Onte, tivemos o pracer de gozar dunha actividade didáctica ao mesmo tempo que divertida. A rapazada participante estivo inmersa no mundo de Picasso durante o seu desenvolvemento. En primeiro lugar tiveron ocasión de visionar unhas imaxes sobre a vida do artista e sobre a súa obra xa, máis tarde pasaron á parte práctica e seguindo as instrucións dos monitores conseguiron facer e pintar unhas figuras cubistas en cartolina que puideron levar para as súas casas. A actividade foi un éxito e todos os participantes saíron moi contentos.

Dani Blanco, aterrou este xoves pola tarde na Biblioteca Central de Arteixo, tróuxonos moitos contos para a rapazada, nesta ocasión historias chegadas do pais veciño, Portugal, aínda que mesmo parecían galegas pola súa semellanza coas nosas.
Pequenos, pequenas e tamén algún que outro adulto, gozaron durante unha hora, aproximadamente, dunhas viaxes a mundos fantásticos nos que se divertiron moito.

Desta vez, a rapazada de Arteixo veuse sorprendida por unha ratiña que apareceu na biblioteca, era unha das ratiñasda Familia de Lonxedetodo (Trinketrinke). Estivo na Biblioteca Central para agasallarnos co seu espectáculo “Aprendendo a querer”. A través dos seus contos esta ratiña amosuelle a nenos, nenas, pais e nais asistentes á función a importancia de respectarnos os uns aos outros, a establecer unhas relacións afectivas sás, a fuxir dos abusos e saber diferenciar o que está do que está mal.
Nenos e nenas, ademais de pasalo moi ben, viron como algúns dos seus proxenitores se convertían en actores e actrices por uns minutos, todos participaron dun espectáculo moi dinámico e divertido.

Este xoves día 29, estivo na nosa Biblioteca o Mago Teto co seu espectáculo “A maxia dos contos”. Neste espectáculo mistúrase a narrativa de contos e xogos de maxia.  A actividade consta dunha antoloxía de 7 contos que abordan de maneira central a figura do ilusionista, cos seus coellos, cartas e variñas. E por arte de maxia cada conto, vai acompañado dun xogo relacionado coa historia. Porque hai moita maxia na literatura e moita literatura na maxia.
Houbo unha gran afluencia de rapazada que gozou dunha tarde chea de maxia e contos.

Este xoves, 21 de outubro, estivo connosco amenizando a tarde para a rapazada, Xarope Tulú.

A través de diversas historias iremos descubrindo eses mundos invisibles que nos rodean, eses outros xeitos de vivir. Rapazas que soben e baixan escaleiras, bicicletas e parrulos, moitos parrulos. Con este argumento de fondo, foi como Atenea,  seduciu aos cativos e cativas que viñeron á Biblioteca na tarde de hoxe. Ademais de desfrutar das animacións, foron partícipes en todo momento dunhas historias que fixeron as ledicias de todo o público presente.

Esta vez, foi Paula Carballeira quen nos visitou, amenizou a tarde do conto con “Camiños de mar, terra e vento”. Contounos varias historias, a súa forma de narrar, a xestualidade e entoación, fixo  que a rapazada non perdese ollo destas aventuras nas que participaron activamente invitados por Paula.

Onte, 30 de setembro, estivo connosco Proyecto Bululú co seu espectáculo “Contos do revés”, unha forma moi orixinal e divertida de recordar os contos de toda a vida dende outra perspectiva, e aínda que algúns dos participantes parecía non estar moi de acordo con estas novas adaptacións…

…toda a rapazada gozou dunha tarde de contos como fai tempo que non se vía na Biblioteca, soamente había que escoitar a algarabía que procedía da sala infantil.

Onte día 22 de outubro, tivemos un obradoiro de ilustración con Mirari, neste obradoiro de ilustración con papel os participantes experimentaron unha nova técnica de deseñar ilustracións con tesoiras e pegamento ao mesmo tempo escoitaron fragmentos do libro as pitas baixo a choiva de Carbalho Calero, tamén debuxaron, recortaron e pegaron ao tempo ían construíndo un teatro de papel cos seus monicreques para xogar a representar micro escenas.

Este xoves, 15 de outubro, estiveron connosco Ian & Elisa. O seu espectáculo “Historias fabulosas, dous magos e outras cousas: maxia” resultou un éxito facendo que os participantes gozaran dunha tarde entretida e chea de emocións, a interacción entre profesionais e público fixo que a duración da actividade lles soupese a pouco a estes últimos. Esta actividade reune maxia e sombras chinescas usando contos e fábulas como fío conductor.

Este xoves, 8 de outubro, David contounos “A verdadeira historia de Hamelín”. Clown, malabares, participación do público e moito humor son as chaves desta adaptación circense do clásico “O frautista de Hamelín”.
Unha adaptación contemporánea deste clásico fixo que os nenos se divertisen e gozaran dunha hora de risas e bos momentos:
“A aldea de Hamelín foi tomada por unha praga de estraños seres que fan bromas sen fin aos seus habitantes, cando un excéntrico personaxe fai a súa aparición”.