Carmen Domech visitou a biblioteca municipal de Brión (A Coruña) para presentarnos  “Contacontos de libros contentos”, un espectáculo de animación dirixido a nenos e nenas maiores de 4 anos. Carmen chegou coa súa maleta baixo o brazo. Nela, libros de todo tipo viaxan cargados de historias para contar a todos os nenos e nenas que atopan alí onde fan un alto no camiño.

O serán lúdico celebrouse o xoves 21 de abril ás 18:00 h., prolongándose aproximadamente durante 50 min. Trinta meniños e arredor de quince adultos, asistiron ao espectáculo, que tivo coma escenario a sala infantil da biblioteca municipal. A actividade conmemora por adiantado a celebración do Día do Libro, o sábado 23 de abril, e foi programada pola biblioteca municipal co patrocinio do programa “Ler conta moito” da Rede de Bibliotecas de Galicia.