Obradoiro moi completo no que Iria, de Xogando nas nubes, explica moi ben o que é un libro pop-up e como se fan os mecanismos para facer que as imaxes cobren vida e movemento. Os participantes estiveron moi entretidos creando o seu propio libriño cunha carpetiña de cartolina na que van engadindo as páxinas que van creando cos elementos pop-up. Na primeira hora do obradoiro todos os participantes elaboraron unha cara na que tiveron que recortar, pintar e decorar ao gusto para despois unir e pegar todos os elementos. Na segunda hora algúns fixeron unha bolboreta e outros unha colmea de abellas. Finalmente, pegaron as dúas páxinas e deixaron espazo para seguir creando na casa. O libriño quedou fabuloso e a rapazada moi contenta.

 Este ano na biblioteca de Foz celebramos o día das Letras Galegas con A Xanela do Maxín, que a través do seu espectáculo “A gran viaxe das Letras Galegas” achegounos un pouco máis ás distintas figuras da literatura galega, dende Rosalía de Castro ata Begoña Caamaño. Unha viaxe a través do tempo para coñecer a lingua e a cultura galega. Unha actividade didáctica e moi participativa na que a rapazada se transforma en protagonista.

Na Biblioteca de Foz levamos a cabo unha actividade de lettering que tanto éxito xera na rapazada. Este ano para conmemorar as nosas letras galegas contamos coa actividade “Lettering co cancioneiropopular galego” da man de Velaísca. Os nenos e nenas participantes somerxéronse nas cantigas tradicionais a través da arte creativa do lettering, dándolle cor e forma aos cantares galegos. Para iso apoiáronse en libros presentes na biblioteca coa temática do cancioneiro galego, en especial no libro “Sei cantar e sei bailar” publicado este ano para homenaxear ás cantareiras.

Os nenos e nenas que acudiron ao salón de actos da biblioteca pública de Foz achegáronse un pouquitiño máis á nosa tradición galega, da man da compañía andamiaxe e a súa actividade interactiva “Carmen, a cantareira de aldea” que combina a narración oral e a música. A través da historia de Carme e a súa pandeireta máxica, o público desfrutou dunha experiencia chea de valores e diversión, cantando e xogando cos ritmos de Carme.

Dentro da programación do mes dos libros e das letras tivemos a sorte de contar coa presencia de Gemola que inundou a biblioteca dunha marabillosa enerxía co obradoiro de monicreques. A picaraxada pasou unha tarde moi entretida elaborando un cabaliño de cartón con elementos de papel e arte natural.

O pasado venres 10 de maio inauguramos a programación das letras galegas na biblioteca de Foz co obradoiro “Debuxar letras” impartido por Alba Farto. Unha actividade de lettering moi demandada e con gran aceptación, xa que se cubriron todas as prazas. A picaraxada aprendeu diversas técnicas para crear letras, mesturar cores co uso de pinceis, tintas e rotuladores. Ademáis realizacon os seus propios diseños que puideron levar á casa.

Seguindo coa progamación do mes dos libros e das letras, na biblioteca de Foz pasamos unha tarde moi animada con Esteban Acuña de Tarabelos e a adaptación do conto popular  “O traxe novo do rei”.  Unha interpretación con monicreques marabillosa que consigue captar a atención de todo o público asistente.

Na biblioteca de Foz, pola celebración do día do Libro, pasamos unha tarde moi animada coas historias de Carmen Domech e os seus monstros protagonistas de tres contos.

Na biblioteca de Foz pasamos unha mañá moi animada con Fran Campos de Bandullo Azul e a súa compañeira Filipa. Tanto pequenos e maiores, quedaron encantados coas historias filipantes e os contos musicados desta parella tan divertida. A biblioteca encheuse de risas, alegría e diversión.

Moi boa promoción da biblioteca e da lectura por parte de Fran Campos, quen fixo mención da gran labor das bibliotecas e dos libros tanto ao principio do contacontos como no transcurso da actividade.

A Biblioteca Municipal de Foz, dentro da programación do Mes dos Libros e das Letras, tivo a sorte de contar coa presenza dun lobo moi peculiar que soamentente quere ser feliz. Miguel Guido coa sua guitarra e a súa voz vainos narrando o proceso de como “lobo feliz” a través dos consellos dos animais do bosque  consigue chegar a ese estado de felicidade.  A picaraxada de Foz acompañados dos seus familiares pasaron unha mañá moi divertida cantando e ouveando aos catro ventos co grandísimo lobo feliz.