O xoves 23 de abril celebramos o día do libro coa actuación de Baobab teatro e o seu caldiño de contos entre o que estaba  a ra da boca  grande, o rei Curro orellas de burro, o rato mentireiro etc. Fixeron a ledicia dos nenos xa que algúns participaron en algún conto como personaxe.

Para celebrar o Día Internacional do Libro acompañounos na Biblioteca de Bóveda (Lugo)  o grupo de Teatro Triatreros coa contada “Comechíns” para animarnos a ler e a comer san.

Día 10 de abril de 2015 ás 17:00, na biblioteca de Escairón

Celebramos o Día do Libro Infantil co contacontos Érase unha vez uns zapatos… de Fátima Fernández, dentro do repertorio do programa Ler conta moito.

Fátima presentouse e rapidamente se puxo “á faena” co seu mandil de zapateiriña remendona contadora de historias.

Así aprendemos que os zapatos FALAN! Si, falan. Por exemplo, os de Laura, dixéronnos que ela sempre pisa un zapato co outro e que nunca os limpa con crema. E como é que o sabemos?, pois porque Fátima é neta de zapateiro e aprendeu a lingua dos zapatos desde moi nena e fíxonos de tradutora.

Coñecemos a historia dos zocos dun neno que non os podía poñer para ir ó galiñeiro co seu pai (para que non se mancharan). E eles querían ir porque lles dixeran que as galiñas contaban unhas historias marabillosas. Así descobrimos como se deu por primeira vez o caso dun galo incubando un ovo e todas as peripecias que viviu ata conseguir que nacera o poliño! E vimos en vivo e en directo como o Galo Aarón foi papá!

Descobrimos sentimentos e o significado das cores para o monstro das cores, amigo de Tamara.

Rimos moito coas historias, tanto que case choramos coa risa e ó final resulta que case todos tiñamos a cor rosa (do sentimento do amor) e verde (o sentimento da calma).

Desde logo, a sesión foi espectacular e moi divertida. Agardamos tela pronto de volta con máis historias.

Na Biblioteca de Celanova celebramos o Día Internacional do Libro cunha sesión de contos a cargo de María Paz (Solidaridade Internacional de Galica), na que os nenos disfrutaron a través de relatos que fomentan a convivencia en igualdade e dentro da multiculturalidade.

Para celebrar o día do libro, ata  a biblioteca chegaron o día 22  unhas simpaticas pizzeras de “Sarabela Teatro”. Escoitamos os seus contos e divertimonos moito.

O ilustrador Óscar Villán mostroulles onte aos alumnos e alumnas do CPI de San Sadurniño toda a arte que hai detrás da ilustración dun libro. Arte, técnica e, sobre todo, creatividade, que se conseguen a forza de práctica e de beber en fontes tan diversas como Picasso, Klee, Francis Bacon e outros e outras grandes da pintura de todos os tempos.

O autor repasou algunhas obras e artistas de referencia, ao tempo que incidiu en que todo se reduce a ter ganas de pintar ou debuxar e a practicar ata dar cun estilo propio co que darlle saída á creatividade que todos e todas levamos dentro. Por outra banda, Villán tamén repasou o proceso de trasladar unha idea ao papel tomando como exemplo os seus propios deseños.

Tras a súa visita aos nenos de Oubiña e Vilariño, onte chegoulle o turno aos socios da ALM de Corvillón, que xunto coas divertidas historias de Xanela Ocio, puideron celebrar por todo o alto O Día do Libro, grazas ao programa Ler Conta Moito!

Uns 25 nenos de Educación Primaria participaron na actividade “Crea Fósiles de dinosauros” impartida por Mau Marela dentro do programa de animación á lectura da Xunta de Galicia e o Concello de O Vicedo LER CONTA MOITO. Durante o obradoiro os nenos puideron ver un audiovisual sobre os dinosauros e despois crearon os seus propios fósiles de dinosauros. Un gran nivel de participación e motivación deron como resultado unha actividade moi satisfactoria para todos.

Obradoiro de banda deseñada programado para o alumnado de 3º A de ESO do IES David Buján de Cambre.

Santy Gutiérrez logra que os rapaces e rapazas realicen a súa propia páxina de cómic.

Preséntalles o Guión técnico e a partir de ahí vai desenvolvendo o deseño de personaxes, distribución de textos, bocadillos… manexando toda a linguaxe do cómic: liñas cinéticas, distintos tipos de planos, onomatopeias…

Cada participante levou o seu propio cómic. A actividade resultou moi ben valorada polo asistentes.

Estes obradoiros desenvólvense dentro do noso programa ABRILUSTRADO.