Boa selección de fragmentos do libro “O Principiño” coa música de dous clarinetes en directo que acentúan as emocións. Sesión moi potente.

“Minguante canta poesía galega” é un proxecto musical en formato dúo que fusiona a literatura e a música para dar vida a poemas clásicos e contemporáneos da cultura galega.

E unha actividade moi animada e entretida; ao público gustoulle moito.                           

 O día 28 de maio, na B.P.M. de Fene celebramos o Día das Letras Galegas co artista Dani Blanco e o seu espectáculo “Circo na Biblioteca”. Dani Blanco sorprendeunos coa súa actuación de malabares con cordas, pelotas, libros, aros, coitelos, … e acompañada pola historia dun gato. Todo apuntaba a que se trataba dunha historia de terror, pero nada que ver. Tanto nenos como maiores non pararon de rir

Continuando coas actividades do Programa de Animación á Lectura e de Dinamización da Lingua Galega de 2026 da Biblioteca Pública Municipal do Concello de Pazos de Borbén – BiblioPazos chegou o pasado Luns 25 de Maio á Biblioteca de Pazos o espectáculo de narración oral “ARREDOR DE OTERO” de Soledad Felloza co que conmemoramos o 50 aniversario do pasamento de Ramón Otero Pedrayo e o DÍA DAS LETRAS GALEGAS 2026.

RAMÓN OTERO PEDRAYO (Ourense, 5 de marzo de 1888- Ourense, 10 de abril de 1976) é unha das grandes figuras da literatura e a cultura galega. Foi un profesor, escritor, xornalista e político galego. Catedrático de Xeografía na Universidade de Santiago de Compostela e membro do grupo Nós e das Irmandades da Fala, participou na coordinación da sección de Xeografía do Seminario de Estudos Galegos. Foi deputado polo Partido Galeguista e membro da Real Academia Galega. A súa obra é unha das máis prolíficas da nosa literatura: cultivou a narrativa, o teatro, o ensaio e a poesía, achegando unha modernización de todos eses xéneros en lingua galega.

“ARREDOR DE OTERO” foi unha sesión de narración oral que bebe da escrita de Ramón Otero Pedrayo, da súa ollada demorada sobre a terra e do seu compromiso cun país pensado e contado dende dentro. Contos que percorren o ano vivido —vendima, castañeira, Santos, Nadal— e devolven á palabra o seu lugar na memoria colectiva; e que propón un achegamento á obra de Ramón Otero Pedrayo desde a narración oral, seguindo o fío da súa escrita fonda e do seu pensamento atento ao país. Os contos acompañan o discorrer do ano vivido, cando a vendima madura o tempo, a castañeira xunta á xente, Santos chama á memoria e o Nadal abre o inverno á palabra compartida. Historias nas que a terra, as voces e o pensamento se recoñecen, e nas que Galicia aparece non como escenario, senón como conciencia, feita de lembranza, rito e fidelidade ao que somos.

Asistiron a este evento o alumnado de Educación Secundaria Obrigatoria do CPI “Curros Enríquez” de Pazos e varios usuarios da Asociación ASPAVI.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

Continuamos coas actividades do Programa de Animación á Lectura e de Dinamización da Lingua Galega de 2026 da Biblioteca Pública Municipal do Concello de Pazos de Borbén – BiblioPazos coas que conmemoramos o DÍA MUNDIAL DO LIBRO E DOS DEREITOS DE AUTOR, que se celebra en todo o mundo o día 23 de Abril de cada ano desde o 15 de novembro de 1995 en que tivo a sua orixe como unha maneira de render unha homenaxe a grandes escritores universais como Miguel de Cervantes, Garcilaso de la Vega, William Shakespeare, Vladimir Nabokov, Josep Pla e Manuel Mejías Vallejo, entre moitos outros; e foi a través da UNESCO que se decretou ese día co obxectivo de fomentar a lectura entre todos os públicos, a cultura e as letras no mundo, ademais de protexer a propiedade do dereito de autor, a iniciativa da Unión Internacional de Editores.

E é que ler axúdanos a coñecer culturas, a viaxar no tempo e a cultivar a nosa mente.

E para conmemorar esta importante data tivemos con nos o pasado Venres día 24 de Abril a partir das 13:00 horas no Auditorio do Concello á actriz, contacontos, fotógrafa e xestora cultural SOLE FELLOZA que nos trouxo o seu espectáculo de narración oral “SERES MÁXICOS DO REINO DE GALICIA”.

Esta actividade forma parte do programa de dinamización da lectura “LER CONTA MOITO” que promove a Direción Xeral de Cultura da Consellería de Cultura, Lingua e Xuventude en colaborción cos concellos que teñan as súas bibliotecas integradas na Rede de Bibliotecas de Galicia.

Asistiron a este evento os usuarios da Asociación ASPAVI e o alumnado de 3º, 5º e 6º de Primaria do CPI “Curros Enríquez” de Pazos.

Houbo un tempo no que coñecer os seres máxicos era imprescindible para entender o mundo. Saber onde vivía o nubeiro, que monte habitaba un xigante ou en que fonte podía aparecer unha moura axudaba a orientarse no territorio, pero tamén na vida. Estes seres formaban parte dun saber compartido, ligado á terra, aos camiños e á memoria do país.

Hoxe moitos destes personaxes convertéronse en nomes alleos para a rapazada, figuras borrosas ou esquecidas. E cando esquecemos os seres que nos explicaban o mundo, empobrecemos o imaxinario colectivo e rompemos un fío esencial coa memoria do Reino de Galicia, coa súa xeografía simbólica e coa tradición oral que a sostivo durante séculos.

Este espectáculo de narración oral propón volver poñerlles voz, corpo e historia a esas criaturas. A partir do Mapa dos Seres Máxicos do Reino de Galicia, creado por Manuel Gago e ilustrado por Leandro Lamas, a palabra falada convértese nun mapa vivo: un espazo escénico onde pousar o dedo e abrir unha historia, onde cada lugar garda unha voz.

Trasnos, meigas, xacias, nubeiros, seres desaparecidos e outros vencellados a illas, montes, fontes ou camiños regresan á oralidade para ser contados de novo, reinventados e compartidos. Porque a tradición oral tamén é unha forma de ecoloxía cultural: o que non se conta, desaparece.

Seres Máxicos do Reino de Galicia é unha invitación a recuperar un imaxinario propio, rico e poderoso, e a facelo dialogar co presente, para que estas figuras deixen de ser reliquias do pasado e volvan acompañarnos no camiño cara ao futuro, como parte viva da identidade e da memoria do país.

Día 24 de outubro de 2025 ás 21:30, biblioteca de Escairón

Celebramos a Semana das Bibliotecas coa actividade do programa Ler conta moito…

Sabes coser? obradoiro de contos sobre igualdade 

da man de Anxo Moure

o 24 de outubro, ás 21:30

Despois de cear, saímos ó patio da biblioteca para recibir a este estrafalario e sorprendente gardador de historias dos bosques e da natureza, que chegou coa súa ciclobiblioteca para contarnos historias da natureza, dos bosques, de seres fantásticos, lendas próximas e historias lonxanas, todas elas falando de igualdade, solidariedade, amor e fantasía.

Escoitamos, cantamos, saltamos, berramos, bailamos e paseamos na caixa de historias da ciclobiblioteca…e tamén guiamos a bicicleta, non só os seres humanos diminutos, se non tamén os máis grandes.

En resume, pasámolo xenial! E rematamos o día de festa cun pequeno espectáculo sorpresa!

Día 24 de outubro de 2025 ás 20:00, biblioteca de Escairón

Celebramos a Semana das Bibliotecas coa actividade do programa Ler conta moito…

Lettering co Cancioneiro Popular Galego

da man de Velaísca

o 24 de outubro, ás 20:00

Despois de viaxar pola galaxia, relaxámonos na nosa terriña galega, e despois de facer un rato de caligrafía de lettering para acostumarnos a facer os trazos, escollemos un verso que nos chamara a atención dos moitos que nos ofrece o cancioneiro tradicional galego.

Fixemos auténticas preciosidades, e rimos con algúns dos inesperados versos. Tamén sabemos que temos moitos cancioneiros tradicionais galegos na biblioteca.

Máxica, sensible, participativa e moi ben traballada  esta sesión de Lore Lavand na que a vida transcorre diante de nos sin deixar a ninguén indiferente. 

O Día das Bibliotecas, fixemos con Tomás, o curso para o deseño de Book Trailers.

Pareceunos moi útil para a promoción dos libros, entre a rapazada.

Este xoves, 23 de outubro, na Biblioteca Municipal Xabier P. Docampo (A Barcala – Cambre) gozamos dunha extraordinaria sesión de contos con imaxes e sons de paxaros.

Ler máis →