurando en todo momento contar coa colaboración dos pequenos que o pasaron en grande convertidos nalgúns dos máis embleméticos personaxes do célebre autor inglés.

 Os nenos participantes,  a través da colaboración en equipo, puxeron en práctica as súas capacidades artísticas practicando con moitos dos aspectos que son necesarios traballar nunha representación teatral: elaboración dun guión, creación do escenario, traballo das personaxes e a súa interpretación.  O  toque final puxérono a iluminación e a banda sonora. O resultado foi un animado teatro de sombras.

O último día da actividade acudiron os familiares dos pequenos artistas a ver a representación.

Na Biblioteca dos Centros Socioculturais de Santiago programouse para o mes das letras un obradoiro onde as nais e pais tiveron a oportunidade de gravar para os seus fillos contos coa súa propia voz. O traballo realizouse en catro sesións progresivas. Utilizáronse contos clásicos como: “A toupiña que quería saber quen lle fixera aquilo na cabeza”, “Tres desexos”, etc.  Púxoselles voz ós personaxes dos contos e graváronse. Paralelamente os nenos fixeron na aula de xogo as carátulas dos CDs

Os contos resultaron interesantes en canto que supoñen unha “renovación” dos contos tradicionais, xa que modificaron e engadiron novos argumentos e personaxes,  ata facelos completamente descoñecidos, o que lles permitiu rachar cos esteriotipos e introducir novos valores, ausentes nos contos tradicionais, especialmente no relativo a outorgarlle maior protagonismo ás mulleres.