Continuamos coas actividades do Programa de Animación á Lectura e de Dinamización da Lingua Galega de 2026 da Biblioteca Pública Municipal do Concello de Pazos de Borbén – BiblioPazos coas que conmemoramos o DÍA MUNDIAL DO LIBRO E DOS DEREITOS DE AUTOR, que se celebra en todo o mundo o día 23 de Abril de cada ano desde o 15 de novembro de 1995 en que tivo a sua orixe como unha maneira de render unha homenaxe a grandes escritores universais como Miguel de Cervantes, Garcilaso de la Vega, William Shakespeare, Vladimir Nabokov, Josep Pla e Manuel Mejías Vallejo, entre moitos outros; e foi a través da UNESCO que se decretou ese día co obxectivo de fomentar a lectura entre todos os públicos, a cultura e as letras no mundo, ademais de protexer a propiedade do dereito de autor, a iniciativa da Unión Internacional de Editores.

E é que ler axúdanos a coñecer culturas, a viaxar no tempo e a cultivar a nosa mente.

E para conmemorar esta importante data tivemos con nos o pasado Venres día 24 de Abril a partir das 13:00 horas no Auditorio do Concello á actriz, contacontos, fotógrafa e xestora cultural SOLE FELLOZA que nos trouxo o seu espectáculo de narración oral “SERES MÁXICOS DO REINO DE GALICIA”.

Esta actividade forma parte do programa de dinamización da lectura “LER CONTA MOITO” que promove a Direción Xeral de Cultura da Consellería de Cultura, Lingua e Xuventude en colaborción cos concellos que teñan as súas bibliotecas integradas na Rede de Bibliotecas de Galicia.

Asistiron a este evento os usuarios da Asociación ASPAVI e o alumnado de 3º, 5º e 6º de Primaria do CPI “Curros Enríquez” de Pazos.

Houbo un tempo no que coñecer os seres máxicos era imprescindible para entender o mundo. Saber onde vivía o nubeiro, que monte habitaba un xigante ou en que fonte podía aparecer unha moura axudaba a orientarse no territorio, pero tamén na vida. Estes seres formaban parte dun saber compartido, ligado á terra, aos camiños e á memoria do país.

Hoxe moitos destes personaxes convertéronse en nomes alleos para a rapazada, figuras borrosas ou esquecidas. E cando esquecemos os seres que nos explicaban o mundo, empobrecemos o imaxinario colectivo e rompemos un fío esencial coa memoria do Reino de Galicia, coa súa xeografía simbólica e coa tradición oral que a sostivo durante séculos.

Este espectáculo de narración oral propón volver poñerlles voz, corpo e historia a esas criaturas. A partir do Mapa dos Seres Máxicos do Reino de Galicia, creado por Manuel Gago e ilustrado por Leandro Lamas, a palabra falada convértese nun mapa vivo: un espazo escénico onde pousar o dedo e abrir unha historia, onde cada lugar garda unha voz.

Trasnos, meigas, xacias, nubeiros, seres desaparecidos e outros vencellados a illas, montes, fontes ou camiños regresan á oralidade para ser contados de novo, reinventados e compartidos. Porque a tradición oral tamén é unha forma de ecoloxía cultural: o que non se conta, desaparece.

Seres Máxicos do Reino de Galicia é unha invitación a recuperar un imaxinario propio, rico e poderoso, e a facelo dialogar co presente, para que estas figuras deixen de ser reliquias do pasado e volvan acompañarnos no camiño cara ao futuro, como parte viva da identidade e da memoria do país.

O pasado Venres 12 de setembro demos inicio ás actividades de outono-inverno na Biblioteca Pública Municipal do Concello de Pazos de Borbén – BiblioPazos co espectáculo “ECORALIA, A LAMBONA ECOLÓXICA” que nos trouxo “PAKOLAS” co que conmemoramos a chegada do Equinocio de Outono e o inicio do Curso Escolar.

Este espectáculo está baseado no último libro-disco de PAKOLASque foi editado polo CRAEGA – Consello Regulador da Agricultura Ecolóxica de Galicia en Decembro de 2024 e que tedes dispoñible na nosa Biblioteca e no resto das Bibliotecas de Galicia desde este ano 2025.

PAKOLAS presentou unha proposta musical-narrativa contando e cantando a historia da meiga Ecoralia, que nos ensinou a través das súas cancións e contos a importancia de consumir alimentos ecolóxicos, para coidar o medio ambiente, combater o cambio climático e garantir o benestar animal.

A través das cancións e a narración, adentrámonos nas entrañas da carballeira máis extensa de toda Galicia, onde a vexetación é máis mesta e verde, vive Ecoralia. Sempre viste da cor do musgo e levaba unha trenza longa e roxa recollida cun estalote. Ecoralia é unha meiga moi nova e boa coñecedora de conxuros ancestrais aprendidos das súas avoas. Pero ela non é coma as demais.

O certo é que o pasamos moi, pero que moi ben.

Aquí vos deixamos unhas imaxes de como foi o asunto…

Por certo o libro en PDF, as cancións e o material educativo pode ser descargado desde a seguinte páxina web:

https://www.craega.es/es/divulgacion-infantil/

O pasado Xoves 26 de setembro ás 13:00 horas no Auditorio do Concello de Pazos de Borbén tivemos o contacontos teatralizado con monicreques e ventriloquia  que nos trouxo o artista FRAN CAMPOS “BANDULLO AZUL“ titulado “FAZULAS E O LADRÓN DE PARAUGAS” baseado no libro do autor Xosé Lueiro, ilustrado por Sara Valcárcele publicado pola Editorial Galaxia.

Vivimos en directo a viaxe iniciada por FAZULAS e a súa teima por saber de que cor é o vento emprendendo unha fantástica aventura collido a un paraugas. Buscou entre as árbores, as nubes… precisou da axuda do Señor Moucho, da cadela Petra, do profesor e de todos os presentes na sala.

Ao final os asistentes descubriron que fai o vento cos paraugas, e lle fixeron unha canción xuntos a ese gatiño curioso e parlanchín chamado Fazulas.

Asistiron a este evento o alumnado de 1º a 4º de Primaria do CPI “Curros Enríquez” de Pazos e os usuarios da Asociación Aspavi xunto cos seu profesorado e monitores.

Con esta actividade conmemoraremos o DÍA EUROPEO DAS LINGUAS que se celebra o 26 de setembro en toda a Unión Europea como homenaxe á diversidade lingüística do continente europeo; unha iniciativa que busca promover a aprendizaxe continuada de varios idiomas para os habitantes deste continente.

Unha das principais metas que desexa implantar en Europa a celebración do Día Europeo das Linguas, é a de concienciar aos habitantes sobre o enorme potencial que teñen os idiomas como ferramenta profesional e intercultural, que non só permitiríalles acceder a novas ofertas de emprego no mundo ou os convertería nun cidadán global, senón máis ben, como forma de preservar a cultura dos países e asegurar a súa pervivencia ao longo das xeracións futuras.

O pasado Venres 13 de Setembro ás 13:00 horas tivemos no Auditorio do Concello de Pazos de Borbén unha nova actividade do programa de Animación á Lectura e de Dinamización da Lingua Galega da Biblioteca Pública Municipal de Pazos de Borbén – BiblioPazos e do programa de dinamización da lectura nas bibliotecas LER CONTA MOITO.

Ese día estivo con nós LEO LEIÑO co seu espectáculo “HABELAS HAINAS” co que fixemos unha viaxe máxica a través das tradicións e lendas galegas mediante a narración oral, a animación e a maxia.

Asistiu a este evento ao alumnado de 3º a 6º de Primaria do CPI “Curros Enríquez” de Pazos e aos usuarios da Asociación ASPAVI, que o pasaron moi, pero que moi ben.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

O pasado Venres 3 de Maio ás 13:00 horas tivemos no Auditorio do Concello de Pazos de Borbén o espectáculo “O LIBRO VIVO” de Expresións Producións, unha actividade que forma parte do programa de Animación á Lectura e de Dinamización da Lingua Galega da Biblioteca Pública Municipal de Pazos de Borbén – BiblioPazos e do programa de dinamización da lectura nas bibliotecas LER CONTA MOITO que promove a Dirección Xeral de Cultura da Consellería de Cultura, Educación, Formación Profesional e Universidades (Xunta de Galicia) en colaboración cos concellos galegos titulares dalgunha biblioteca ou axencia de lectura públicas integradas na rede de bibliotecas de Galicia.

“O LIBRO VIVO” foi un espectáculo de contacontos teatralizado con monicreques, cancións e maxia no que o libro foi o fío do mesmo; cheo de ilusión e maxia, dun libro xigante, vivo, sairon moitísimas sorpresas: personaxes, contos… Un espectáculo interactivo, dinámico e divertido.

Asistiu a este evento ao alumnado de 1º a 4º de Primaria do CPI “Curros Enríquez” de Pazos e aos usuarios da Asociación ASPAVI, que o pasaron estupendamente ben.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

Este pasado venres 22 de setembro tivemos no Auditorio do Concello de Pazos de Borbén a visita de AL GUANELLA co seu espectáculo “CONVERSAS CON TANA. acerca da igualdade de xénero” ao que asistiron o alumnado de Primaria do CPI “Curros Enríquez” de Pazos; e os usuarios da Asociación ASPAVI.

Este espectáculo teatral baseado na ventriloquía incluíu maxia, xogos de preguntas e respostas, cancións e a participación directa do público; e nel o granxeiro AL GUANELLA coa súa cadeliña TANA, mantiveron unha fluída e divertida conversa na que afloraron diálogos delirantes ata desencadear na cuestión da igualdade de xénero. combinadas con humor, cancións, ensinanza e moita sensibilidade.

Grazas a AL GUANELLA e a súa cadeliña TANA por volver outra vez ir a Pazos de Borbén a ofrecernos un espectáculo tan participativo e divertido.

Para conmemorar a chegada do Solsticio de Verán e o comezo das vacacións escolares, tivemos con nós á contadora ALBA DE VALES, quen nos trouxo o seu espectáculo de narración oral “CONTOS ARREDOR DO LUME” o Mércores día 21 de Xuño a partir das 11:00 horas no Auditorio do Concello de Pazos de Borbén, e asistiron a este evento todo o alumnado de Infantil e Primaria do CPI “Curros Enríquez” de Pazos.

Neste excelente espectáculo ALBA DE VALES ofreceunos unha selección de contos de tradicións populares que nos achegaron ao lume de fóra e de dentro, para falarnos de igualdade, solidariedade, coraxe e intuición propia, que como unha luz guía, precisamos para andar o noso camiño.  Falounos da tradición do Xan Xoán, entre outras, e coa súa expresión oral, co xesto e cun pandeiro redondo tradicional acompañando a velada, tróuxonos unha pouca luz que se cadra espertou aos lumes dormentes.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA.

O pasado martes 16 de Maio ás 10:00 horas e organizado pola Biblioteca Pública Municipal do Concello de Pazos de Borbén dentro do programa LER CONTA MOITO de 2023, tivemos con nós no Auditorio do Concello ao MAGO MARCO co seu espectáculo “MAXIA PARA SOÑAR” co que conmemoramos o DÍA DAS LETRAS GALEGAS, adicado este ano ao tradutor, novelista, historiador, xornalista, ensaísta e editor D. FRANCISCO FERNÁNDEZ DEL RIEGO.

Neste espectáculo sorprendente, para gozar en familia, o Ilusionista Mago Marco propuxo unha viaxe de soño e ilusións envoltas nun misterio. A proposta de Marco foi a maxia clásica adaptada aos nosos tempos con aparicións, desaparicións, levitacións imposibles e o máis importante unha maxia interactiva en que o público foi o grande protagonista como se demostra nas seguintes imaxes.

Contamos coa asistencia a este evento de todo o alumnado de Infantil e Primaria do CPI “Curros Enríquez” de Pazos de Borbén e de Infantil da EEI “A Galeriña” de Nespereira acompañados dos seus mestres.