As crianzas decoraron as súas mochilas segundo os gustos e a imaxinación de cada unha.

A monitora guiou, aconsellou, atendeu as preguntas e suxestións de todas e con iso fóronse moi contentas de ter asistido e de levar as mochilas para a casa.

Temos que destacar a calidade do material aportado por Patricia, tanto das mochilas en si como do resto de teas e abelorios con que se decoraron.

O carteiro chegou á bilblioteca para entregar cartas de Clementina, de Rosa Caramelo e da protagonista de Eu vou comigo. Mediante estes contos, usando monicreques e animais de papel, as crianzas comprobaron que hai que rexeitar as situacións inadecuadas para a convivencia ou coas que non estamos a gusto.

As crianzas asistentes ao obradoiro que se realizou o mércores 9 de outubro, seguindo as indicacións de Miguel, fixeron figuras de animais de papel e unha caixa para gardalas.

Foi unha maneira entretida de aprender.

O pasado sábado día 5 de outubro, Antía Yáñez estivo na Biblioteca de Meicende Antón Castro ás 11.30 horas.

As crianzas comprenderon que a igualdade non consiste en que os nenos fagan cousas de nenas e viceversa, senón en que todos e todas, gústenos o que nos guste, teñamos cabida no mundo (e neste caso, no patio do colexio).

Antía, coa rapazada, contou o seu conto premiado; “A Reconquista”, e xogou a un xogo moi especial de pelota.

O cociñeiro Antón e a pasteleira Tomasa, o día dous de outubro ás 18.30 h, estiveron na nosa biblioteca e prepararon doces exquisitos (Antón comeu tantos, que colleu un empacho).

Grazas a un libro de receitas, cociñaron unhas madalenas deliciosas que, despois de seren decoradas polas crianzas, resultaron irresistibles.

As coidadoras dun zoo contáronnos dúas historias. Por unha parte, no conto de Ernesto e Clementina atopámonos cos atrancos de Clementina para facer realidade os seus soños, pola outra, Roi e Silo, dous pingüíns macho, queren ser pais. O resto das parellas forman familias, eles non saben como facelo… e ao final, conségueno. Ademáis faláronnos de mulleres que abriron portas en diferentes campos.

O día 24 de outubro, durante unha hora, con pinturas de dedo e seguindo as instrucións de Isabel, as crianzas asistentes ao obradoiro, puxeron en marcha a súa imaxinación e fixeron divertidas composicións. Pintaron gran variedade de obxectos e animais, sendo os protagonistas as bolboretas e os dinosauros, aínda que houbo quen preferiu facer creacións con extraterrestres.

Leo viaxou a países máxicos como India, China e Exipto para aprender trucos de maxia, tamén estivo co Principiño que lle regalou un planeta. Co que aprendeu en cada lugar as crianzas pasárono de marabilla. Tamén foi divertida a granxa que se formou coa intervención da rapazada. Todo estivo acompañado pola música e por efectos especiais que converteron a actividade nunha festa na que os fíos conductores foron os libros.

Bebés (de 1 a 3 anos) e maiores pasárono estupendamente participando de maneira moi activa nesta actividade na que Charo Pita cantou, acompañada de guitarra e de tambor africano, cancións das que tanto a letra como a música son da súa autoría.
Tamén dramatizou O trapiño de Ioké e, mesturando outros contos como Unha eiruga moi larpeira e Pío Pío, teceu unha historia que ten como protagonistas ás campás Dondondirindonga e Dondondirindón e a razón pola que deixan de tocar.

Teatro Calavera da Asociación Teatral Solaz Moraima estivo o día 26 de setembro na nosa Biblioteca. O cociñeiro Antón e a pasteleira Tomasa descobren nun libro a receita para facer o mellor chocolate, iso leva á pasteleira a viaxar ata unha afastada illa, vai remando nunha barca que lle presta Calavera, o pirata. Unha vez que consegue o cacao, fai un chocolate exquisito co que as crianzas envolverán froitas que degustarán nos seus fogares.
A duración foi de 70 minutos.