Esta semana foi a WWDC, nome co que se coñece á reunión de desenvolvedores para sistemas Apple que se celebra todos os anos alén do charco. Aínda que é un evento dedicado a creadores de software, historicamente Apple realiza unha presentación onde acaba ensinando novidades, tanto de software como de novos produtos que vai lanzar ao mercado.
Un dos novos produtos que sorprendeu a moitos foi o HomePod, un novo dispositivo que quere tomar as rendas do ambiente da nosa casa e competir como asistente en casa contra Google e Alexa.
Que é un HomePod? Pois un altofalante intelixente con forma cilíndrica que presume de ser o mellor emisor de música que podamos ter na nosa casa. Segundo Apple, HomePod é capaz de analizar o espazo ao seu ao redor e adaptar a emisión da música para que se escoite en todos os recunchos da habitación. Ao parecer, faino a través de sons que detectan os obxectos e ata as persoas que ten ao seuao redor.
Por se esta pequena marabilla non fose pouco, a parte intelixente está en que HomePod terá Siri, a asistente persoal de Apple que está nos seus teléfonos e tablets, incorporada. Así, grazas a sete micrófonos HomePod será capaz de escoitarnos e responder a preguntas diversas sobre o tempo ou información variada, así como crear eventos no noso calendario ou chamar a alguén a través do teléfono vinculado.
HomePod acaba de ser presentado e, se vos gustou, temos malas noticias: non o veremos en España ata o 2018, xa que sairá a final de ano só en países anglosaxóns (Estados Unidos, Reino Unido e Australia). Farao a un prezo de 349 dólares que, sabendo a política de Apple, acabarán converténdose en 349€ cando chegue a Europa