O venres, 9 de outubro, desfrutamos da Ciencia de Harry Potter de Ceo Aberto na biblioteca de Vilar de Santos.

Unha actividade moi interesante e con moi boa acollida entre os asistentes, na que a través de distintos experimentos, todos eles moi ben explicados por parte de David Ballesteros, puidemos percorrer o mundo creado por J.K. Rowling visto dende o punto de vista científico.

Durante o desenvolvemento desta charla científica, puidemos comprobar canto de realidade hai no relativo á maxia de Harry Potter  e descubrir que cousas dese máxico mundo poderían ser factibles na realidade e cales se quedarían soamente en ficción.

Unha actividade sen dúbida moi recomendable.

Hoxe, 2 de Outubro, recibimos na biblioteca de Vilar de Santos a visita de Leo Leiño con “A maxia de Mary Poppins”.

Unha actividade coa que os nen@s puideron coñecer a unha niñeira máxica que acabou transformándose na auténtica Mary Poppins. Gozaron moito cos trucos e aprenderon  cousas moi útiles, ademais de recoller e cumprir os desexos dos máis pequenos, todo elo sempre fomentando o hábito da lectura.

O pasado venres 25 de Setembro recibimos na B.P.M de Vilar de Santos a Yolanda Castaño coa actividade “Contacontos en verso para nenos e nenas”.

Todos os asistentes, en especial os máis pequenos puideron coñecer mellor o mundo da poesía da man desta coñecida poeta e divertirse moito coas súas rimas.

Unha actividade moi amena e sen dúbida moi recomendable.

O pasado venres 18 de Outubro, os nen@s de Vilar de Santos puideron coñecer as aventuras da pirata Escarlata da man de Marisa Irimia, quen traía na súa maleta uns contos moi divertidos a través dos que transmitiu ós asistentes valores tan importantes como a igualdade.

Xuntos pasamos unha tarde moi divertida e amena.

Os rapaces e rapazas de Vilar de Santos recibiron fai uns días a visita de Dada o duende, que a través dos seus contos transmitiulle ós asistentes valores tan importantes como o traballo en equipo, a igualdade e o respecto polo medioambiente.
Tanto nen@s como adultos desfrutaron moito desta actividade.

O venres 13 de Setembro, visitounos en Vilar de Santos o mago Deimi, co seu espectáculo “A maxia está nos libros”. Pasamos unha tarde moi divertida e amena cos seus trucos, nos que os asistentes puidemos participar activamente. Sen dúbida, unha actuación moi recomendable.

Fai uns días recibimos en Vilar de Santos a visita da Asociación Cultural Morreu o Demo.

A través do seu obradoiro de títeres en igualdade os asistentes puideron crear os seus propios monicreques e propuxeron solucións non violentas para tentar resolver unha situación de desigualdade, representando ó final un pequeno “teatro” cos monicreques creados.

Onte, mércores 06 de Agosto, Sarabela teatro visitou a BPM de Vilar de Santos coa súa obra “Isto non é unha caixa”.

Tanto nen@s como adultos desfrutamos moito da actuación e xuntos, coa ratiña Sofía, fixemos unha viaxe ata a muralla chinesa procurando a resposta a pregunta de quen é o ser máis poderoso do mundo. Para obter dita resposta tamén visitamos, o espazo, o sol….

Unha tarde moi divertida e amena e unha actuación sen dúbida moi recomendable.

O venres, 12 de Xullo de 2019, levouse a cabo nas aforas da BPM de Vilar de Santos, a actividade “Abrabebé” onde os nenos e as nenas máis pequenos gozaron e deixaron voar a súa imaxinación a través dos contos.

Dita actividade resultou moi interesante xa que, Carlos Coira foi traballando a través dos sentidos distintos momentos da vida cotiá mantendo ás crianzas moi atentas ata o final da actuación.

Os nenos e nenas pasaron un momento moi agradable e tranquilo e puideron manipular eles mesmos os distintos contos que se empregaron para a actuación.

Onte, mércores 19 de setembro, visitounos en Vilar de Santos Antía Yáñez con “Rescate na biblioteca”, onde nen@s a través de distintas pistas relacionadas con diferentes libros e autores puideron atopar a chave para abrir un cofre no que aparecería unha sorpresa.
Un bo xeito de fomentar o traballo en equipo para a consecución dun obxetivo común e a vez de coñecer distintos autores e libros.