O pasado venres 14 de outubro, Trinke trinke iniciou unha ruta de contadas polas axencias de lectura de Cambados. A primeira parada foi en Oubiña, para que os nenos desta parroquia coñecesen a historia do Coelliño Branco. Os rapaces e pais que participaron puideron gozar dunha sesión moi divertida e chea de sorrisos… velaí van unhas fotos que así o reflicten:
Onte, 18 de maio, conmemorábase o centenario da creación das Irmandades da Fala. Con tal motivo, quixemos achegar a figura dun dos seus máximos promotores, Castelao.
Grazas a A Xanela do Maxín e o seu teatriño de sombras fomos descubrindo como eran os personaxes da época do autor, reflectidos na súa obra… os rapaces mesmo puideron manexar as figuriñas no teatriño que Celtia nos agasallou… e pasárono en grande!
O pasado venres 13 de maio Trinke trinke, tras visitar en Cambados as demais axencias de lectura, fixo unha parada en Oubiña, para que os nenos desta parroquia coñecesen tamén a súa versión ratoniana de Riciños de Ouro. Os rapaces e pais que participaron puideron gozar dunha sesión moi divertida e chea de sorrisos… velaí van algunhas fotos que así o reflicten:
Os pasados venres 3 e 10 de xullo realizamos a través do programa Ler Conta Moito unha xincana fotográfica sobre un dos cambadeses de pro máis importantes, Ramón Cabanillas.
A través da fotografía, dous equipos de 14 nen@s en total, percorreron as rúas de Cambados relacionadas coa vida e obra do bardo de Fefiñáns, superando divertidas probas ao tempo de coñecían algo máis deste insigne escritor.
Ao remate, todos recibiron un diploma pola súa participación, desexando volver a repetir pronto esta interesante proposta.
O pasado luns 11 de maio, comezamos na ALM de Oubiña a celebración das Letras Galegas 2015 nos centros culturais do municipio de Cambados.
Grazas ao programa da Xunta de Galicia, Ler conta Moito, puidemos gozar do bo facer de Expresións Producións e o seu espéctaculo de animación á lectura “Conto Contigo” que inclúe contacontos, títeres e maxia… resultou moi divertido!
O pasado luns 20 de abril, dentro das actividades para celebrar o Día Internacional do Libro, a ALM de Oubiña en Cambados foi a primeira en recibir a Xanela Ocio e os seus Contos ao Revés.
A través do Programa Ler Conta Moito da Xunta de Galicia puidemos gozar dunha actividade de animación á lectura dirixida sobre todo aos máis cativos da casa para fomentar a igualdade e o respecto, onde se amosaron historias onde as bruxas son boas e os príncipes, feos
A sesión fixo as delicias de todos os asistentes que permaneceron impasibles durante os 50 minutos da sesión. Na axencia de lectura quixeron homenaxear dun xeito tan orixinal as boas historias e os libros.
Onte o Carballo con botas, tras visitar en Cambados as axencias de lectura de Castrelo e Corvillón, fixo unha parada en Oubiña, para que os nenos desta parroquia coñecesen tamén a súa titiricleta e as curiosas historias que nela se contan. Os rapaces e pais que participaron puideron gozar dunha sesión moi divertida e chea de sorrisos… velaí van algunhas fotos que así o reflicten:
Hoxe xoves o Carballo con Botas despedirase na axencia de Vilariño, ata, esperemos, moi pronto!
O pasado venres 3 de outubro, a través da axencia de lectura de Oubiña, puidemos gozar do espectáculo musical dos Tres Tenedores no Parque do Pazo de Torrado, en Cambados. Máis de 100 persoas entre pais e nenos riron a cachón cos dous vellos e os tres músicos que, non con certa complicación, fóronos amosando as diferentes clases de instrumentos de vento, de percusión… Durante aproximadamente unha hora divertímonos coas súas teimas e puidemos cantar e bailar mesmo ao son do lagarto da Carolina en todas as versións imaxinables… dende a rapeada, pasando pola heavy ou mesmo a reggae. Ademais, os tres músicos contaron coa inestimable axuda dos voluntarios do público para achegarnos aos instrumentos e a música… e fixeron o que boamente puideron!
Sen dúbida foi unha tarde entretida e chea de sorrisos. Con esta actividade demos a benvida ao comezo das actividades extraescolares nas axencias de lectura do municipio, dentro do mes das bibliotecas, que seguiremos a celebrar nos vindeiros días grazas ao programa de animación á lectura Ler Conta Moito.
O pasado 24 de abril, dentro das actividades para celebrar o Día Internacional do Libro, a ALM de Oubiña en Cambados encheuse literalmente de nenos e familiares para dar a benvida a Mowgli e os seus amigos (e inimigos!) da selva.
A través do Programa Ler Conta Moito da Xunta de Galicia puidemos coñecer como, na espesura da selva, vivía o malvado tigre Sherekan que tiña amedrentados a todos os veciños dunha aldea e como Mowgli e os seus amigos viven divertidas experiencias ata que se enfrontan cara a cara a Sherekan e o abaten.
A sesión de Títeres Cachirulo fixo as delicias de todos os asistentes que permaneceron impasibles os 50 minutos da sesión ata o remate. A biblioteca quedouse pequena para todos os que quixeron homenaxear dun xeito tan orixinal as boas historias e os libros.
Séguenos