O venres, 1 de agosto, Xanela Ocio trouxo a Carnota un feixe de contos ao revés, narracións clásicas revisadas, con inversión dos roles tradicionais, orientadas a fomentar a igualdade e o respecto aos demais entre os máis pequenos.

O 11 de xullo a compañía Elefante Elegante representou en Carnota o espectáculo Lobo Bobo ante un nutrido grupo de nenas e nenos acompañados dos seus familiares.

Un lobo pacifista e vexetariano e unha malvada madrasta, que acaba convertida nun adorable porquiño, fixeron as delicias dos máis pequenos, nesta divertida e sorprendente revisión dalgúns contos clásicos ben coñecidos por todos, coma Brancaneves ou Carapuchiña vermella, da man de Gonçalo Guerreiro.

O pasado 4 de xullo, o salón de actos do Concello de Carnota acolleu o espectáculo Contiario,  unha sucesión de pequenas historias orixinais, sorprendentes e divertidas narradas con dinamismo e mestría por Pablo Sánchez, que engaiolou a pequenos e adultos dende o minuto cero.

O pasado venres, 9 de agosto,  nenos/as e maiores gozamos en Carnota co espectáculo Príncipas e princesos, unha divertidísima sesión de contacontos a cargo de Pablísimo. O contador, botando man de diferentes recursos teatrais coma o kamishibai ou  monicreques, achegounos unha reflexión sobre a igualdade de xénero, mediante a narración de contos atípicos con cambios de rol e inversión dos papeis tradicionais.

Rematamos a sesión cun conto musical, cuxa banda sonora correu por conta do público, que con mestría fixo soar unha morea de instrumentos insólitos.

 A actividade tivo lugar o 02/08/2013 no salón de actos do Concello de Carnota, a escasos metros da axencia de lectura. Trátase dun espectáculo de  aventuras interactivo que recrea a amizade entre un aviador e un moucho que detesta a luz do sol, polo que os dous personaxes intentan facelo desaparecer, ata que se decatan de que a vida sen sol non é posible. Todo isto acompañado dunha rica posta en escena e grandes doses de humor.

O pasado venres 19 de xullo, no marco do programa de dinamización lectora Un verán de conto! da Axencia de Lectura Municipal de Carnota, tivo lugar o obradoiro infantil Violeta, a carteira bolboreta, a cargo de Enrique Mauricio (Mau) e Carlos Álvarez Taboada (Pin), autores da colección “Polo correo do vento” (Xerais).

O obradoiro comezou coa narración oral dunha historia por parte de Enrique Mauricio, acompañada de ilustracións en vivo da man de Carlos Álvarez Taboada. Para rematar, os participantes realizaron cadanseu debuxo guiados polo ilustrador e colorearon os murais deseñados por este durante a sesión.

O pasado venres 12 de xullo, ás 11:30 h, un nutrido grupo de nenas e nenos a partir dos tres anos de idade mantiveron un encontro literario  con Miro Villar na Axencia de Lectura Municipal de Carnota. Os participantes asistiron á narración oral de tres contos rimados do autor (Carlota e a gaivota patiamarela, Rebelión na charca e A cobiza do verme Noel) acompañada de proxeccións das súas correspondentes ilustracións.