Se hai unha noticia que colleu protagonismo estes días foi o peche nunha cova dun equipo de nenos tailandeses por mor dunhas inundacións. O rescate, xa conseguido, do equipo e o seu adestrador tivo en albas a medio mundo pola súa complexidade.
Unha das persoas que máis se interesaron e participaron no tema do rescate foi Elon Musk, creador da empresa SpaceX e do que xa falamos en Xente Dixital nalgunha ocasión. Que fixo o multimilonario? Ofrecer ao seu equipo de enxeñeiros para construír a mellor solución para o rescate: un mini submarino.
En tan só dous días, a empresa SpaceX (da que é propietario Elon Musk) foi capaz de construír con tecnoloxía e materiais dos seus foguetes un capsula parecida a un pequeno submarino onde podía caber un neno. A idea era que os nenos, ao non saber mergullar, puidesen ir dentro acompañados de mergulladores expertos e saír así da cova alagada.
Aínda que foron capaces de desenvolvelo en dous días e entegrarlo a Tailandia, o invento non se utilizou por atopar outras solucións máis prácticas e sinxelas para rescatar a todo o equipo. Aínda así, é impresionante o que un equipo preparado é capaz de facer en tan só dous días para axudar a xente que o necesita.