O martes 13 de maio realizamos na biblioteca do Porriño un obradoiro de banda deseñada impartido por Xosé Tomás. O nome do obradoiro era Coñécete a través dos cuadriños, e a través del pretendíase achegar aos rapaces e rapazas a un medio tan complexo e aglutinador ao público a través da implicación persoal.

Deste xeito, traballamos a creación de guións baseados en historias cotiás, da vida mesma, afondando en valores como as relacións humanas saudables, o respecto na convivencia, así como en aspectos como a creatividade e a imaginación. Tamén abordamos a creación de personaxes e as técnicas para facelo, e traballamos os códigos da banda deseñada: as viñetas, as elipses narrativas, a montaxe de páxinas, os planos cinematográficos, etc. Botando man de obras destacadas do mundo da banda deseñada, exemplificáronse as diversas temáticas ás que se poden facer fronte  e como se poden empregar.

Foi unha mañá arredor da banda deseñada, o que fixo as delicias dos rapaces e rapazas que ateigaban a sala de consulta da biblioteca porriñesa.

O martes 13 de maio un grupo de nenos e pais participaron das divertidas historias do Lobo bobo na Biblioteca Pública Municipal de Caldas de Reis a cargo da Compañía Elefante Elegante.

O pasado mércores 7 de maio celebrouse na Biblioteca do Mosteiro unha estupenda sesión de contos, música e danza da man de Raquél Galavís e Mato Armada co nome de Cantacontos. Máis de medio cento de nenos e pais gozaron do espectáculo cos contos e cancións de Elvis ou dos Chivos chivóns. 

Magín Blanco animou a nenos e grandes coas suas cancións e cos contos Rosalía pequeniña, María Fumaca na Biblioteca de Cabana de Bergantiños

Coa acticvidade Mamá e Papá nos audiolibros. Obradoiro de gravación de audiolibros infantís”,  crearonse espazos de divertimento, lectura e expresión oral e corporal. O próximo día dez de maio crearase na biblioteca un audioconto coa participación de nenos e adultos.

O día  25 de abril  na B.P.M VALDOVIÑO o grupo SARABELA TEATRO  interpretou “CONTO ESPRESS”, un contacontos interactivo con música e danza  que puxo punto e final as actividades infantís con motivo do Día do Libro.  Gran participación infantil. Moi recomendable.

O pasado 2 de abril tivo lugar na Biblioteca Municipal de Meis a actuación de Charo Pita e Javier Fernández co seu espectáculo “Palabras Percuditas” no que mesturaron contos e músicas usando diversos instrumentos de percusión. Acudiron medio cento de nenos e nenas que gozaron escoitando e bailando na compaña destes grandes artistas.

O día 23 de abril levouse a cabo a actividade Contos para un caldiño de Baobab Teatro na biblioteca de Silleda.

Andrea, a “cociñeira” de este caldiño tan particular foi a condutora do espectáculo no que guiou ós/ás nenos/as na procura duns ingredientes especiais: os sentidos, co fin de desfrutar dos contos propostos.

A actividade estivo orientada ós/ás cativos/as de 3 a 10 anos dos colexios da zona, que participaron activamente nunha xornada lúdica xunto cos mestres/as.

O 23 de abril de 2014, coincidindo coa festividade do Día Internacional do Libro, na Biblioteca do Porriño fixemos unha actividade contando coa colaboración do colectivo Gargallando. Creouse un ambiente participativo entre os rapaces e rapazas, o que fixo que dende a Sala Infantil e Xuvenil da biblioteca as palabras e a imaxinación tomaran protagonismo e os nenos tiveran a oportunidade de tomar decisións responsables respectando aos seus compañeiros e compañeiras. Foi unha festa dos libros e da lectura, onde cobrou grande importancia a disciplina da ilustración e do acompañamento visual do texto escrito, realizando un achegamento ao mundo do libro ilustrado dende diferentes aspectos. Os rapaces e rapazas traballaron arreo sendo dirixidos por Gargallando, e foron obxecto da capacidade educativa do proceso de creación do libro dende distintas perspectivas, e a través da observación, da colaboración e do xogo.

Qué mellor modo de celebrar o Día do Libro que converter aos rapaces en autores das súas propias experiencias bibliográficas!