O pasado sábado 15 de setembro Yolanda Castaño estivo na biblioteca municipal de Lalín achegando os/as máis cativos e cativas ao mundo da poesía a través do seu poemario infantil Coller as rendas (Xerais). Unha sesión chea de agarimo e palabra, na que a poeta interactuou cos/as asistentes dunha maneira didáctica e lúdica e na que nenos e nenas puideron percibir que a poesía está en todo; está en todos/as.

Fotografía: Alberto Pombo.

O pasado 11 de agosto a biblioteca municipal “Varela Jácome” de Lalín, dentro do programa “Ler conta moito”, contou coa actuación de Cristina Collazo, quen fixo rir a maiores e pequenas/os a través das súas historias e dos seus xogos. Un espectáculo moi especial que rematou cunha ensinanza fundamental: nós mesmos e mesmas somos o máis marabilloso do mundo.

O pasado sábado 14 de xullo a biblioteca municipal “Varela Jácome” de Lalín acolleu a primeira actividade dentro do programa “Ler conta moito”. O “Gran xogo sobre as Letras Galegas”, de Eduvía, fixo desfrutar a grandes e pequenos/as a través dunha proposta dinámica e eduvativa coa que puideron descubrir algo máis sobre as nosas Letras.

Con motivo do Día das Bibliotecas Escolares e mais do Día da Ciencia en Galego, a Biblioteca Municipal “Varela Jácome” de Lalín acolleu o pasado 21 de outubro a actividade “A ciencia é divertida”, de Nita, dentro do programa da Xunta de Galicia “Ler Conta Moito”. Foron dúas quendas, a primeira para nenos e nenas de 2 a 5 anos, e a segunda para cativos e cativas de 6 a 9 anos; en total, 41 rapaces e rapazas puideron experimentar como a ciencia está presente na súa vida e foron capaces de comprobar que o proceso de aprendizaxe pode ser tamén un proceso divertido.

Os días 4, 11, 18 e 26 de xullo ás 17:00, nenos e nenas de 7 a 12 anos puideron desfrutar do obradoiro “Bibliotecas animadas” de Gargallando. Fotografías, gravacións e debuxos foron os elementos cos que puideron experimentar os rapaces e rapazas asistentes quen, a partir dun conto, debuxaban e coloreaban os personaxes do mesmo.

Unha experiencia que, dende logo, non esquecerán, pois grazas a estes obradoiros puideron traballar a súa propia creatividade a través, non só do debuxo, senón tamén da creación de imaxes en movemento.

María Canosa na biblioteca municipal de Lalín

O pasado 27 de xuño ás 17:30 a biblioteca municipal “Varela Jácome” de Lalín acolleu a actividade “Perder o medo a través da poesía”, dentro do programa “Ler Conta Moito” da Xunta de Galicia.

María Canosa na biblioteca municipal de Lalín

A actividade, orientada a nenos e nenas de 3 a 6 anos foi impartida por María Canosa, quen narra dende a perspectiva dunha nena como foi capaz de desfacerse dos seus temores a través da poesía. Así pois, a narradora, mediante a lectura de varios poemas, tratou os diversos medos aos que polo xeral se enfrontan os máis cativos e cativas para que, finalmente, poidan darse conta de que existen moitas razóns para eliminar eses receos.

O pasado 13 de maio a biblioteca pública “Varela Jácome” de Lalín acolleu, co gallo do mes das Letras Galegas, “Unha viaxe ao mundo de Carlos Casares”, de Soledad Felloza. Incluída dentro do programa “Ler conta moito”, nesta actividade para nenos e nenas de 4 a 11 anos as persoas asistentes puideron achegarse máis de cheo á figura de Carlos Casares, homenaxeado este ano no Día das Letras Galegas. Durante case unha hora nenos/as e maiores gozaron das marabillosas historias que a contadora lles transmitiu, un percorrido por un universo creado a partir de feitos cotiás que non deixou indiferente a ninguén.

Seisdedos presenta na Biblioteca Pública Municipal de  Lalín o seu espectáculo ” As marionetas do mundo e os mundos de Barriga Verde”. Un gran número de cativos participaron e disfrutaron desta actividade.