Día 24 de outubro de 2025 ás 16:00, biblioteca de Escairón

Celebramos a Semana das Bibliotecas coa actividade do programa Ler conta moito…

Debuxando un conto

da man de Estefanía Padullés

o 23 de outubro, ás 11:00 na biblioteca

Con rapazada de 6 a 12 anos, logo dunha breve presentación sobre que partes conforman un libro, vendo uns exemplos do traballo de Estefanía, puxémonos mans á obra.

Seguindo as directrices da autora, soubemos que é unha portada, cantas partes compoñen unha historia e establecemos que iamos escoller unha personaxe á que lle vai pasar algo e decidimos como vai rematar a nosa historia.

Unha vez planificada a nosa historia, sabendo que ía estar composta por 5 páxinas, decidimos que ía pasar en cada unha delas e como iamos representalo.

Con 5 folios en branco, unha cartolina, un lapis e cores, creamos incribles historias.

Tanta era a emoción, e a ilusión de que se traballabamos ben, o noso traballo ía quedar na biblioteca, formando parte do catálogo de obras, que nos esforzamos ó máximo e saíron unhas historias fermosísimas.

Ademais coñecemos en que sección da biblioteca vai estar e por que. Tamén soubemos como se vai identificar e por que. Poderemos atopalo en breve no catálogo da biblioteca onde tamén temos os libros de Estefanía Padullés.

Sabela Losada presentou ás Cativadas de Verán de Vite unha singradura que lembraba ó clásico Xogo da Oca.

Os trinta participantes formaron equipos e completaron a Ruta Xacobea grazas á axuda dun dado xigante.

Aprenderon sobre as Cantigas medievais e sobre a orixe das frechas amarelas. Tamén sobre mulleres que deixaron pegada na ruta:

Exeria, que redactou un caderno de viaxes no século IV, ou María Pérez quen cara o 1300 pintaba cunchas e as vendía converténdose así nos primeiros souvenirs do Camiño.

Na tarde do luns 27 de maio, dez usuarias da Biblioteca José Saramago do CSC de Vite atrevéronse a resolver un enigma de escándalo! Seguindo as pistas e probas atopadas, conseguiron averiguar o contrasinal de diversos cadeados. Así, por medio do enxeño e do traballo en equipo, o grupo conseguiu revelar a identidade da personaxe culpable de desordenar a biblioteca durante o Espectáculo do Mago X. A actividade era unha completa novidade para as dez mulleres participantes; porén, logrou espertar o seu entusiasmo e as ganas de dar coa solución. Ademais, aprenderon a non deixarse levar polos prexuízos atribuídos de primeiras ás personaxes e o resultado sorprendeunas ao rachar estereotipos. Entón, da man de “Batucado y Emusin”, este escape room foi unha actividade entretida e orixinal.

Na tarde do martes 14 de maio de 2024, na Biblioteca José Saramago do CSC de Vite, dez nenos e nenas axudaron a Antonio Manuel Fraga Allegue a atrapar ao monstro Negra Sombra. Este levaba moito tempo atemorizando a Rosalía de Castro, que estaba farta da situación. A cativada asinou un contrato para ser investigadoras da Axencia Cazadora de Monstros e Espectros e, entón, comezou a aventura narrada de dar con este monstro que estaba agochado na Casa da Matanza da poeta galega. Os seus versos estiveron moi presentes. Así, estes empregáronse para nomear os equipos establecidos (como “Adiós ríos, adiós fontes”) ou para servir de pistas no xogo (como o caldo da “Miña casiña, meu lar” que sixilosamente comía unha das personaxes sospeitosas). As crianzas seguiron moi atentas e moi participativas o misterio de Negra Sombra e, unha vez atrapada, fixeron un debuxo para representala e levala de recordo. Foi unha actividade moi divertida e  interesante, repleta de intrigas!

Actividade moi interesante para divulgar o coñecemento e a experimentación.

A modo de Museo onde está PROHIBIDO NON TOCAR, preséntannos unha serie de obxectos que espertan a curiosidade do público, non só infantil.

Os nenos e nenas teñen oportunidade de experimentar, tocar e comprobar a súa “maxia”.

Este Museo está magníficamente guiado por Xesús Fernández e Lana Rodríguez que saben transmitir e contaxiar a curiosidade de cada experimento.

Un dos maiores atractivos foi a Bola de Plasma, que algúns xa pensan pedir aos Reis…

Tamén o Motor Stirling lento, que funciona tanto cun foco de enerxia quente como fría, ou o Móvile, elemento que permanece nun movemento continuo.

O pédulo de Newton, que nos explica a transformación da enerxía potencial en cinética, os Patos Bebedores, ou a evolución que podemos apreciar nas Memorias informáticas. Tamén está presente a lei de Moore, o Principio de Arquímedes e o de Pascal a través do Diábolo de Descartes.

Non faltan panais de abella ou os estudios da Divina proporción, coa sucesión de Fibonacci…

Remata o percorrido cun divertido experimento dun vaso con auga, boca abaixo e só suxeito cun pedaciño de folio.

Actividade moi ben valorada por todos e todas as participantes.

Os pasados venres 3 e 10 de xullo realizamos a través do programa Ler Conta Moito unha xincana fotográfica sobre un dos cambadeses de pro máis importantes, Ramón Cabanillas.

A través da fotografía, dous equipos de 14 nen@s en total, percorreron as rúas de Cambados relacionadas coa vida e obra do bardo de Fefiñáns, superando divertidas probas ao tempo de coñecían algo máis deste insigne escritor.

Ao remate, todos recibiron un diploma pola súa participación, desexando volver a repetir pronto esta interesante proposta.

O 21 de marzo, día da poesía, a agrupación Etnoga visitou a Biblioteca. Xunto cun grupo de rapaces do IES  “Aquis Celenis” leváronnos a gozar dun roteiro poético polo pobo onde coñecemos un pouco mellor ás nosas poetas máis recentes.