Leo, o león máis aventureiro de toda a selva, volveu hoxe a Carnota para festexar o seu aniversario. Houbo música, xogos, burbullas e unha chea de amigos e amigas para acompañar a Leo neste día tan especial.
A festa de Leo foi todo un éxito!
“A festa de Leo” é unha das montaxes que integran a serie “Aprende con Leo”, unha colección de espectáculos sensoriais para a primeira infancia de Trémola Teatro.
O sábado 18 de outubro O Mago Paco chegou a Carnota cunha maleta chea de sorpresas inimaxinables.
Contamaxias é un espectáculo para público familiar que conxuga maxia e narración oral para espertar a curiosidade da cativada, estimular a imaxinación e fomentar o amor polos libros na infancia.
Foi unha sesión inesquecible, repleta de emocións, contos, xogos, sorpresas, moitas risas e algún que outro susto tamén…
Pasámolo súper!
Moito desfrutamos o pasado venres en Carnota con Pablo Díaz e o seu “Cantacontos para bebés”, un espectáculo que combina música en directo e narración oral e que aborda temas e rutinas especialmente adecuadas para a primeira infancia.
Cantamos cos libros da colección “Do berce á Lúa”, bailamos ao son da guitarra e gozamos a mais non poder coas historias do gato lambón e do ratiño Paco.
Pasámolo de marabilla!
O venres 25 de outubro Cé Orquestra Pantansma recalou na Axencia de Lectura Muncipal de Carnota con Fíos do querer, un espectáculo musical para meniñas e meniños de 0 a 3 anos repleto de ritmo e sensibilidade, cun repertorio fermoso que engaiolou a crianzas e maiores de comezo a fin. Xogamos, cantamos, bailamos e creamos música con instrumentos artesanais fabricados con elementos naturais. Encantounos!
O pasado venres, 18 de outubro, a Axencia de Lectura Municipal de Carnota acolleu o espectáculo Cinco ratiños de Conto, unha deliciosa sesión de contos e cantos para bebés, conducida marabillosamente por Bea Campos, de Migallas Teatro.
O pasado sábado gozamos dunha deliciosa tarde de teatro en familia co espectáculo Xeado de Lúa, de Títeres Cachirulo. Internámonos nun misterioso bosque e vivimos aventuras fascinantes cos animaliños que alí habitan: o rato, o esquío, o macaco, os paxariños, a serpe… Que ben o pasamos!
O sábado 7 de outubro pasamos unha tarde do máis divertida con Marcos Dios Aguado e as súas Historias de bicharracos. Un espectáculo que combina mimo, monicreques, música e narración oral para sensibilizar sobre a excesiva dependencia das pantallas e promover o hábito lector na infancia.
Gustounos!
Quen dixo que as tardes de outono son aburridas? Hoxe en Carnota pasámolo en grande con Música Miúda e as animadísimas Historias de Bemol Pequeno. Marabilloso espectáculo para cantar, bailar e desfrutar en familia.
Por nós, que chova!
Tareixa Alonso e Xacobe Rodríguez, Pavís Pavós, chegaron hoxe a Carnota cunha maleta repleta de contos, cantos e xogos recuperados da tradición oral que encandilaron por igual a papás, mamás e bebés.
Trispilistriñas, trispilistriñas, o que non come non ten barriguiñas.
Trispilistriñas, trispilistrolas, o que non come non ten barrigloas.
Cousa linda!
Hoxe pasamos unha tarde deliciosa na Axencia de Lectura Municipal de Carnota con Bolboreta e os seus “Contos Musicados”. De aquí para alá, Polo camiño, Un libro, O polo Pepe e un montón de historias máis, marabillosamente contadas e cantadas por Lydia Botana. Quedamos con gana de máis!
Séguenos