Este luns 22 de maio na Biblioteca Municipal Mª José Ruso de Dorneda (Oleiros) tivemos un didáctico e creativo obradoiro de pintura, da man de Babaluva Teatro. As nenas e nenos participantes puideron coñecer a obra de mulleres artistas coma Maruxa Mallo, Sonia Delaunay ou a fotógrafa Ruth Matilda Anderson, para despois crear o seu propio autorretrato. Foi unha tarde na biblioteca chea de imaxinación e moito arte!!.

Este Luns 10 de Outubro na Biblioteca Municipal Mª José Ruso de Dorneda (Oleiros) a maxia de Leo Leíño transportounos coma peregrinos polo Camiño de Santiago. Da man da peregrina Exeria e seguindo as instruccións do Códice Calixtino puidemos aprender historias e costumes do Camiño e abraiarnos cuns sorprendentes e divertidos trucos de maxia.

Nova sesión de contacontos este luns 3 de Outubro na biblioteca Mª José Ruso de Dorneda. Nesta ocasión estivemos na entrañable compaña de Filipa e Fran, de Bandullo Azul, unha divertida parella chea de humor e máxicos contos que encheron a nosa tarde na biblioteca de risas e historias marabillosas.

Este luns 26 de setembro na biblioteca Mª José Ruso de Dorneda puidemos despertar a nosa curiosidade científica cun entretido obradoiro de ciencia impartido polas monitoras de Héroes para la Ciencia. Péndulo de Newton, bóla de plasma, caleidoscopios, paxaros en equilibrio e ata fluído non newtoniano de cor!!. Unha tarde na biblioteca na que as nenas e os nenos puideron aprender xogando que a ciencia tamén é divertida.

Este luns 19 de setembro comezamos nova tempada de animación lectora na biblioteca Mª José Ruso de Dorneda da man de Trécola Teatro co seu contacontos “O tesouro”. Con dúas imaxinativas exploradoras viaxamos a mundos máxicos e sorprendentes na procura dun tesouro moi, moi especial.

Este xoves 14 de outubro tivemos na Biblioteca de Dorneda unha nova sesión de contacontos e desta volta acompañóunos Iván Davila co seu espectáculo Contos na lareira. Un feixe de entretidas historias engalanadas con sorpresas, adiviñas e bo humor que nos fixeron pasar unha tarde moi, moi entretida.

Este luns 27 de setembro pasamos unha animada tarde co novo espectáculo musical de Paco Nogueiras “Extra!”,un orixinal concerto no que as diferentes seccións dun xornal serven de introdución para unha chea de cancións divertidas e moi, moi bailables.

Este luns 20 de setembro na Biblioteca Pública de Dorneda a compañía Sarabela Teatro presentounos ao ourizo cacho Naturizo e aos seus amigos do bosque. Xuntos aprendimos moitas cousas sobre a vida no bosque, o coidado do medio ambiente e a importancia de respectar a natureza, ademáis de pasar unha entretida e lúdica tarde de contacontos.

Hoxe Luns 5 de Outubro camiñamos xuntos polo mundo dos contos da tradición oral da man da contadora Charo Pita. Coa súa sesión de contacontos “Andando polo carreiro” foinos narrando belas historias encadeadas con música para non perder o ritmo dos contos.

Este Luns 28 de Setembro acompañounos na nosa sesión de contacontos Pablísimo co seu espectáculo Príncipas e Princesos. Uns divertidos contos de príncipes rosas e princesas azuis que mantiveron entretidos aos nosos asistentes.