Lectura, ecoloxía e rock en Cambre, da man de Pakolas
A Biblioteca Central María Pita de Cambre encheuse de boas vibracións co espectáculo ‘Ecoralia, a lambona ecolóxica’.
Saltar a ligazóns de pé de páxina
Archive for category: Actividades de dinamización con música, teatro e danza
“Circo na biblioteca” na B.P.M. “Manuel María” de Oleiros a cargo de Dani Blanco
O martes, 23 de setembro, tivemos o pracer de recibir en Oleiros a Dani Blanco que enfeitizou ao seu público con equilibrios imposibles, malabarismos, contos sobre gatos lambóns e sobre todo moito humor.
CIRCO NA BIBLIOTECA DE BARRO: UN ÉXITO!
Que ben o pasamos hoxe luns, 22 de setembro, na Biblioteca de Barro! A actuación de Dani Blanco foi todo un éxito: malabares, equilibrios, escapismo e contos de gatos, fixeron as delicias de todos os rapaces e rapazas que viñeron ata a biblioteca de Barro a dar a benvida ao novo curso.
Ademais, repartimos as tarxetas do Reto Lector, unha actividade na que cada neno e nena poderá puntuar os libros que leve da biblioteca para crear un ranquin cos mellor valorados. Coa mostra das últimas novidades e o libros máis lidos os 75 participantes pasaron unha mañá estupenda.
Contacontos : Cambio e conto
Este venres 19 de setembro, no Pazo de Ferreirós, tivemos un contacontos para bebés a cargo de Raquel Queizás.
“O CONTO DE BARRIGA VERDE” con FRAN REI de Culturactiva en BiblioPazos
O pasado Venres 19 de Setembro tivemos con nós a FRAN REI de CULTURACTIVA que nos trouxo “O CONTO DE BARRIGA VERDE” de Manuel María, un espectáculo co que quixemos conmemorar a chegada do Equinoccio de Outono e o inicio do Curso Escolar 2025/2026.
FRAN REI presentou este novo espectáculo unipersoal no que mestura narración oral, humor e maxia: “O conto de Barriga Verde”, escrito por Avelino González. a partir de tres obras de Manuel María (Barriga Verde, Os soños na gaiola e Aventuras e desventuras dunha espiña de toxo chamada Berenguela) pretende ser un achegamento á poesía, prosa e teatro do autor lucense a quen lle dedicaron o Día das Letras Galegas no ano 2016.
Nesta sinxela historia, Fiz, un mozo labrego galego, terá que enfrontarse ao Serrador e ao Demo polo namoramento da sempre belida Moza. Coa axuda da maxia do seu padriño Barriga Verde, vello e neno demostrarán ao mesmo tempo que nada é máis forte que o amor verdadeiro.
Asistiron a esta actividade os escolares de Infantil e 1º e 2º de Primaria do CPI “Curros Enríquez” de Pazos e de Infantil da EEI “A Galeriña” de Nespereira.
Aquí vos deixamos unhas imaxes para que vexades o ben que o pasamos…
FESTIBAM na Biblioteca Municipal de Betanzos
Durante a finde do 13 e 14 de setembro celebramos en Betanzos unha nova edición do FESTIBAM, o festival da Biblioteca, o Arquivo e o Museo das Mariñas.
Grazas á programación de Ler Conta Moito puidemos ofertar catro actividades para todo tipo de públicos:
Onde están os libros?, O son das linguas, Contamúsicas e Contos en construción.
Esta programación combinouse con outras actividades realizadas por voluntarios ou por asociacións da cidade, como é o caso do Club de Xadrez de Betanzos.
A maiores contamos con xornadas de portas abertas no museo e ca presenza de artistas e artesáns locais nunha feira de arte e artesanía que fixo achegarse a moitos veciños ata a nosa Biblioteca.
Onde están os libros
O son das linguas
Contamúsicas
FESTIBAM
Contos en construción
Contamúsicas
“ECORALIA, a lambona ecolóxica” acompañada de PAKOLAS visitou BiblioPazos para conmemorar o inicio do curso escolar e a chegada do equinocio de outono
O pasado Venres 12 de setembro demos inicio ás actividades de outono-inverno na Biblioteca Pública Municipal do Concello de Pazos de Borbén – BiblioPazos co espectáculo “ECORALIA, A LAMBONA ECOLÓXICA” que nos trouxo “PAKOLAS” co que conmemoramos a chegada do Equinocio de Outono e o inicio do Curso Escolar.
Este espectáculo está baseado no último libro-disco de PAKOLASque foi editado polo CRAEGA – Consello Regulador da Agricultura Ecolóxica de Galicia en Decembro de 2024 e que tedes dispoñible na nosa Biblioteca e no resto das Bibliotecas de Galicia desde este ano 2025.
PAKOLAS presentou unha proposta musical-narrativa contando e cantando a historia da meiga Ecoralia, que nos ensinou a través das súas cancións e contos a importancia de consumir alimentos ecolóxicos, para coidar o medio ambiente, combater o cambio climático e garantir o benestar animal.
A través das cancións e a narración, adentrámonos nas entrañas da carballeira máis extensa de toda Galicia, onde a vexetación é máis mesta e verde, vive Ecoralia. Sempre viste da cor do musgo e levaba unha trenza longa e roxa recollida cun estalote. Ecoralia é unha meiga moi nova e boa coñecedora de conxuros ancestrais aprendidos das súas avoas. Pero ela non é coma as demais.
O certo é que o pasamos moi, pero que moi ben.
Aquí vos deixamos unhas imaxes de como foi o asunto…
Por certo o libro en PDF, as cancións e o material educativo pode ser descargado desde a seguinte páxina web:
https://www.craega.es/es/divulgacion-infantil/
O gato Fazulas na Biblioteca do Carballiño!!
O pasado venres, tivemos o gato Fazulas na Biblio!! Unha tarde moi gatuna da man de Bandullo Azul.
Barullo! de Nelson Quinteiro
Divertido espectáculo dirixido ao público familiar, no que Nelson Quinteiro nos achega dun xeito moi didáctico a coñecer os tipos de instrumentos da música tradicional. Unha posta en escena moi coidada.
FRUMARIO O BIBLIOTECARIO VISITA A BIBLIOTECA PÚBLICA MUNICIPAL DE GUITIRIZ
A nosa biblioteca transformouse e nun lugar cheo de maxia e ilusión. Un misterioso personaxe encargouse de guiar aos nenos e nenas de maneira maxistral a atopar os segredos agochados nos andeis.
Nesta viaxe especial, atoparon escenas de fantasía, contos sorprendentes, poesía, música, ciencia… Todo mesturado para ofrecer emoción, misterio e moita diversión.
Os libros converteronse en auténticos tesouros que da man de Frumario O blibliotecario fixeron voar a imaxinación dos participantes.
Porque todo isto, e moito máis, está máis preto do que pensamos: na nosa biblioteca, un lugar onde todo pode acontecer
Séguenos