Contacontos que diriximos a nen@s de 1 a 4 anos protagonizado pola ra, un monicreque, “Nano”. Através de diferentes contos, cantigas, enredos, dun xeito lúdico, os nen@s aprenderon sobre o mundo que os rodea e moitas cousas sobre uns animais tan especiais como son as ras.

Nen@s e adultos acompañantes, gozaron moitísimo con “Chimpo de ra”. Facía moito tempo que non oiamos rir tanto nunha actividade. Deliciosa e completísima sesión de contacontos con Raquel Queizás.

Contacontos para nen@s no que, a través da figura dunha bibliotecaria moi particular, a narradora achega ao público diversas historias cunha fermosa idea central: os mellores contos están na cabeza dos maiores e nas bibliotecas.

Estupenda sesión de contacontos. Cris de Caldas, ademáis dunha magnífica narradora oral, sabe captar a atención dos nen@s e mantel@s enganchad@s ao longo de toda a sesión, interactuando en todo momento con eles.

Obradoiro co método Zentangle no que un grupo de maiores, necesitados de estimulación terapéutica, decoraron un poema desenvolvendo, por medio desta técnica, a súa creatividade, a tranquilidade interior e a concentración.

Un ano máis, decidímonos por un obradoiro con este método  como instrumento,  pois é sinónimo de calidade á vez que de magníficos resultados conseguidos a través das diferentes propostas. Ademáis do nomeado anteriormente ( a creatividade, a relaxación, a concentración ) os participantes  ven aumentada a súa autoestima ante as obras resultantes.

Magnífica actividade dirixida, con calidez e profesionalidade, por Elisabeth Hillerud (Zengoala)

Compartir con Charo Pita o contacontos de “A formiga na barriga” foi unha absoluta gozada para os quince nen@s e os adultos que os acompañaron.

      Rimas, historias, xogos e cancións captaron completamente a atención de nen@s moi, moi pequen@s.

“A formiga na barriga. O cempés, alá nos pés. A tartaruga, na caluga. E a perdiz, pois… no nariz.”

Xa pasou por Redondela á Peregrina Máxica! e deixounos unha interesantísima conxunción entre maxia, historia e curiosidades en torno ao Camiño de Santiago.

Bo Camiño, Leo Leiño!

O pasado mércores, un grupo terapéutico de Alzheimer participou no obradoiro “Caderno de lectura con Zentangle” impartido por  Elisabet Hillerud,  no que utilizaron o método zentangle para decorar a cuberta dun caderno de lectura.

É unha técnica que consiste en trazar patróns repetitivos que crea belas imaxes e fomenta a tranquilidade e a concentración, desenvolvendo a creatividade e a sensibilidade artística.

As persoas que asistiron pasarono xenial, entenderon que o importante non era o resultado e gozaron coa plena atención na realización dos trazos.

Tanto no parecer de Elisabet como no dos participantes e das monitoras do grupo, foi unha experiencia totalmente satisfactoria e gratificante.

Un galo cantareiro, unha ovella preguntona, un gato en apuros, unha rata fachendosa…

Animais peludos, tenros, comellóns, medorentos, curiosos, teimudos, únicos… e sempre adorables,  foron os protagonistas deste contacontos no que as cancións  que acompañan ás historias  as enriquecen e axudan ao seu desenvolvemento.

Os nenos, de moi variadas idades, pasárono xenial 🙂