Formas que falan. Títeres de mesa. Mulleres artistas
Un obradoiro de elaboración de títeres de mesa empregando unha técnica sinxela: cinta de pintor e papel de xornal para crear o volume e corda e paus para articulalo.
A través desta actividade Babaluva achega aos asistentes a obra de mulleres artistas e deseñadoras na arte dos títeres.
O Sol de Outono achegounos a historia de Aldara ata Dumbría.
A través da historia da primeira viaxe de Aldara ata a montaña as persoas asistentes tiveron a oportunidade de coñecer parte do patrimonio natural da nosa comarca, cos versos de Pondal de fondo.
Narración oral e música aliáronse para facernos pasar unha mañá entretida e moi educativa.
O xoves 15, dentro do programa Maio de Letras, Galitoon visitou a nosa biblio co espectáculo Os Descontacontos.
Foi un divertido espectáculo que, a través de dous títeres, conseguiu gran interacción e participación do público, que axuda ao avó protagonista a contar os contos clásicos dándolles unha volta e actualizándoos.
Gustou moito.
Da man de Lalá Teatro, coñecemos As Josefas.
Coa lingua galega como fío condutor, e a través da música, lendas e tradición, sérvenlle ao público para aprender máis sobre Galicia.
Unha actuación que resultou moi participativa por parte dos asistentes.
O pasado xoves chegou á nosa biblio a actividade Aprende a facer un podcast!, con Solovoz.
Explicación do concepto de podcast, seguido de diferentes aspectos a ter en conta para realizar un.
O monitor foi guiando ás persoas participantes para chegar a elaborar entre todos un guión e gravar o podcast.
Carballo con Botas, a través da figura dun avó zapateiro, contounos moitas historias coas que os cativos desfrutaron da tarde.
Zapatiños de cartón e a carta dos bosques achega unha sesión de contacontos do máis entretida.
Carballo con botas visitounos a pasada semana na biblioteca de Dumbría.
Entretidísimo contacontos que, xunto co aliciente de poder montar na ciclobiblioteca do Carballo con Botas, fixo as delicias de todos os asistentes.
Recomendable!
O pasado luns, Vero Rilo veu á ALM de Dumbría con E a ti… que che contaban?
Actividade que mestura a tradición oral, coa literatura popular e os libros. Todo isto vestido coa linguaxe de signos e un bo facer da artista que destaca por enriba de todo.
Historias entretidas, divertidas, educativas,… Contos que gustaron aos nenos e nenas de todas as idades.
Desta vez asistiu o alumnado do CEIP Plurilingüe Santa Eulalia de Dumbría ao completo.
Moi, pero que moi recomendable!
OQO Editora visitou a ALM de Dumbría co actividade Coas mans na masa.
Nesta actividade, partindo do conto de Maruxa, e tendo como fío condutor a elaboración da masa do pan, traballaronse contidos relacionados coa igualdade, coas diferencias de xénero, a educación en valores e diferentes aspectos e técnicas artísticas.
Un obradoiro de manualidades do máis entretido!
Na tarde de onte, na ALM de Dumbría asistimos ao espectáculo de Tarabelos “O traxe novo do rei”.
Estupendo espectáculo que se adapta a un abano amplo de idades.
Os pequenos, moi atentos; os maiores, moi enganchados durante todo o relato.
Séguenos