Montamos unha banda de verán con Xoán Curiel!

16/07/2025

O pasado sábado, 12/07/2025, veu Xoán Curiel a Ribeira para axudarnos a montar a nosa banda de verán con Ler Conta Moito.

A quen lle gusta a música? A quen lle gusta cantar? A quen lle gusta bailar? E quen non lle ha de gustar…

Pois así foi. Cantamos, bailamos e tocamos todos cantos instrumentos nos trouxo Xoán co seu espectáculo “Como montar a túa banda de verán”.

Esta función está baseada no libro disco da Editorial Galaxia “Estamos no verán” de Xoán Curiel e Charo Pita.

Se queredes ler este libro e tantos outros que temos na Biblioteca Pública Municipal de Ribeira recordámosvos que o horario de verán é de 8.00 a 14.00 h de luns a venres.

Que teñades boas lecturas de verán!

en Actividades / por Ribeira – B.P.M. Ribeira

Francisco Castro na Biblioteca de Ribeira

11/06/2025

O pasado sábado 7 de xuño tivemos unha mañá chea de musica e poesía no Centro Cultural Lustres Rivas de Ribeira.

A voz e as guitarras de Francisco Castro acompañaron a un público entregado. Recordamos poemas musicados, cantamos, escoitamos, emocionámonos…

Moitas grazas Francisco Castro pola túa magnífica proposta “Poesiacordes” dentro do catálogo Ler Conta Moito 2025 que seguimos na Biblioteca Pública Municipal de Ribeira

en Actividades / por Ribeira – B.P.M. Ribeira

“A biblioteca ideal” en Ribeira

29/05/2025

Este sábado 24 de maio tivemos no Centro Cultural Lustres Rivas o obradoiro “A biblioteca ideal”. Gustavo levounos polo mundo dos libros e traballamos en común persoas adultas cos nenos e as nenas para facer o noso gran libro do que máis nos gusta. Xogamos, pintamos, escoitamos contos… Unha mañá marabillosa con Náufragos Teatro.

A Biblioteca Pública Municipal de Ribeira encheuse coas nosas peticións para a fin de semana.

Moito nos gusta ler…

en Actividades / por Ribeira – B.P.M. Ribeira

Cris de Caldas en Ribeira!

12/05/2025

Este sábado 3 de maio veu Cris de Caldas onda nós para contar historias de mulleres e de nenas.

Xa o título “A conto delas”, que así se presenta no catálogo Ler Conta Moito da Rede de Bibliotecas de Galicia, fai que poidamos reflexionar sobre a igualdade na que xa van criadas as nenas e os nenos de hoxe en día. Pero hai que estar sempre con mil ollos, sempre reivindicando, sempre atendendo…

Xuntámonos coma sempre na sala de exposicións do Centro Cultural Lustres Rivas, moitas familias xa viñades de coller libros na Biblioteca Pública Municipal de Ribeira. Saudámonos, xogamos un pouco, puxemos as chapas do galego para recordar que o noso idioma está pegado ao corazón, e incluso aprendemos un cantar de colo, que non hai cousa mellor para levar para a casa que un cantar.

Titiritiñas, titiritiñas

o que non come

non ten barriguiñas.

Titiritiñas, titiritolas

o que non come

non ten… Barrigolas!

E de aí fomos escoitar os contos, cantares e xogos de Cris De Caldas. Moito nos gustou gañarlle ao lobo! E máis aínda saír con ben fronte ao boticario trampón… E a canción coas letras na lingua de signos. E o conto do bater do corazón no peito das nais bum, bum; bum, bum; bum, bum…

Moitas grazas polo teu magnífico traballo, Cris de Caldas!

Vinde aos contos porque Ler Conta Moito!

en Actividades / por Ribeira – B.P.M. Ribeira

Repartimos zapatiños de cartón na Biblioteca de Ribeira

03/06/2024

Rematou maio con vento e chuvia, pero iso non impediu que tivésemos unha preciosa mañá de sábado con contos, historias e cancións no Centro Cultural Lustres Rivas.

O 25 de maio rematamos os sábados de conto deste ano 2024, e rematamos con moita alegría. Queríamos ir a San Roque pasar a mañá no medio das árbores e escoitar alí as preciosas historias de Anxo Moure, pero como ameazaba chuvia decidimos quedar ao cuberto no Lustres.

E ás 12.00 h chegou Zapatiños de cartón á porta, parecía un vendedor ambulante, co mandilón azul e un carriño cheo de zapatos… Alí nos xuntamos arredor del e comezou a maxia dos contos. Fomos poñendo as nosas chapas do galego e…

Subimos á sala de exposicións sen facer ruído para non molestar na Biblioteca Pública Municipal de Ribeira e Anxo contounos por onde viñera desde Chantada, aprendeunos os nomes das árbores e o ben que fan, cantounos cancións, tocamos a pandeireta, bailamos, montamos no teixugo… Unha festa completa. Ademais deunos un “zapatiño de cartón para levar no corazón” a cadaquén.

Tamén levamos sempre no corazón a Anxo Moure, este Carballo con Botas tan bo e cariñoso!

Ler Conta Moito.

en Actividades / por Ribeira – B.P.M. Ribeira

A Toupiña máis famosa de Galicia estivo en Ribeira

18/05/2024

O pasado sábado, 11 de maio, tivemos con nós a Toupiña máis querida de Galicia. É moi intelixente e o que non sabe pregúntao, a curiosidade fai que cada día sexa máis e máis culta. O coñecemento, a ciencia, xera nela e en nós todo o interese.

“Toupiciencia Show” da Xanela do Maxín trouxo ao Centro Cultural Lustres Rivas de Ribeira diversión e aprendizaxe, experiencias compartidas co público da man de Protonio, o noso querido e admirado Topo Vidal.

Moitas grazas polo voso magnífico traballo!

Porque Ler Conta Moito ao rematar o espectáculo a Biblioteca Pública Municipal de Ribeira encheuse de nenos e nenas collendo os seus libros favoritos para levar para a casa.

Vémonos nos contos.

en Actividades / por Ribeira – B.P.M. Ribeira

“As aventuras de Mariñas” contáronse en Ribeira

11/05/2024

O 4 de maio, sábado, comezamos a programación infantil e familiar do Maio Cultural 2024 cunha proposta de narración oral e monicreques que nos encantou.

Comezamos xuntándonos na sala de exposicións. Nais, pais, tíos, tías, avoas, avós, nenas e nenos estivemos a mirar as obras penduradas nas paredes, buscamos distintas escenas, cores e texturas. Encantounos coñecer esta nova mostra cos cadros da “Bienal de pintura Elixo Atlántico”. E despois da pintura fomos xa cara ao teatro no salón de actos.

“As aventuras de Mariña” de Galeatro encheron o Centro Cultural Lustres Rivas de ilusións, amizades, compromisos, fantasía… A voz da protagonista, interpretada maxistralmente por Alba Bermúdez, levounos ao mundo da infancia, a poñerlle nome a un peixe amigo, a conversar con Xarda e nadar con ela. E tamén a facer unha orquestra no fondo do mar e cantar a berros coma a gaivota, ou tocar o tambor coma o polbo, todo sempre baixo a dirección de Mariña, a nena que fala cos peixes.

Despois de escoitar os contos e facer música rematamos compartindo ideas para que non haxa plásticos nin lixo ningún no mar. Se todo o mundo colabora ímolo conseguir!

Moitas grazas Alba de Galeatro, encantounos a función.

Ao rematar fomos coller os nosos libros favoritos á Biblioteca Pública Municipal de Ribeira

Vémonos nos contos porque Ler Conta Moito!

en Actividades / por Ribeira – B.P.M. Ribeira

Un “Menú máxico de contos” en Ribeira con Cris de Caldas

08/04/2024

Moi ben o pasamos este sábado, 6 de abril, no Centro Cultural Lustres Rivas.

Visitamos a exposición de Juan Codesido, e fomos seleccionando as nosas obras favoritas. Moito nos gustan as cores que enchen a sala!

Xa ás 12.00 h pasamos ao salón de actos para escoitar a Cris De Caldas co seu “Menú máxico de contos”. Contounos historias de fabas máxicas, dunha sopa moi rica, da maxia que está en nós… Tamén cantamos e bailamos. Fixemos de todo!

Os contos eran preciosos e ademais ao saír puidemos collelos prestados na Biblioteca Pública Municipal de Ribeira como nos dixera Cris.

Moitas grazas a Cris de Caldas por facer que tivésemos unha estupenda mañá de sábado.

#LerContaMoito

en Actividades / por Ribeira – B.P.M. Ribeira

Ribeira de conto con Ler Conta Moito

31/10/2023

Rematamos as contadas dos Sábados de Conto no Centro Cultural Lustres Rivas de Ribeira con “Ler Conta Moito 2023″. Non acompañou moito para a despedida este outono de temporal en temporal, pero contra as suradas, que mellor cousa que ler un libro na caloriña da casa.

Migallas Teatro cos seus”Cinco ratiños” deixáronnos preciosas historias que contar e compartir ao longo dos meses máis fríos que veñen aí.

Unha aperta moi grande!

Boas lecturas e bo inverno para toda a familia!

en Actividades / por Ribeira – B.P.M. Ribeira

Ler contou moito no Día das Letras Galegas en Ribeira

18/05/2023

No 17 de maio María Faltri encheu de alegría, letras galegas e cancións a praza do Concello de Ribeira. As persoas usuarias da Biblioteca Pública Municipal de Ribeira tiveron unha festa do galego e dos libros para gozar en familia.

Moitas grazas a María e Jorge Juncal pola súa magnífica sesión de “Picadiscos”.

Moitas grazas ao Obradoiro de Cociña Monte Tahume do Concello de Ribeira polo seu agasallo de “Galletas das Letras” que tanta dozura puxeron na nosa mañá do Día das Letras Galegas.

#lercontamoito

#concelloderibeira

#diadasletrasgalegas

en Actividades / por Ribeira – B.P.M. Ribeira

Arquivo de Autor por: Ribeira – B.P.M. Ribeira

Montamos unha banda de verán con Xoán Curiel!

Francisco Castro na Biblioteca de Ribeira

“A biblioteca ideal” en Ribeira

Cris de Caldas en Ribeira!

Repartimos zapatiños de cartón na Biblioteca de Ribeira

A Toupiña máis famosa de Galicia estivo en Ribeira

“As aventuras de Mariñas” contáronse en Ribeira

Un “Menú máxico de contos” en Ribeira con Cris de Caldas

Ribeira de conto con Ler Conta Moito

Ler contou moito no Día das Letras Galegas en Ribeira

Artigos recentes

Arquivo de Autor por: Ribeira – B.P.M. Ribeira

Séguenos

Artigos recentes