O pasado venres vivimos unha tarde chea de creatividade na Biblioteca Municipal de Coristanco co obradoiro “Crea o teu libriño Pop-Up”, unha actividade na que os libros deixaron de ser planos para converterse en pequenas obras con movemento e imaxinación.

Queremos destacar especialmente a implicación das familias, que acompañaron e participaron activamente, e aos ponentes da actividade que lograron crear un ambiente próximo, colaborativo e moi enriquecedor.

Os nenos e nenas sorprenderon pola súa enorme creatividade, dando forma a propostas únicas e demostrando que a lectura tamén pode ser unha experiencia práctica, divertida e chea de vida.

A Biblioteca Municipal de Coristanco acolleu a actividade “Risotadas”, dirixida á primeira infancia e ás súas familias, dentro do programa Ler conta moito. Durante a sesión desenvolveuse un espazo acolledor de exploración sensorial, xogo e primeiro achegamento aos libros, favorecendo a participación activa dos bebés e das persoas adultas acompañantes. A actividade permitiu compartir un tempo de lectura, descubrimento e vínculo arredor da biblioteca, cunha resposta moi positiva por parte das familias asistentes.

O espectáculo “Toupiciencia Show” da Xanela do Maxín desenvolviuse durante aproximadamente 40 minutos nos que Toupiña e o seu inseparable axudante Protonio achegaron ao público un divertido e educativo percorrido polo mundo da ciencia a través de experimentos dinámicos, xogos e demostracións interactivas.

A actividade, desenvolvida integramente en galego, puxo en valor a lingua como vehículo para o coñecemento científico e fomentou a curiosidade, o pensamento crítico e o gusto por aprender investigando. O evento contou cunha excelente acollida por parte das familias, que encheron o espazo da biblioteca nun ambiente de entusiasmo e participación activa.

Na mañá do 13 de xuño celebramos na Biblioteca Municipal de Coristanco un inspirador obradoiro de contacontos para adultos, guiado pola actriz e narradora Paula Regueiro García, da compañía Tremola Teatro.

A actividade estivo dirixida a pais, nais, avós, avoas e persoas interesadas en aprender a contar contos a nenos e nenas de entre 0 e 6 anos. Durante o obradoiro, as persoas participantes mergulláronse no mundo da narración oral a través dun enfoque lúdico e vivencial. Traballouse con diferentes técnicas de expresión oral, como a voz, o ritmo, a mirada, os silencios e o corpo, achegando recursos sinxelos pero eficaces para facer dos contos momentos cheos de maxia e conexión emocional.

A actividade tivo unha gran acollida, cun grupo moi participativo que desfrutou tanto das dinámicas como das reflexións sobre a importancia de contar historias como ferramenta educativa e afectiva.

Desde a biblioteca agradecemos a Paula Regueiro a súa entrega e profesionalidade, así como ao programa Ler Conta Moito por facer posible esta enriquecedora experiencia.

No marco do programa “Tecendo Recordos, Transformando Vivencias”, desenvolvemos o obradoiro de Bonecos do Faiado de Nin, unha actividade que convidou a mergullarse na memoria, na creatividade e na expresión persoal a través da arte dos bonecos.

Este obradoiro creou un espazo simbólico onde a memoria cobrou vida a través de pequenas figuras cheas de significado. Ao longo da sesión, as participantes crearon os seus propios bonecos, partindo de tecidos, materiais reciclados e elementos simbólicos, para dar forma a personaxes que representen anacos da súa historia, das súas emocións ou dos seus soños.

Rotundo éxito foi o obtido pola actividade”Véxote! Contacontos inclusivo”. Dende o primeiro momento logrou captar a atención e a implicación de todos os participantes na actividade que mostrou unha temática tratada con gran sensibilidade. Entre risas e complicidade, lograron presentarnos un obradoiro creativo e singular.

Magnífico obradoiro foi o que puidemos gozar da man de María José de PeixeSapop, quen nos permitiu coñecer un pouco máis a artesanía da encadernación xaponesa.

Magnífica participación cunha gran implicación por parte da promotora da mesma que se adaptou amplamente ao grupo.

Obradoiro de arte urbano “Se a miña avoa tivese rodas”, unha dinámica para nenos e nenas de a partir de 4 anos que nos permitiu crear unha idealización de avoa moi especial: astrónoma, astronauta…

O pasado 10 de abril, a Biblioteca Municipal de Coristanco adicouna ao investigador e á investigadora científica cun obradoiro de Robótica no que os asistentes descubriron os principios da ciencia, a tecnoloxía, a enxeñería e as matemáticas (STEM), participando nunha experiencia de aprendizaxe divertida e práctica.
Da man de “A nube de Artear” deseñaron e deron vida a diferentes robots co obxectivo de incentivar a creatividade e a curiosidade, proporcionando oportunidades para construír e probar prototipos de obxectos, animais e vehículos cun enfoque do mundo real.

ROBÓTICA CREATIVA

Na Biblioteca de Coristanco festaxamos o día das Letras Galegas na compañía de Antía Yáñez, quen nos sorprendeu cun obradoiro cheo de experimentos e fitos misteriosos. Maxia e ciencia uníronse neste taller onde as matemáticas e as reaccións químicas protagonizaron estes “encantamentos”.