Foto puntogal.org
A finais de xullo presentábanse os 93 seleccionados no Programa Pioneiros, que empregan o dominio .gal dende o pasado 25 de xullo.
A Asociación PuntoGal seleccionou aos 93 pioneiros segundo criterios de representatividade na sociedade, en función da contribución ofrecida ao lanzamento do .gal e garantindo que todos os sectores sociais estean representados. Seleccionáronse 35 candidaturas da administración pública, 15 de empresas e 43 de entidades sen ánimo de lucro.
Fases Abrente e Carreira
A seguinte fase é a Fase Abrente. Comezará en setembro, durará ata novembro e buscará protexer dominios de interese público. As entidades públicas e privadas poderán exercer o seu dereito preferente de solicitar o seu dominio actual. Búscase protexer os intereses de administracións públicas, propietarios de marcas, etc.
En paralelo á Fase Abrente, desenvolverase a Fase Carreira, para o público en xeral e para enderezos sen dereitos preferentes. Durante esta fase poderase poxar por enderezos especialmente atractivos.
Fase Aberta
Será en decembro cando chegará a Fase Aberta na que todos poderemos acceder ao .gal sen máis restricións que as que podemos atopar con calquera dominio xa dispoñible na rede.
As características concretas de cada fase están publicadas na web domino.gal, páxina na que tamén se poden consultar dúbidas.