Estes días na biblioteca realizouse un obradoiro do máis interesante
que logrou despertar o interese dos máis cativos. Minia Regos
ensinoulles a divertida técnica de stopmotion. Eles mesmos tiveron que
inventar unha historia e moldear en plastilina os personaxes para logo
pasar a traballar coa cámara e lograr que a imaxe se “movera”. Unha
técnica sorprendente que os deixou abraiados!

Por medio da técnica de animación denominada “StopMotion”, os nenos e nenas conectan co mundo da literatura e do cinema:
O primeiro día elixiron a historia que ían contar buscando nos libros da biblioteca e inventando tamén parte da historia.
O segundo día adicáronse a crear as personaxes con plastilina, cartolina, etc. Na seguinte sesión crearon os escenarios da historia. Por último fixeron as fotografías e engadiron os sons do conto.

Unha actividade moi completa e entretida¡

Catro voluntarios servíronnos de modelos para que Montse a través de coplas e de poesías nos fose ensinando cal era a vestimenta tradicional na nosa terra, tanto para ir traballar no monte como para os días de festa. Ensinounos os materiais tan diferentes co que estaban feitos, algúns tan ásperos como a la e o liño, e a súa procedencia, as xoias que lucían as mulleres e os homes nas ocasións especiais e como nisto había diferencias sociais. En fin, unha morea de detalles sobre a forma de vida dos nosos tataravós.
Os asistentes puideron ver como é a planta do liño, tocar telas antigas de la (máis de 120 anos) e como é o tacto do liño menos traballado. E por último facerse unha foto co traxe elixido.

Contada dramatizada de contos breves nos que a rapazada tivo a oportunidade de participar activamente representando as escenas que se ían narrando. A través deles fomos espantando ou afrontando diferentes medos (á soidade, ao noso propio nome,…) e por se aínda nos quedaba algún puidemos escribilos nun papeliño para que Vicky o levara ben lonxe.
Foi unha actividade moi interesante e a selección dos contos e a maneira de narralos e representalos moi axeitada, captando a atención da rapazada dende o primeiro momento. 

Con esta proposta Ana Hermida fomenta unha educación en igualdade e para a igualdade, partindo do feito das diferenzas de sexos pero loitando contra os estereotipos que establecen para cada sexo distintos papeis, actitudes, comportamentos e características. Avoga pola igualdade de dereitos, responsabilidades e oportunidades tanto para homes como para mulleres. Todo isto, a través de contos como: “A historia dos bonobos con lentes”, “Maruxa”, “Rosa Caramelo”, “Artur e Clementina” ou “Unha Feliz catástrofe”. Mediante estes contos os nenos/as ven de maneira máis clara a discriminación e os abusos, e se conciencian de loitar contra estes comportamentos deplorables.

O día 25 tivemos unha sesión de maxia e contos no Centro Sociocultural As Fontiñas. Leo Leíño veunos a contar a súa aprendizaxe de maga por moitos países do mundo onde lle foron agasallando e ensinando trucos divertidísimos. Os nenos e nenas que asistiron quedaron engaiolados coa actuación, participando en moitos dos xogos.

O venres 20 de maio no Centro sociocultural de Vite lembramos a Manuel María co contacontos “O bigote de Mimí”.  A actividade consistiu na narración dunha serie de contos, entre eles “O bigota de Mimí”, para lembrar a Manuel María. Fátima Fernández Gómez achegou este popular conto do poeta chairego ós máis pequenos dun xeito moi divertido.

Contacontos en homenaxe a Manuel María “O poeta do Miño” simultaneando a narración coa ilustración da historia no que se fixo partícipes aos nenos e nenas requerindo a súa colavoración en diferentes momentos do espectáculo. A actividade rematou co debuxo dunha caricatura do autor por parte de todos os/as participantes, guiada polo ilustrador. Foi unha actividade moi interesante que permitiu aos asistentes afondar na figura de Manuel María de xeito ameno e divertido. As reacción do público foron moi positivas, participando de xeito activo en todo momento e disfrutando moito da xornada.

Minia Regos realizou coas quince rapazas e rapaces asistentes ó obradoiro unha actividade consistente na realización de pequenas curtametraxes mediante montaxes fotográficas coa utilización de diferentes técnicas (modelado de personaxes de plastilina, cartolina,…) durantes os catro primeiros sábados do mes de abril. Foi unha actividade completísima na que a rapazada tivo a oportunidade de desenvolver diferentes destrezas coma a creación literaria, a imaxinación, a capacidade de síntese, a creatividade, estratexias de ilustración e deseño de personaxes, gravación de voces e sons,…
Minia conduciu a actividade dun xeito ameno e divertido e os nenos e nenas disfrutaron e aprenderon moito.

No día do libro os nenos que se achegaron ó CSC de Santa Marta de Santiago cociñaron un caldo de letras; onde ten un papel moi destacado o público, xa que son eles mediante a colaboración da monitora os que van creando historias a partir das letras do alfabeto. A entoación tamén xoga un papel destacado: puidemos ver como muda de significado a mesma palabra dependendo de como se diga. E para rematar o caldo fixeron a inicial dos nosos nomes con limpapipas. Había tanta xente que non se puido facer na biblioteca, houbo que facelo na Sala Magán do Centro.