Os ratos de Lonxedetodo estiveron na Axencia de Lectura de San Vicente para entreter a todos os asistentes con contos, cancións e bailes.

Promover hábitos saudables na alimentación desde os contos e fomentar o uso da biblioteca e a lectura, son os obxectivos de “Aventuras na Cociña”, contacontos teatral protagonizado polos Ratos da Biblioteca.

Ao final todos os asistentes cantaron e bailaron ao ritmo das cancións de Lonxedetodo.

O venres 27 de marzo a biblioteca municipal celebrou o Día Mundial do Teatro co “Misterio do pirata Benito Soto”, unha actividade de dinamización dirixida a nenas e nenos a partires de tres anos de idade. Unha historia de misterios homenaxe a Sir Arthur Conan Doyle e ao patrimonio galego, que mesturou a oralidade coa ilustración, interactuando cos pequenos a través dun obradoiro de debuxo.

O encargado deste divertido conta contos foi “Polo Correo do Vento”, un colectivo especializado en actividades de promoción da lectura, comprensión oral en galego e desenvolvemento da creatividade e expresión artística das nenas e nenos. O serán lúdico, organizado pola BPM de Brión a través do programa da Rede de Biblioteca de Galicia “Ler conta moito”, acadou unha elevada de asistencia, cunha participación de arredor de 50 persoas, entre nenos e país.

 O xoves 26 de marzo  ás 18 h.   nenos e nenas  disfrutaron durante 45 minutos do espectáculo “Comelibros” de Matapiollos Teatro no que contaron unha historia sobre as bibliotecas e os bibliotecarios e de xeito moi simpático recordaron as normas e actitudes que se deben ter na biblioteca.

Historias contadas dende a perspectiva de xénero e igualdade,  para ir concienciando ao público máis novo, onde o rol feminino sexa, non o tradicional nos contos, senón algo igualitario.

Xogando e contando, apréndese a formar en igualdade e ponse de manifesto que os principes azuis non existen xa que destiñen.

Na Biblioteca Municipal de Quiroga  empezamos a desenvolver o  Programa “Ler Conta Moito”  coa celebración do Día da Poesía o pasado sábado día 21. A actividade  escollida foi “Máxicos Sons, Unha aventura entre libros” a cargo de Álvaro Muras e Martín Camiña.

Resultou unha actividade moi atractiva para o  público asistente ,que superou as 50 persoas. Aínda que estaba pensada para nenos e nenas, os adultos acompañantes disfrutaron moito por ser un espectáculo entretido, dinámico e participativo.

Ao deseño  da actividade para  fomentar a lectura e tamén de dinamizar as Bibliotecas  hai que engadir a profesionalidade de Álvaro e Martín.

O pasado venres visitounos na biblioteca, o gran Pablísimo para presentarnos o seu último espectáculo, “Contiario”, unha sesión de contos dinámica, divertida e sorprendente na que os asistentes participaron plenamente e acompañaron a Pablo no seu percorrido por marabillosas historias.  Xenial!!!

Un lubrigante

moi elegante

botouse adiante:

quixo aprender.

Que non se espante

quen non aguante

que un bo marisco

aprenda a ler…   “Coller as rendas”.  Grazas Yolanda, polo teu sorriso e pola túa creatividade poética que entretivo e causou entusiasmo entre os nenos e nenas que asistiron ao encontro cunha poetisa sorprendente.

Dende a Biblioteca unha guía de lectura de “Poesía, rimas e cancións” no Día da Poesía:

Grazas o programa de animación á lectura nas bibliotecas “Ler conta moito”,  puidemos unha vez máis na Biblioteca Municipal Os Rosales achegar ás nosas familias  á música en vivo e en directo.

Magín Blanco na Biblioteca Municipal Os Rosales

Nesta ocasión o noso invitado foi Magín Blanco, compositor, músico e escritor de “A nena e o Grilo”, “A nena e o Grilo nun barquiño”,“Gatuxo”… que nos invítou a deixarnos invadir polos contos que nacen da música das súas cancións. “Cancións pensadas para nenos, nenas, pais, nais, tíos, tías, avós, avóas… e para calquera con ganas de ter os oídos ben abertos a melodías alegres, letras positivas e a ritmos que invitan a moverse e a bailar.” Coma sempre un pracer.

 O xoves 12 de marzo ás 18 horas Fátima Fernández  fixo unha sesión de contacontos  moi amena intercalando cancións tradicionais. Os máis  pequeniños disfrutaron e cantaron con ela  o final da sesión.

Elefante Elegante achegou, na tarde do sábado 14 de marzo,  ata a Biblioteca Municipal do Grove o seu espectáculo “Lobo Bobo”.

 O numeroso público asistente gozou dun divertido espectáculo no que se mesturaban conocidísimos contos clásicos. Deste xeito distintos personaxes como Carapuchiña, os tres porquiños, Branca de neve… esquecían o seu papel clásico e protagonizaban  curiosas escenas que sorprendían e mantiñan en vilo á rapazada e aos seus familiares ata o final.

 Unha tarde de sábado na compañía de GonÇalo tan amena e divertida que ao rematar o público non se quería levantar porque querían máis.