Onte recibimos a visita do mago, Dani García na Biblioteca de Vilalonga. O mago realizou trucos de maxia, mentalismo, desaparición de obxectos; en todos eles fixo participes aos nenos, e aos seus papás, os cales saíron ao escenario como axudantes. Foi un espectáculo moi dinámico, no que o humor foi o fío condutor a través da comunicación do mago cos nenos, onde recorría aos chistes e bromas durante toda a sesión. Finalizou cun número de ilusionismo que provocou a alegría de todos os asistentes. Ao final da sesión, os nenos mostraron interese por libros sobre ilusionismo, ciencia e misterio.

Obradoiro moi completo no que Iria, de Xogando nas nubes, explica moi ben o que é un libro pop-up e como se fan os mecanismos para facer que as imaxes cobren vida e movemento. Os participantes estiveron moi entretidos creando o seu propio libriño cunha carpetiña de cartolina na que van engadindo as páxinas que van creando cos elementos pop-up. Na primeira hora do obradoiro todos os participantes elaboraron unha cara na que tiveron que recortar, pintar e decorar ao gusto para despois unir e pegar todos os elementos. Na segunda hora algúns fixeron unha bolboreta e outros unha colmea de abellas. Finalmente, pegaron as dúas páxinas e deixaron espazo para seguir creando na casa. O libriño quedou fabuloso e a rapazada moi contenta.

Catuxa estivo nas Pontes contando ao público miúdo un dos seus contos favoritos, A Cebra Camila. Como estaba un día estupendo fixemos a actividade diante da Biblioteca, no parque. Foi unha tarde moi divertida.

O pasado venres na Biblioteca de Sober os nenos e as nenas de Merendas con Contos recibiron a visita de Inma Soto e coñeceron a súa historia “Xela, aventura na fraga”.

 Este ano na biblioteca de Foz celebramos o día das Letras Galegas con A Xanela do Maxín, que a través do seu espectáculo “A gran viaxe das Letras Galegas” achegounos un pouco máis ás distintas figuras da literatura galega, dende Rosalía de Castro ata Begoña Caamaño. Unha viaxe a través do tempo para coñecer a lingua e a cultura galega. Unha actividade didáctica e moi participativa na que a rapazada se transforma en protagonista.

Onte, 1 de xuño de 2026,  disfrutamos na Axencia de Lectura Municipal de Meaño de contos piratas para buscar un tesouro,   a través de cancións, teatro,  e coa axuda de monicreques que ían contando as historias para chegar ata o tesouro. Este espectáculo estivo a cargo  Os Carballiños, no que os asistentes puderon participar activamente

A contadora Sole Felloza estivo, o venres 29 de maio,  na Axencia de Lectura de Tirán para presentarnos o seu espectáculo de narración oral Seres Máxicos do Reino de Galicia. Trasnos, meigas, xacias e outros seres regresaron a Moaña para que a cativada coñeza o noso propio imaxinario.

“Minguante canta poesía galega” é un proxecto musical en formato dúo que fusiona a literatura e a música para dar vida a poemas clásicos e contemporáneos da cultura galega.

E unha actividade moi animada e entretida; ao público gustoulle moito.                           

Nenas e nenos de Sada descubriron a pasada semana que a arte e as ciencias non están rifadas, e que as ciencias poden ser divertidas.

Así llo demostrou Paula Regueiro, de Trémola Teatro, nun obradoiro de Luz Negra, onde fixeron debuxos con pinturas fluorescentes que despois viron brillar baixo a luz negra.