Hoxe tivemos no Porriño o espectáculo de narración oral “Elas pintan moito”, que levou a cabo a Compañía Migallas Teatro.

Tratouse dunha sesión de contacontos dirixida a nenos e nenas de entre 4 e 12 anos. A partir da obra de diferentes pintoras e dos elementos que as inspiraron, como Xulia Minguillón, Sonia Delaunay, Frida Khalo e Yayoi Kusama, abordouse a cuestión da igualdade entre homes e mulleres en todos os ámbitos da vida, desde o máis cotián ata a creación artística.

Durante a sesión, as nenas e nenos, alén de coñecer as principais obras destas pintoras, descubriron facetas da súa vida persoal que as converteron en modelos de independencia fronte aos prexuízos machistas da sociedade que as rodeaba. Tamén se animou a de senvolver as capacidades creativas sen ningún tipo de traba e de ideas preconcibidas.

Hoxe celebramos no Porriño o obradoiro “Mulleres revolucionarias”, impartido por Taller Abierto.

Destinado a nenas e nenos de entre 6 e 12 anos, tratábase dun obradoiro de creación plástica a partir da semblanza dunha serie de mulleres da historia da arte, a ciencia e a sociedade que tiveron a forza e a valentía para realizar cousas verdadeiramente impresionantes, loitando pola independencia e a igualdade.

As mulleres constitúen a metade da poboación mundial e a historia da humanidade está chea de mulleres que se atreveron a dar o primeiro paso para que os seus iguais sigan avanzado e rompan os esquemas impostos xeración, tras xeración. Neste obradoiro dímoslle vida a quen axudou a ampliar as fronteiras dos dereitos das mulleres, superando as diferenzas de xénero nun contexto nada doado.

Para iso contamos coa participación de decenas de estudantes do CEIP Plurilingüe Antonio Palacios do Porriño, que participaron activamente nesta actividade para romper as fronteiras de xénero.

O sábado 13 de maio, ás 20:00 horas desenvolveuse o concerto acústico e recital poético de Ela e Dylan. Roger de Flor e Maquinarias Teatro puxeron en marcha “As flores solitarias”, un espectáculo poético, estético e concerto acústico sobre letras de cancións e poemas de Bob Dylan traducidas ao galego. O fío temático da peza é a muller nas letras e na música de Bob Dylan.

O venres 12 de maio, ás 18:00 horas, a compañía Babaluva Teatro usou as ferramentas da narración oral tradicional para dar a coñecer personaxes e historias de Carlos Casares, coa obra “Babacontos con Carlos Casares”, contribuíndo a iniciarse no mundo dos contos e do teatro a través da fantasía, a inventiva e a creación espontánea.

O martes 18 de abril, Yolanda Castaño, sen dúbida un dos rostros máis coñecidos da poesía galega, pon en marcha na nosa biblioteca o seu espectáculo poéticoVisual, cun novo e atractivo xeito de comunicar os seus versos, facéndoos dialogar coa linguaxe audiovisual e as novas tecnoloxías. Ese día asistimos a unha moderna posta en escena, capaz de conectar mesmo con públicos pouco versados no xénero poético, a través dun recitado de textos acompañado pola proxección de breves videopoemas e bases musicais.

Recordemos que Yolanda Castaño é unha das poetisas actuais en galego máis relevantes: máis de vinte anos publicando, e recibindo premios como o Fermín Bouza Brey, o Johán Carballeira de Poesía, o Premio da Crítica, ou o Premio Fundación NovaCaixaGalicia de Poesía. Presentadora de televisión (todos a coñecemos polo “Cifras e Letras” da TVG), crítica literaria en distintos medios, polifacética e multidisciplinar, e comprometida coa dinamización cultural que a levou a pór en práctica distintos proxectos innovadores ao redor da poesía e a expresión artística.

A actividade, con inicio ás 11:45 e unha hora de duración, organizada dentro do programa Ler Conta Moito da Xunta de Galicia, estaba dirixida principalmente á mocidade, idealmente para nenos e nenas de 4 a 14 anos; de feito ese día xa contamos coa presenza os alumnos e alumnas do IES porriñés Pino Manso. Pero destacar que se trataba dunha espectáculo en aberto e para todos os públicos. ¡Foi espectacular!

O día 23 de abril co motivo do día do libro a Biblioteca Municipal do Porriño, levou a cabo un contacontos a traves da compañía “Lisistrata” baixo o lema contando en feminino.

Contos contados dende a perspectiva de xénero e igualdade. Onde o papel feminino sexa, non o tradicional nos contos, senón algo igualitario. Contos tamén onde o final pode cambiar e tamén onde a protagonista non se vexa como algo inferior e sempre coas mesmas identidades.

Durante a semana varios centros educativos da vila redescubriron a biblioteca, por medio de visitas guiadas.

O venres 10 de abril os nenos e nenas de segundo e terceiro de primaria do Porriño C. P. R. Hermanos Quiroga participaron no obradoiro “Verbas creativas” a cargo da empresa Arelar Xestión Educativa esta é unha proposta que procura achegar aos nenos e nenas á lectura e a composición dende unha proposta lúdica, que parte de empregar ferramentas moi motivadoras na construción creativa e compartida, na que eles e elas son os verdadeiros protagonistas do pracer de xogar coas palabras.

O xoves día 9 de abril ás 12:00 horas os alumnos do CEIP Plurilingüe  Antonio Palacios do Porriño  acompañados por alumnos do centro educativo ACEESCA (Asociación Comarcal de Educación Especial Santísimo Cristo del Amor), despois de visitar a biblioteca disfrutaron do contacontos ilustrado “O misterio do Pirata Benito Soto” a cargo da compañía “Polo Correo do Vento”. Unha historia de misterios que mestura a oralidade coa ilustración.

Neste obradoiro impartido pola Asociación de Amigos do Museo Galego da Marioneta de Lalín todos os rapaces de 1º de ESO do IES Pino Manso cooperaron para facer unha adaptación dun conto tradicional para sombras chinesas. Os participantes construíron un teatriño, os personaxes e diferentes elementos da escenografía. Cunha metodoloxía cooperativa, práctica, adaptada ás características dos/as participantes, e, por suposto, lúdica, buscamos que o obradoiro sexa un espazo de liberdade de expresión a partir do diálogo e da realización de experiencias culturais compartidas.

O martes 13 de maio realizamos na biblioteca do Porriño un obradoiro de banda deseñada impartido por Xosé Tomás. O nome do obradoiro era Coñécete a través dos cuadriños, e a través del pretendíase achegar aos rapaces e rapazas a un medio tan complexo e aglutinador ao público a través da implicación persoal.

Deste xeito, traballamos a creación de guións baseados en historias cotiás, da vida mesma, afondando en valores como as relacións humanas saudables, o respecto na convivencia, así como en aspectos como a creatividade e a imaginación. Tamén abordamos a creación de personaxes e as técnicas para facelo, e traballamos os códigos da banda deseñada: as viñetas, as elipses narrativas, a montaxe de páxinas, os planos cinematográficos, etc. Botando man de obras destacadas do mundo da banda deseñada, exemplificáronse as diversas temáticas ás que se poden facer fronte  e como se poden empregar.

Foi unha mañá arredor da banda deseñada, o que fixo as delicias dos rapaces e rapazas que ateigaban a sala de consulta da biblioteca porriñesa.