O mércores 19 de setembro visitaron de novo a Biblioteca uns amigos moi queridos polos nosos nenos os ratos de Lonxedetodo coa súa artista máis internacional, a gran Lilí Gruyére, para falarnos dos nosos maiores. O ciclo da vida e o respecto debido aos anciáns son os dous temas tratados neste espectáculo. A ratiña Lilí Gruyére contounos como axudou a súa avoa, hai moitos, moitos anos, cando ela era pequena e a súa avoa aínda vivía, a plantar unha maceira. Hoxe, cada vez que come unha mazá, lembra a súa avoa. Relatounos os contos que ela lle contaba e púxonos a música que a ela lle gustaba.

A idade dos asistentes infantís estaba entre 3 e 9 anos e todos estiveron moi atentos e participaron no desenvolvemento da actividade como tamén os maiores que os acompañaban

Este sábado 21 de outubro e anticipándonos a celebración do Día da Biblioteca visitounos, Paco Nogueiras co seu espectáculo “Brinca vai! De aquí a acolá” no que se combinan cancións, e interpretacións con ritmos moi divertidos. Os libros, a poesía, a ecoloxía, as festas do ano (o magosto, o samaín, o entroido, o nadal) e o respecto á nosa lingua son parte dos temas do seu repertorio, dirixido a nenas e nenos de todas as idades. Todo un éxito de participación tanto de xente miúda como de maiores.

dav

Contando “O rato e os ventos”

Cantando o hino de Lonxedetodo

Hoxe, venres 21 de abril, para celebrar o Día do Libro e dentro do programa Ler Conta Moito, a B.P.M. El Viejo Pancho de Ribadeo recibiu ás nenas e nenos de primeiro de primaria dos colexios da nosa vila cun espectáculo moi especial, visitounos o rato Fuco de Trinke Trinke Teatro. O Fuco trae nunha caixa os tres ratiños máis novos do país Lonxedetodo. Son moi trastes e desobedentes e tenos que coidar. Tenta calmalos contándolle contos especiais para ratiños, pero non resulta doado.

Contounos catro contos tirados das obras de Arnold Lobel Contos de ratiños e Sopa de rato. Alén diso cantou, bailou e interactuou moito con as pícaras e os pícaros. Unha mañá divertida e diferente na biblioteca.

O sábado 22 de outubro e para celebrar o Día da Biblioteca, visitounos na B.P.M. El Viejo Pancho, Raquel Queizás co seu espectáculo “Contos nados no mar”. Coa historia da serea Mariña como fío condutor, Raquel somerxeu a pequenas, pequenos e maiores nas profundidades do mar a través de lendas de seres mariños e mensaxes chegadas desde o máis profundo do océano. Un espectáculo para todos os públicos que converteu a tarde do pasado sábado nun encontro lúdico e didáctico para as familias que asistiron.

O pasado luns 25 de abril e para celebrar o día do libro, a B.P.M. El Viejo Pancho de Ribadeo recibiu ás nenas e nenos de primeiro de primaria dos colexios Gregorio Sanz e Sagrado Corazón de Jesús cun espectáculo moi especial, visitounos Lilí Gruyére! Esta vella amiga da biblioteca veu para recordarnos que as ratiñas e os ratiños de biblioteca ademais do queixo, encántalles ler contos e pasan horas e horas rebuscando e lendo os pequenos tesouros que atopan nos andeis das bibliotecas de todo o mundo. Lilí coñece mil historias e é unha experta contándoas. Coa axuda do seu amigo, o Coelliño Branco, Lilí narrou contos, fixo maxia, cantou cancións e ata nos aprendeu o himno do seu país, “Lonxedetodo” con coreografía incluída! Tamén as nenas e nenos e o profesorado que visitaron biblioteca colaboraron na representación do conto do Coelliño Branco. Unha mañá divertida e diferente na biblioteca, á que todo o mundo está invitado a explorar nos andeis coma Lilí para descubrir todas as historias, mundos, soños, personaxes… que se atopan en cada libro.

O pasado luns 28 de marzo visitounos na B.P.M. El Viejo Pancho o grupo de teatro Migallas co seu espectáculo “Camiño de Historias”. Grazas á axuda das nenas e nenos que viñeron á biblioteca, Hermelinda e Maximino foron quen de ordenar as letras esparexidas das tres palabras que definen a felicidade: PAN (o bandullo cheo), RISA (que nunca falte a alegría) e SISO (sentidiño para vivir no mundo). Estas palabras atopábanse escondidas en tres contos a través dos que percorremos o mundo desde Brasil ata Macau pasando por Angola. Debuxos, transparencias e pregos foron nesta ocasión o medio utilizado para mergullarnos unha vez máis no mundo da fantasía da man de Migallas, onde as cancións e a lingua comparten protagonismo con historias que atrapan a nenas, nenos e maiores.

O sabado día 24 de outubro moitos nenos e nenas viñeron a celebrar o día da Biblioteca connosco. Visitounos O Aviador, quen lembrou con todos nós cando nunha das súas moitas viaxes atopouse cun moucho que lle contou que tiña un gran problema. O moucho era feliz cando escurecía e polas noites, pero sentíase moi triste cando comezaba a saír o sol. O aviador intentou axudalo pero deuse conta de que neste planeta non se pode vivir sen sol.
A narración oral estivo acompañada por música, monicreques, sombras chinesas e diversos obxectos.

Charo Pita, narradora de contos, visitou a B.P.M. El Viejo Pancho de Ribadeo para celebrar o Día das Letras Galegas. A través de varias narracións de autoría propia, pero tamén doutras autoras e autores, falounos de igualdade. Coa “Mosca tola” aprendemos a voar en liberdade; a través da historia de Elenita, un conto mexicano, vimos que os soños ao igual que as profesións, non entenden de xéneno; co “Cabaliño de mar” aprendemos que na natureza hai papás que poden parir fillas e fillos; con “O Papón” pasamos medo no faiado, e con “Igor” aprendemos que as mulleres e homes “como é debido” non se distinguen polo seu físico, senón polos seus actos. Todas estas historias fixeron as delicias das nosas nenas e nenos que gozaron dunha tarde entre libros para celebrar o 17 de maio.

Un ano máis para festexar o Día do Libro volveron a visitarnos os nosos amigos Fuco e Lilí Gruyere, ratos de Lonxedetodo, de Trinke trinke teatro. Cancións e contos divertiron aos nenos e nenas e  ensináronlles o importante que é aprender a resolver conflitos. Dous contos: Negros e brancos de David McKee e Historia dunha bala de Joles Sennell, e as cancións dos ratos de Lonxedetodo e La muralla sobre un poema de Nicolás Guillén.