Día 1 – Benvidas e benvidos aos 21 DÍAS CO GALEGO E +!

01. Febreiro 2022 21 Días co galego e mais 2022, Reflexións

PRESENTACIÓN

Este é un programa que pretende aumentar e perfeccionar o emprego oral do galego así como a reflexión persoal sobre a relación que cada persoa ten coa lingua galega e co resto de idiomas que coñece.

Ao longo de 21 días, aquí ides atopar propostas diversas para vos achegardes ao galego e á súa cultura.

A maioría dos contidos que se vos ofrecerán son realizados polo alumnado e o profesorado de cada un dos doce centros de ensino participantes.

Ao longo das próximas xornadas vós seredes as e os protagonistas dos 21 Días co Galego e + 2022.

VIR PARA QUEDAR

Queremos inaugurar este ano o programa facéndolle unha homenaxe ás Tanxugueiras porque neste momento son o maior exemplo da defensa do idioma e da convivencia en harmonía das linguas do Estado. E así como elas veñen para quedar, nós tamén queremos que a lingua galega veña ás vosas vidas para quedar tamén para sempre nelas.

CITAS

Non esquezades as nosas citas diarias:

– Nesta páxina.

– Nas nosas redes sociais: Facebook, Instagram, TikTok e Twitter

– Na Radio Galega, de luns a venres no programa Galicia por Diante, ás 13:15 horas

– Tamén imos ter como cómplice desta edición a xente do Dígocho eu! para nos divertirmos mellorando a nosa lingua.

 

FALAMOS – REFLEXIÓN 1

Hoxe vas ter que realizar a túa primeira gravación de reflexión.

Para realizar estes audios:

– Se cursas primaria, gravarás na túa casa ao final do día na compaña da túa familia, se así o desexan, o que realmente importa é a túa sinceridade e capacidade de análise. Non necesitamos que nos contes o marabilloso que é o galego; ben o sabemos!

– Se cursas ESO ou bacharelato, gravarás na túa casa ao final do día en solitario; o que realmente importa é a túa sinceridade e capacidade de análise. Non necesitamos que nos contes o marabilloso que é o galego; ben o sabemos!

Agora escolle o conxunto de preguntas que respondan á túa situación segundo fales galego de forma cotiá (OPCIÓN A) ou non fales galego de forma cotiá (OPCIÓN B)

OPCIÓN A: Eu falo galego de forma cotiá.

Xenial! Es das persoas que gardan o tesouro centenario da nosa lingua.

    1. Que usos fas ti habitualmente do galego?
    2. Na túa familia fálase galego? Inflúe a idade das persoas para falar máis ou menos galego na túa familia? 
    3. Cres que é importante para o galego que as persoas que o falan, coma ti, participen en iniciativas deste tipo para axudar a que o galego medre? 
    4. Na túa familia fálase galego? Inflúe a idade das persoas para falar máis ou menos galego na túa familia?
    5. Ademais de falar galego na túa vida cotiá, se tes a idade para usalas, tamén empregas o galego nas túas redes? 
    6. Agora establece 3 retos concretos para axudar outras persoas a que o falen coma ti (poden ser compañeiras e compañeiros, familiares, amigas e amigos…)
    7. Pensas que che será moi doado ou moi difícil para ti facelo?
    8. Desexas comentar algo máis?

OPCIÓN B: Eu non falo galego de forma cotiá.

    1. Que usos fas ti habitualmente do galego?
    2. Na túa familia fálase galego? Inflúe a idade das persoas para falar máis ou menos galego na túa familia?
    3. Que che parece a proposta dos 21 Días co Galego e +?
    4. Veste capaz de chegar a falar 24 horas en galego desde o primeiro día?
    5. Cres que o lograrás antes do último día?
    6. Que reaccións percibiches entre o resto da túa clase ou na casa?
    1. Que pasos deches xa hoxe para seguires a proposta?
    2. Pensas ampliar progresivamente os usos ou tentas xa falar galego sempre?
    3. En que ámbitos (escola, amizade, familia, lecer…) ou con que tipo de persoas cres/sabes que che custará máis?
    4. Establece un reto posible e medibl para ti neste programa. Pensas que che será moi doado ou moi difícil? Por que?