O pasado 13 de agosto a Axencia de Lectura Municipal de Carnota acolleu a función “Conto Espress”, de Sarabela Teatro.

O pasado 6 de agosto, Caxoto visitou a Axencia de Lectura Municipal de Carnota cos seus “Contos de medo que deixan durmir”, historias cheas de misterio e aventuras, con finais sorprendentes, para aprender a rirnos dos nosos propios medos.

Teatro Calavera recalou en Carnota o pasado 30 de xullo coa función “O cociñeiro Antón e a pasteleira Tomasa”, unha divertida peza de teatro infantil que se complementou cun obradoiro de pasta de azucre.

O 23 de xullo o salón de actos do Concello de Carnota acolleu o espectáculo  “O traxe novo do rei”, unha divertida adaptación do conto clásico de Anderesen, da man de Tarabelos, que engaiolou a pequenos e a maiores.

Lili Gruyère , unha ratiña de biblioteca amante dos libros, deleitou as nenas e nenos carnotáns cos seus dotes artísticos e culinarios. Dende a aldea de Lonxedetodo, tróuxonos  divertidas historias, protagonizadas por personaxes sorprendentes, e preparounos un menú saudable e creativo, capaz de curar todos os males.

O venres, 1 de agosto, Xanela Ocio trouxo a Carnota un feixe de contos ao revés, narracións clásicas revisadas, con inversión dos roles tradicionais, orientadas a fomentar a igualdade e o respecto aos demais entre os máis pequenos.

O 11 de xullo a compañía Elefante Elegante representou en Carnota o espectáculo Lobo Bobo ante un nutrido grupo de nenas e nenos acompañados dos seus familiares.

Un lobo pacifista e vexetariano e unha malvada madrasta, que acaba convertida nun adorable porquiño, fixeron as delicias dos máis pequenos, nesta divertida e sorprendente revisión dalgúns contos clásicos ben coñecidos por todos, coma Brancaneves ou Carapuchiña vermella, da man de Gonçalo Guerreiro.

O pasado 4 de xullo, o salón de actos do Concello de Carnota acolleu o espectáculo Contiario,  unha sucesión de pequenas historias orixinais, sorprendentes e divertidas narradas con dinamismo e mestría por Pablo Sánchez, que engaiolou a pequenos e adultos dende o minuto cero.

O pasado venres, 9 de agosto,  nenos/as e maiores gozamos en Carnota co espectáculo Príncipas e princesos, unha divertidísima sesión de contacontos a cargo de Pablísimo. O contador, botando man de diferentes recursos teatrais coma o kamishibai ou  monicreques, achegounos unha reflexión sobre a igualdade de xénero, mediante a narración de contos atípicos con cambios de rol e inversión dos papeis tradicionais.

Rematamos a sesión cun conto musical, cuxa banda sonora correu por conta do público, que con mestría fixo soar unha morea de instrumentos insólitos.

 A actividade tivo lugar o 02/08/2013 no salón de actos do Concello de Carnota, a escasos metros da axencia de lectura. Trátase dun espectáculo de  aventuras interactivo que recrea a amizade entre un aviador e un moucho que detesta a luz do sol, polo que os dous personaxes intentan facelo desaparecer, ata que se decatan de que a vida sen sol non é posible. Todo isto acompañado dunha rica posta en escena e grandes doses de humor.