Obradoiro eminentemente práctico, onde cada participante realiza a súa páxina de cómic.

Santy Gutiérrez comeza polo texto: o guión literario e o guión en viñetas. Esto acompañado dunha páxina co esquema de catro viñetas en branco, onde haberá que ir seguindo o guión.

Unha vez lido o texto, debemos centrarnos no deseño do personaxe principal, o protagonista. Fixarnos nos seus xestos, nos seus movementos, etc.

Sinala a importancia da distribución de cada viñeta. Primeiro situar os textos e encerralos en “bocadillos”. Vai aproveitando para comentar os diferentes tipos de bocadillos, dependendo de cada situación.

Destaca tamén a importancia de cada plano, para mostrarnos os diferentes tipos de planos.

Intercala así teoría e práctica a medida que vai artillando a páxina. Desenvolve a  actividade dunha maneira moi didáctica,  pois partindo dunha práctica real, vainos achegando á linguaxe do cómic.

Trátase de que os participantes realicen o seu propio tebeo, disfruten debuxando e aprendan os recursos de expresión do cómic.

Actividade levada a cabo por PAVÍS PAVÓS, basada na nosa tradición oral.

Comezan interactuando individualmente con cada neno/a cun xogo de palmas para, a continuación, dirixirse a todos os asistentes.

Un conto a tamaño xigante: A casa de Xan, realizado artesanalmente, contado entre dúas persoas, Tareixa e Xacobe, envolve de expectación. Texto acumulativo que da pé á participación.

Arrolos, cantos e ladaíñas… Nun ambiente participativo entre adultos e pequenos, sempre pensando en que todo se poida continuar nas familias

Unha moi boa actividade para o úblico ao que vai dirixida, de 0 a 3 anos.

Boa oportunidade para fomentar o fondo de música infantil da Biblioteca.

Xosé Tomás ofrécenos un obradoiro moi dinámico e creativo, intercalando teoría e práctica.  Comeza cunha serie de referencias históricas, desde os inicios da banda deseñada para ir introducíndonos na propia linguaxe do cómic: liñas cinéticas, estereotipos, onomatopeias, a importancia dos silencios, as viñetas e as súas diferentes formas, os globos ou bocadillos, a elipse, os planos…

Potencia a creación de  historias propias, con guións sobre a propia vida. Se non se nos ocorre nada, tamén podemos xogar co signo de interrogación.

Potencia o fondo de cómic da propia biblioteca, mostrando publicacións interesantes que hai dispoñibles para préstamo.

É un obradoiro moi didáctico e Xosé Tomás  un gran comunicador.

Estes talleres forman parte do programa ABRILUSTRADO das bibliotecas Municipais de Cambre.

Obradoiro de banda deseñada programado para o alumnado de 3º A de ESO do IES David Buján de Cambre.

Santy Gutiérrez logra que os rapaces e rapazas realicen a súa propia páxina de cómic.

Preséntalles o Guión técnico e a partir de ahí vai desenvolvendo o deseño de personaxes, distribución de textos, bocadillos… manexando toda a linguaxe do cómic: liñas cinéticas, distintos tipos de planos, onomatopeias…

Cada participante levou o seu propio cómic. A actividade resultou moi ben valorada polo asistentes.

Estes obradoiros desenvólvense dentro do noso programa ABRILUSTRADO.

Preto de 60 nenas e nenos de 0 a 3 anos, con adultos acompañantes disfrutaron coa música e os contos de Pablo Díaz.

Temas e rutinas familiares para os máis pequenos.

Lúa,  Crocodilo e Paco, coas cancións como fío conductor, fixéronnos pasar unha tarde moi divertida e participativa.

A linguaxe da banda deseñada esperta curiosidade entre os asistentes

O segundo Obradoiro da Biblioteca Os Templarios tivo como protagosnista a un marciano, Xaime Asteroide.

Agora trátase de naves espaciais, alieníxenas e universos fantásticos.

Con esta historia de fío conductor, ímonos adentrando nunha liguaxe propia: a do cómic.

Como se crean os personaxes, as diferentes posturas e situacións, de pé, sentado, correndo, rindo…

Os trucos, as perspectivas, os diferentes puntos de vista, os planos, as viñetas, bocadillos…

Rapaces e rapazas moi creativos que fixeron unha valoración excelente da actividade.

Implicados na creación da súa propia páxina

Santy Gutiérrez da as pautas para crear un SuperCoello

Continuamos nas Bibliotecas Municipais de Cambre cos Obradoiros de Banda Deseñada. Hoxe tiveron lugar na Biblioteca Os Templarios.

Santy Gutiérrez comeza desmitificando tópicos, pois a historia que lles proporciona ten como protagonista un coello. Explica como aínda que a primeira vista podería parecer infantil, non ten porqué.

Moi importante é o deseño do personaxe. Van aprendendo unha serie de claves ata crear un Coello Superheroe.

Ao longo do obradoiro vaise descubrindo a linguaxe do cómic: liñas cinéticas, textos en off, onomatopeias…

Actividade moi ben valorada coa que se pode aprender e pasalo ben.

Creando a súa propia páxina de cómic

Choupiña e Trasnón reciben na biblioteca, cantando unha nana, a nenas e nenos e tamén a papás, mamás, avoas… Transmitindo un ambiente de tranquilidade para que todos estes pequenos de 0 a 3 anos non se asusten e collan confianza.

Choupiña e Trasnón, a medida que avanza a sesión vanse transformando para contar cos sentidos. Aparece Mariquiña a carteira que vai visitando a unha serie de personaxes, “abrindo portas” para ver á Vaca Paca, ao Can de Palleiro Patoso, a Chiño o Golfiño, a Cucho O Porco Celta…

Vaise logrando unha participación de pequenos e adultos e todos xuntos disfrutan tocando e tocándose, ulindo, escoitando…

Excelente actividade para gozar cos nosos fillos ou netos. De maneira circular, remata tamén dunha maneira tranquila, recitando un poema con música de fondo.

Manel Cráneo imparte un segundo obradoiro na Biblioteca Municipal Os Templarios, o día 26 de abril. Neste caso ao alumnado de 3º E  do IES Afonso X O Sabio, de Cambre.

Comezamos facendo unha breve presentación de Manel Cráneo, cun percorrido pola súa obra e as súas  publicacións, todas existentes na biblioteca e dispoñibles para préstamo.

A continuación, móstranos, a través dun Power Point, o álbum A Torre dos Mouros, con todo tipo de detalle, así como o  proceso de creación. Vai intercalando as explicacións con pequenas prácticas para o alumnado, mesmo utilizando o xogo das disferentes maneiras de resolver unha determinada páxina.

A última parte do obradoiro consiste na realización dunha páxina de cómic, según un guión que lles proporciona.

Manel Cráneo propón, como actividade de continuidade, a realización dun cómic de xénero histórico, baseado na Orde do Temple, na ponte do Burgo, ou similar, aproveitando a ubicación da Biblioteca Os Templarios neste lugar. Para isto valeríanse de publicacións da biblioteca ou de restos arqueolóxicos existentes.

O día 26 de abril, tiveron lugar na biblioteca dous Obradoiros de banda deseñada, a cargo do debuxante  Manel Cráneo, dentro da programación de Ler Conta Moito. Estes talleres dan continuidade ao programa Abrilustrado das Bibliotecas Municipais de Cambre.

O primeiro taller, dirixido ao alumnado de 3º C  do IES David Buján de Cambre, tivo unha primeira parte teórico-práctica a fin de ir situando ao alumnado no contexto e na linguaxe do cómic: os tipos de bocadillos, os diferentes planos, a importancia das onomatopeias… Todo isto intercalado con pequenas prácticas.

A segunda parte do obradoiro apoiado nun Power Point, vai presentando en imaxes o álbum A Torre dos Mouros, con todo tipo de explicacións, tanto de documentación histórica como de realización técnica. En determinados momentos, para as imaxes e , antes de pasar páxina, propón ao alumnado a posible resolución dunha situación. A continuación compáranse os resultados.

A última parte consiste en tratar de realizar, brevemente, unha páxina de cómic, a partir dun guión previo.

Dado que a Biblioteca Municipal Os Templarios está moi pretiño da Ponte do Burgo, onde se atopan ao descuberto parte das arcadas da primitiva ponte, e sabido que foi lugar de relevancia histórica, Manel Cráneo propuxo ao alumnado realizar, a posteriori do taller, un cómic de xénero histórico, baseandose nas referencias existentes sobre o entorno.

Ademais, recálcase a importancia de visitar a exposición dos orixinais da Torre dos Mouros, que se atopaba na Sala de Exposicións da Biblioteca Central de Cambre.