Ribeira de conto con Ler Conta Moito

31/10/2023

Rematamos as contadas dos Sábados de Conto no Centro Cultural Lustres Rivas de Ribeira con “Ler Conta Moito 2023″. Non acompañou moito para a despedida este outono de temporal en temporal, pero contra as suradas, que mellor cousa que ler un libro na caloriña da casa.

Migallas Teatro cos seus”Cinco ratiños” deixáronnos preciosas historias que contar e compartir ao longo dos meses máis fríos que veñen aí.

Unha aperta moi grande!

Boas lecturas e bo inverno para toda a familia!

en Actividades / por Ribeira – B.P.M. Ribeira

Ler contou moito no Día das Letras Galegas en Ribeira

18/05/2023

No 17 de maio María Faltri encheu de alegría, letras galegas e cancións a praza do Concello de Ribeira. As persoas usuarias da Biblioteca Pública Municipal de Ribeira tiveron unha festa do galego e dos libros para gozar en familia.

Moitas grazas a María e Jorge Juncal pola súa magnífica sesión de “Picadiscos”.

Moitas grazas ao Obradoiro de Cociña Monte Tahume do Concello de Ribeira polo seu agasallo de “Galletas das Letras” que tanta dozura puxeron na nosa mañá do Día das Letras Galegas.

#lercontamoito

#concelloderibeira

#diadasletrasgalegas

en Actividades / por Ribeira – B.P.M. Ribeira

“Unha nova Galaxia” en Ribeira

18/05/2023

Este sábado ás 12.00 h enchémonos de teatro e libros en Ribeira… Francisco Fernández del Riego visitounos da man de Trémola Teatro para explicarnos a importancia da nosa lingua, da nosa comunicación en galego, da nosa necesidade de editar en galego.

Foi un pracer estar con Trémola Teatro e saber que “Ler Conta Moito”.

#lercontamoito

#concelloderibeira

#diadasletrasgalegas

en Actividades / por Ribeira – B.P.M. Ribeira

“Filipa cos contos” en Ribeira

18/05/2023

Xa comezou o Maio Cultural e con el unha manchea de contos para toda a familia nos sábados pola mañá.

“Filipa cos contos”, con Fran Campos da compañía Bandullo Azul

Espectáculo de narración oral con monicreques para nenos e nenas de 3 a 12 anos e as súas familias

Data: sábado, 06/05/20223

Hora: 12.00 h

Lugar: Centro Cultural Lustres Rivas

Unha sesión “filipante” de contos para toda a familia. Historias tradicionais, música e humor repártense entre os dous contadores que soben a escena: o actor Fran Campos e a súa amiga Filipa, que dará un valor engadido ás historias de carácter tradicional: a súa experiencia. Pero ollo, que non son uns contos calquera. Entre eses contos haberá tamén historias cantadas. Haberá historias e xogos de palabras feitas cancións. Historias non só do noso contorno máis próximo, senón tamén doutras terras. Contos “filipantes”, acompañados dunha guitarra. Fran Campos e Filipa, os dous e cadaquén ao seu xeito, farán posible unha sesión para todos os públicos. Tanto nenas e nenos como maiores poderán gozar, aprender, reflexionar… desde as súas distintas visións dos contos populares. (Bandullo Azul).

#lercontamoito

#concelloderibeira

#bandulloazul

en Actividades / por Ribeira – B.P.M. Ribeira

“Porco, porquiño ensíname o camiño” de Charo Pita en Ribeira

24/04/2023

Que ben estivemos no Centro Cultural Lustres Rivas o sábado, 15 de abril, pola mañá!

Coas obras de Vyana DL ao Redor, acubillándonos, escoitamos as cancións e os contos de Charo Pita.

“Porco, porquiño ensíname o camiño” encheu o Lustres Rivas de alegría. Bebés, papás, mamás… Unha manchea de persoas acompañamos a Charo nunha andaina de aprendizaxe de novas palabras, ritmos e historias para as persoas máis pequenas da casa.

Parabéns ao público por participar! E parabéns a Charo Pita polo seu ben facer!

Vémonos no Centro Cultural Lustres Rivas de Ribeira. Recordade que a Biblioteca Pública Municipal de Ribeira está aberta os sábados para préstamo ata as 14.00 h.

Ler Conta Moito!

en Actividades / por Ribeira – B.P.M. Ribeira

Paco Nogueiras estivo en Aguiño co seu espectáculo “Radio Bulebule”.

30/05/2022

Este domingo, 29 de maio, ás 19.00 h a Biblioteca de Ribeira levou á Aula de Música de Aguiño unha nova actividade de dinamización da lectura. E grazas á colaboración da Asociación Francisco Lorenzo Mariño a sala estaba chea ata a bandeira.

Que contentas estaban as familias cantando e bailando coa música de Paco Nogueiras… E que boa nova temos na Biblioteca de Ribeira porque xa sabemos que van vir unha morea de familias pedir o seu carné!

Ler Conta Moito!

en Actividades / por Ribeira – B.P.M. Ribeira

“Fantasía coas palabras” en Ribeira

30/05/2022

A Biblioteca de Ribeira este sábado, 28 de maio, foi de festa á Casa de Cultura de Carreira.

Ás 19.00 h comezou o espectáculo de María Faltri e Jorge Juncal no que aprendemos novas palabras e cancións… “Fantasía coas palabras” foi todo un éxito. Bailamos e cantamos ata non poder máis!

Todo o público quedou ben contento de poder participar, e ademais xa sabemos que imos ter máis socios e socias da Biblioteca, porque a todo o mundo lle encanta a idea de vir coller libros a préstamo, sobre todo agora que chega o tempo do verán.

Ler Conta Moito!

en Actividades / por Ribeira – B.P.M. Ribeira

O “Barullo” de Nelson Quinteiro encheu Palmeira de son

16/05/2022

O 14 de maio a Biblioteca foi a Palmeira. E alí encheuse o Porto de música e diversión co “Barullo” de Nelson Quinteiro.

A música tradicional é parte do noso patrimonio e para gardalo e facelo medrar nada mellor que coñecer os instrumentos e tipoloxía musical de preto e da man dun magnífico intérprete.

Moitas grazas, Nelson Quinteiro!

E recordade que para saber máis o mellor é ler. Ler Conta Moito.

en Actividades / por Ribeira – B.P.M. Ribeira

A Biblioteca de Ribeira foi a Artes

10/05/2022

O 7 de maio a Biblioteca con Ler Conta Moito levou a Artes as cancións de Pakolas.

Ás 19.00 h o Centro Recreativo de Artes estaba cheo de público infantil e adulto ao agardo de que comezase o concerto do noso músico favorito, Pakolas, co seu traballo “Ramona Órbita”.

Cantamos, bailamos, e falamos do importante que é que nos fagamos socios e socias da Biblioteca para poder coller libros e lelos na casa. Xusto agora, antes do verán cando pechan as bibliotecas escolares, é o mellor momento para recordar que o carné da Biblioteca é moi útil. Porque Ler Conta Moito!

en Actividades / por Ribeira – B.P.M. Ribeira

Día do Libro co Tranvía Leonardo en Ribeira

25/04/2022

O Día do Libro de 2022, 23 de abril, foi magnífico en Ribeira.

Para vir ver “O tranvía Leonardo” e celebrar o día con contos e cancións recibimos 130 inscricións e decidimos que para caber ben mellor iamos para o Auditorio.

E así foi como o 23 de abril ás 12.00 h nos xuntamos no Auditorio con Fantoches Baj ao cargo.

Encantounos a función!

E ao saír tivemos regaliños para tooooodo o mundo. Levamos para a casa un recortable que nos deu Inacio Vilariño, e ademais un libro e máis un marcapáxinas do Primeiro Concurso de Marcapáxinas da Biblioteca Pública Municipal de Ribeira que nos foi entregando a cadaquén Nucha Brión, a concelleira de Educación.

Vémonos na Biblioteca!