No día de onte veu visitarnos Paco Nogueiras para presentarnos “Son animal”, un espectáculo onde os animais e os seus sons foron os protagonistas das divertidímas cancións que bailaron grandes e cativos.

O público bailou, cantou, saltou e, como non…bruou, piou e imitou a todos os animais que canción tras canción saían deste libro disco que Paco Nogueiras presentou na vila.

Unha actividade moi divertida e recomendable para todas as idades, na que o público participa activamente e desexa repetir.

No día de hoxe estivo en Mondariz Balneario Caxoto co contacontos “¡Levántate Xan!”. Moito nos gusta escoitar as historias de Caxoto, a cativada non perdeu a atención nin un só segundo, bailaron, fixeron os sonidos dos animais…

Unha actividade moi recomendable para a cativada de 0 a 3 anos.

No día de onte achegouse á Biblioteca de Mondariz Balneario o equipo de PeixeSapop para ensinarnos as diferentes técnicas a aplicar para realizar as cianotipias, tanto para maiores como para á cativada. O publico asistente traballou con diferentes materiais, plumas, algas, vexetais…que aplicados xunto cos negativos formaron uns traballos únicos. Aquí tedes unha escolma dos resultados.

Quedamos encantadas e encantados con esta actividade, moi recomendable para todos os públicos.

Onte tivemos o gustazo que contar coa presenza de Alba Farto, debuxante e ilustradora, na bilio de Mondariz Balneario, onde nos ensinou moitísmo contido sobre a arte do deseño de letras co seu “Obradoiro de lettering”.

As participantes deron os primeiros pasos nesta arte empregando diferentes ferramentas para acadar o coñecemento mínimo que lles permita seguir a profundar nas súas casas e desenvolvan a súa creatividade.

Foi unha marabilla ter a Alba con nós e agardamos que pase outro día para profundar nas técnicas do lettering.

Hoxe veu visitarnos Francisco Castro, escritor, editor da editorial Galaxia e músico. A súa proposta foi unha actividade de poesía musicada “Poesiacordes”, que fixo desfrutar ao público asistente dunha escolma de poesías de autoras e autores galegos como Rosalía ou Cunqueiro a ritmo de guitarra. Foi unha marabilla telo aquí, recordando ás autoras e autores que se emitían pola radio, que tiveron un lugar importante na súa infancia e adolescencia.

Agardamos que volva visitarnos moi pronto con outra proposta tan fermosa e vibrante coma esta.

Charo Pita achegouse ate Mondariz Balneario para facer unha contada coa cativada máis pequerrecha da vila.  “Da cabeza aos pés” foi a actividade do programa Ler conta moito coa que brincaron, cantaron,  fixeron rimas e pasaron unha mañá ben divertida.

Quedamos encantadas coa visita de Charo e coa súa contada. Actividade moi recomendable para bebés

Onte veu visitarnos á biblioteca de  Mondariz-Balneario Xoán Curiel para presentarnos o espectáculo “Pobre Poesía”, no que lle pon música e voz ás poesías de autoras galegas como Rosalía, e doutras autoras relevantes doutras latitudes. O público tamén tivo a ocasión de desfrutar do seu disco “Nai”, un traballo poético propio cargado de simboloxía asociada ao feminino.

Unha tarde marabillosa na que o público desfrutou da música e dos poemas, e na que Xoán Curiel fíxonos partícipes da necesidade de visibilización das creadoras.

Hoxe á mañá a cativada máis cativa de Mondariz-Balneario desfrutou ao máximo coa contada de Batucado e Emusín, que nos presentou o conto “Unha tarde especial con Dori” cheo de aventuras, música e moito lucerío. A Dori pasáronlle moitas cousas pola cabeza para celebrar o aniversario da avoa, e todas elas fixeron que o noso público máis pequerrecho non perdese detalle da historia e pasara un rato ben divertido.

Unha mañá diferente para un público moi esixente!!!

Hoxe 13 de setembro veu visitarnos Nuria Vil, e propúxonos realizar un obradoiro de escrita fotográfica. Nel, as persoas que se inscribiron, aprenderon a traballar os relatos curtos e os textos poéticos mediante o uso das fotografías de varias artistas galegas. Todo elo, a través de distintas dinámicas para que agromase a creatividade entre o público asistente.

Aquí vos deixamos unha imaxe do obradoiro, onde podedes ver aos usuarios e usuarias traballando na biblioteca.

O público quedou moi satisfeito cos resultados. Unha actividade moi recomendable para o público xuvenil e adulto.

No día de onte, 22 de setembro o equipo de a nube de artear veu ensinarnos como facer robots coas pezas dos Lego. Faláronos das moitas funcións que actualmente fan os robots, trouxeron un dron e moito material para fabricar o noso propio robot. A cativada desfrutou moitísimo desta actividade e estamos desexando repetir.