O pasado venres pasamos unha tarde divertidísima na Axencia de Lectura Municipal de Carnota con Pérez & Fernández. “A tortoise, un can, two monsters e un pícnic” é un espectáculo de narración oral en galego e en inglés, repleto de humor, que aborda temas como a empatía a solidariedade e o amor.
O pasado venres, 25 de outubro, a ALM de Carnota acolleu o espectáculo O ratiño presumido, da compañía Trinke Trinke. Co rato Fuco e mais coa súa amifa Faifá, chegados de Lonxedetodo, e coa colaboración de mamás e papás, desfrutamos dunha tarde de contos que, de forma sinxela e divertida, afondan na educación non sexista e na ruptura dos estereotipos de xénero.
O pasado venres, 18 de outubro, a ALM de Carnota acolleu o espectáculo Xogo revolto, de Teatro de Marionetas Trécola; unha montaxe de gran contido educativo que aborda, dun xeito sinxelo e dende unha perspectiva lúdica, cuestión como a educación emocional, a resolución pacífica de conflitos, o respecto cara aos demais e os estereotipos de xénero.
O pasado mércores, Mere Clown visitou a Axencia de Lectura Municipal de Carnota cun clarísimo obxectivo: desvelarnos a verdadeira historia de Hamelín. E fíxoo cun espectáculo repleto de humor, clown, malabares e infinidade de xogos, en constante interacción co público asistente.
O humor, a improvisación e a participación do público son as claves desta adaptación circense do conto clásico.
En Carnota xa todos sabemos do que realmente aconteceu en Hamelín… E animámosvos a descubrilo!
O pasado mércores recibimos na ALM de Carnota a Fran Campos, de Bandullo Azul, acompañado dunha convidada especial: a súa amiga Filipa! De regreso dunha longa viaxe en globo polo mundo, Filipa compartiu connosco un feixe de historias que traía na súa maleta, e Fran completou a contada coa terrorífica historia da Figueira de Pelostortos e con divertidos contos acumulativos acompañados de música en directo. Pasámolo en grande!
O pasado mércores viaxamos con Sarabela Teatro e a ratiña Sofía ata a muralla chinesa para tratar de resolver un grande enigma… Quen é o ser máis poderoso do mundo?
A maxia da palabra e o poder da expresividade, sen moito máis adobío, son as armas empregadas neste espectáculo para somerxer o público na trama. E vaia se funcionaron!
Isto non é unha caixa é unha montaxe máis que recomendable para fomentar a creatividade e a fantasía nos máis pequenos. Que ben o pasamos! Imaxinación ao Poder!
Que en Carnota somos superfans de Pablísimo non é novidade ningunha. Confirmadísimo!
O pasado mércores gozamos a máis non poder cos seus Contos con ovos, un conxunto de historias breves vertebradas arredor dos ovos e do que sae deles. Unha contada dinámica e orixinal, enriquecida cunha coidada escolla de materiais e coa mestría do narrador que, novamente, fascinou a xente miúda, e a menos miúda tamén, dende o minuto cero.
Será posible que sempre nos deixe con gana de máis? Pois si… é posible!
O pasado mércores, o mago Javier Muro e os seus pequenos e pequenas aprendices inundaron de maxia a ALM de Carnota, co espectáculo Xogando coas palabras. O factor sorpresa e o humor son son dúas das claves deste espectáculo de maxia infantil, creado a partir de palabras e números elixidos ao chou, co público como auténtico protagonista.
O pasado mércores, 22 de agosto, o Mago Paco volveu encher de maxia a ALM de Carnota, nesta ocasión con Maxia Divertida 2.0, un espectáculo repletiño de sorpresas, que combina contos, xogos, maxia e moitísimo humor.
Quedamos con gana de máis!
O pasado mércores Migallas Teatro trouxo á ALM de Carnota o espectáculo “Canta connosco!” baseado no seu xa mítico disco, reeditado por Kalandraka. Moito desfrutamos, grandes e cativos/as! En Carnota somos superfans!
Séguenos