Este pasado mércores 5 de xullo, tivemos unha actividade moi creativa e ben feitiña. Da man de Animar-t levouse a cabo un obradoiro de chapas, onde cativos e maiores puseron en marcha a súa creatividade e o seu compromiso coa igualdade. Pasámolo pipa…

Atenea García contou e teatralizou un puñado de contos ben coñecidos e fixo pasar a cativos e maiores unha tarde do máis divertida.

Da man destas dúas aventureiras fomos coñecendo os personaxes de coñecidos contos como “11 damas atrevidas”, “Teresa non quere ser princesa”, “Bieito e o seu carriño”, “Unllas de cores” e “Monstro Rosa” e xuntos descubrimos un gran tesouro, que somos diferentes e isto é o máis divertido.

Esta vez, O Mago Paco presentounos unha morea de contos e historias a través de xogos e da maxia, que levaron a cativos e maiores a descubrir a “maxia divertida” que agochan os contos. Desta volta, este peculiar personaxe, argallou novas maxias engadindo a risa como elemento principal para sorprender o seu público. Unha proposta pouco convencional para traballar os contos, pero moi, moi divertida!!!

Obradoiro no que aprendemos a facer un cesto con papel reciclado seguindo as técnicas tradicionais da cestería.

Un fantástico obradoiro que conciencia aos mais cativos sobre o valor da reciclaxe e o medioambiente ao tempo que desenvolve actitudes de respecto ao noso patrimonio cultural intanxible, en concreto aos nosos oficios tradicionais, actualizando a cestería do trenzado de palla co uso de novos materiais máis accesibles e sostibles como o papel.

Unha científica rusa e o seu axudante puxeron a funcionar a súa máquina do tempo e aprendemos unha chea… coñecemos grandes personaxes da historia e o máis importante, sen parar de rir. Unha tarde fantástica que nos fiexeron pasar a cativos e maiores.

A señora Antonia chegou á biblioteca de Aldán co seu  sombreiro picudo, nariz afiada, verruga no rostro, a costa encurvada, andar decidido e saia morada. E contounos unha chea de contos de bandidos, pantasmas, morcegos e almas, facendonos pasar unha tarde chea de humor, amor e terorrrrr.

Un contacontos teatralizado con monicreques e diferentes personaxes, que interactuan co contador, facendo deste espectáculo, unha experiencia divertida e abraiante, para cativ@s e maiores. Ademáis coñeceron os diferentes personaxes mitolóxicos das provincias galegas. Unha ledicia de tarde… Grazas Barafunda!

A bandoleira máis temida da contorna, Pepa a Loba, chega á biblioteca de Aldán buscando refuxio. Máis tamén ven chea de contos e fantásticas aventuras.

Grazas a Cristina Collazo e ao seu alter ego, cativos e maiores pasamos unha tarde moi divertida.

Unha tarde do máis divertida, da man de Teatro de Marionetas Trécola. Os cativ@s pasáronno en grande coas historias da lúa.

Sempre moi participativos e colaborando en todo o que se lles pedía, coma sempre, un pracer contar con vós familias!!!