Pablo Díaz chegou á biblioteca de Xermade coa actividade “Contando contos, cantando cores”. Contounos contos como “O libro dos porcos”, ou “Orellas de bolboreta” e cantounos cancións de piratas, xoaniñas….. Cantando e contando, traballando e reflexionando sobre a igualdade de xénero.

O  ilusionista Mago Marco actuou na nosa biblioteca este venres, 27 de setembro, e sorpendeu, convenceu aos 50 asistentes cos seus trucos de maxia interactuando co público en cada un deles. Foi un espectáculo sorprendente cunha viaxe chea de soños e ilusións envoltas de misterio.

O sábado, 21 de setembro, tivemos “A cidade violeta” de Anxo Fariña na biblioteca de Xermade; un obradoiro de ilustración e creatividade para tratar de acadar a igualdade, onde se trataron temáticas como o compartir as tarefas do fogar, a crianza e coidado dos meniñ@s, ou de como son algunhas actitudes da sociedade e de como deberían ser para acabar coa violencia de xénero e chegar á igualdade plena.

Sintonizamos Radio BuleBule na Biblioteca de XermadeActuación chea de música en galego, de cancións pegadizas inspiradas nas ondas da radio

Celebramos o Día das Bibliotecas con esta actividade de contos e ciencia. Nita contou contos como “A estrela de Laura” ou “Un globo vermello” e foi intercalando experimentos para que os nenos e nenas, movidos pola curiosidade, se familiaricen coa ciencia de xeito divertido.

Tivemos na biblioteca de Xermade a Pakolas cun marabilloso espectáculo, onde todos poidemos desfrutar do Rock and roll. Os nenos e nenas poideron bailar, cantar e coñecer instrumentos e obxectos musicais pouco familiares para os máis novos, como o theremín, a guitarra eléctrica…

E ademais Pakolas mostrounos os libros-cd, que leva publicado ata agora na colección Sonárbore da Ed. Galaxia: “Pakolas”, “A gramola Gominola”… Neses libros-cd atopamos “cancións para rockear, para soñar, para non parar de mover o esqueleto e tamén sobre todo, para aprender”.

Carmiña, A Meiga chegou a Xermade para cantar e contar á natureza. Presentounos á súa corva e compartiu a súa sabedoría entre herbas máxicas, contos e animais fantásticos. Encheu a nosa biblio con fermosos contos extraídos da cultura popular galega e os seus conxuros fixéronnos tremer…

Celebramos en Xermade o Dia das Letras Galegas con este obradoiro creativo para achegar ás nenas e nenos a figura de Mª Victoria Moreno. Enrique contou e Carlos ilustrou detalles da vida e da obra da escritora homenaxeada nas Letras Galegas 2018.

Celebramos o Día das Bibliotecas con esta actividade tan doce e apetecible. O cociñeiro e a pasteleira contáronnos a súa historia de amor chea de contos e de mazás asadas. Ao rematar os contos tivemos un obradoiro onde os nenos e nenas elaboraron cadansúa magadalena de pasta de azucre “fondant”.

Leo Leiño fíxonos pasar unha boa tarde de maxia e libros na biblioteca de Xermade. Os asistentes desfrutaron e participaron en cada un dos seus trucos de maxia con ilusión e moita atención. Faloulles do “Principiño”, do “Viaxe ó centro da terra” e doutros moitos libros de calidade e que merece a pena que os rapaces lean. Leonor e Cristina ían enlazando detalles destes e doutros contos, cos seus marabillosos trucos de maxia.