A nosa biblioteca enchiuse de ciencia este pasado xoves 2 de outubro! Xunto co profesor Frankie Stein gozamos dunha tarde extraordinaria onde puidemos aprender conceptos como a gravidade, as moléculas, a electricidade estática… todo dun xeito ameno e moi divertido. A maiores, presentouse unha nova vida na biblio, pois entre todos e todas fomos quen de resucitar a unha nova amiga de Frankie cun dos nosos experimentos. Terminamos a sesión cun miniobradoiro onde fixemos explotar máis de un globo.

O pasado venres 26 de outubro visitounos David Marelas a nosa biblioteca. Gozamos dunha sesión extraordinaria onde, entre malabares, clown, e moitas bromas descubrimos unha nova versión dun conto tan coñecido como é O frautista de Hamelín. Sen dúbida, foi unha xornada fantástica marcada polas risas, pois como di David, un día sen rir é un día perdido.

O pasado 10 de xullo celebramos na biblioteca o obradoiro Maker Maxia, unha actividade na que os máis pequenos e pequenas gozaron dunha xornada chea de ilusión e aprendizaxe da man do Mago Richard e o Mago da Boina.

Foi unha proposta divertida e participativa na que a rapazada se iniciou no mundo da maxia dun xeito creativo e práctico.

Este ano puxemos en marcha unha nova proposta pensada para que os máis pequenos da gardería municipal puidesen tamén disfrutar das actividades organizadas dende a nosa Biblioteca. Dentro do programa Lecturas e Miúdas, e através da actividade Bibliocanta, os nenos e nenas gozaron dunha proposta que lles permitiu descubrir e revivir o cancioneiro popular galego dun xeito lúdico e participativo. A través de cantigas, xogos e recitados, conectaron coa nosa cultura oral dun xeito vivo e divertido. Ademais, fixémoslles entrega do seu primeiro carné da biblioteca e deixamos un lote de libros para enriquecer os recunchos de lectura do centro. Foi unha experiencia entrañable que deixou un ronsel de emoción e moitas ganas de seguir compartindo historias e cancións.

No 23 de abril, día do libro visitounos Carballo con Botas e a súa magnífica ciclobiblioteca. Logo dun paseo dende a Biblioteca ata a praciña do lado, puidemos descubrir todos os segredos agochados nos libros que Carballo porta con él. Contounos a historia de Salgadinha, a Estrela de Fisterra, un conto fermoso que naceu na nosa Terra. Tocamos a pandeireta, bailamos e inventamos novas historias entre todas e todos. Ao terminar, demos longos paseos montados na ciclobiblioteca polas rúas de Muxía e os nenos e nenas quedaron encantados.

O pasado 18 de outubro tivemos o pracer de contar con Iria e o resto do equipo de Xogando nas nubes na nosa biblioteca de Muxía. Creamos o noso propio portalibros mediante a técnica da estampación, e os máis cativos e cativas pasárono en grande, experimentando co debuxo, coa goma eva, coa pintura e con todos os deseños terroríficos inspirados no Samaín.

Todo un acerto este obradoiro!

O pasado martes visitáronnos en Muxía os compañeiros de Átomos para darnos un taller sobre Robótica. Logo dunhas nocións sobre a materia, aprendemos de forma amena e divertida construindo o noso propio robot, unha mini rumba que puidemos levar para casa!

Recomendable!

O pasado venres 4 de outubro iniciamos o programa Outubro na Biblioteca. Nesta primeira sesión veunos visitar a ratiña Faifa e a deleitarnos coas súas cancións e bailes. Os cativos e cativas de Muxía pasaron unha agradable tarde na biblioteca, revivindo as emocións do Monstro de Cores.

O sábado 21 de agosto estivo en Muxía Lía Magalia e os seus fermosos contos de animais. A rapazada puido disfrutalos ao aire libre para unha maior seguridade.

O día 14 de agosto trouxemos ata Muxía a Excéntricas e Teatro de Adro co espectáculo Cartoons. A actuación tivo lugar na rúa debido ao calor e ás medidas covid, e dado que este ano está permitido facelo fóra da biblioteca. Tivo moito éxito e é un espectáculo moi recomendable para disfrutar en familia

Asistiron unhas 60 persoas.