A finais de outubro a Xunta galardoaba 5 proxectos empresariais deseñados por alumnos e alumnas de Formación Profesional, no marco de ‘Eduemprende Idea 2015’, iniciativa das consellerías de Cultura, Educación e Ordenación Universitaria e de Economía, Emprego e Industria, para fomentar o espírito emprendedor entre os estudantes galegos.
Premiouse a creatividade e a viabilidade dos proxectos dende o punto de vista técnico, legal, económico e comercial. En que consisten os proxectos gañadores?
O primeiro premio foi para o proxecto ‘Granxa intelixente’, realizado por alumnos do IES Politécnico de Vigo. Trátase dunha cooperativa centrada no ámbito agropecuario que obtén un alto grao de automatización e dixitalización dos procesos de explotacións agrícolas e gandeiras.
O segundo premio foi para un alumno do IES 12 de Outubro de Ourense e outro do CIFP A Farixa, tamén de Ourense, por ‘Inercia 2.0 S.L.’, empresa pioneira no deseño e fabricación de todo tipo de vehículos de inercia.
‘Eternal 2.0. Un recordo para toda a vida’ foi galardoado co terceiro premio. Desenvolvido por alumnos do IES San Clemente de Santiago, a iniciativa introduce as novas tecnoloxías nos servizos funerarios.
No grao medio, seleccionáronse dous proxectos. ‘Ecosalón’ introduce un novo concepto de espazo global unisex urbano; coidados estéticos, de beleza e relaxación, e uso de produtos ecolóxicos. ‘Bai aventura’, segundo premio nesta modalidade, é unha empresa de turismo activo cun servizo integral de actividades de aventura mar-montaña.
Eduemprende
O Plan de Emprendemento do sistema educativo Galego, Eduemprende, púxose en marcha no 2010 coa colaboración do Igape. O obxectivo é apoiar ao alumnado, poñer en marcha proxectos empresariais viables e poñer en práctica ideas innovadoras de negocio.