O venres 5 de outubro, Os Quinquilláns levaron a cabo un obradoiro teatral “A Fábula do Espantallo” no que participaron nenos/as e adultos.

Nun primeiro momento, formáronse os grupos con nenos/as e adultos e repartíronse os papeis (gatos, cans, merliños, xente da aldea, grilos). Logo desenvolveuse a actividade paso a paso, creando unha fábula moi fermosa coa actuación de todos os participantes. Todo foi moi sinxelo para os nenos/as que estiveron moi concentrados e atentos ás indicacións.

Actividade altamente participativa e moi recomendable.

Excelente actuación de Pablísmo o xoves 4 de outubro na nosa biblioteca. Gustáronnos os seus contos sobre todo tipo de animais domésticos, acompañados por música e cancións, monicreques  e unha utilización maxistral da narración oral, que nos fixo rir a todas e todos.

O venres día 5 visitou a biblioteca de Boiro “O xigante” de Elefante elegante. Veumos a contar unha bonita historia  na que a narración oral é acompañada polo teatro xestual e pola constate presenza da música.

O público quedou encantado coa actuación. Os nenos e nenas non perderon detalle da narración.

O día 5 de outubro o Pallaso Piruleta&Cia veu enseñarlles os nenos de Vilasantar a súa A Aventura Máxica na Biblioteca. Un espectáculo de maxia, contos e música.

O pasado xoves 04 de outubro, na Biblioteca Municipal Sagrada Familia de A Coruña tivemos o pracer de recibir a Paco Nogueiras coa súa Radio BuleBule.

Os nenos e nenas non pararon de cantar coa canción que lle da nome o disco pero axiña arrincaron motores e puxéronse a bailar coma tolos con “Movendo o pé”, “Éxito vogal”, “Teño que investigar”, “Carmela é…”, “Un bo plan”… Tamén recibimos consellos de peiteado con “Pelos, melena” e tivemos un parte meteorolóxico moi particular con “Tempo tolo”.

Todas as cancións da Radio BuleBule estan recollidas no libro-cd-dvd da Editora Kalandraka, podedes atopalo nas bibliotecas municipais da Coruña.

Coma sempre foi un auténtico pracer recibir a Paco na nosa biblioteca e esperamos telo pronto de volta con novos éxitos!!

Este xoves 4 de outubro visitounos o mago Pedro Bugarín na Biblioteca Emilia Pardo Bazán de Sanxenxo e o éxito foi total pois a maxia de Pedro enfeitizou tanto a pequenos coma a grandes. Sí, si…. dende os máis pequeniños ata os avós ficaron engaiolados cos trucos presentados no espectáculo. Maxia de cartas, de cordas e nós, maxia de froitas e cores e ata un perigosísimo truco cunha guillotina.

Todo coa simpatía que caracteriza a Pedro que fixo partícipes aos nenos e aos seus pais para gañarse ao público cunha actividade entretida, divertida, amena e asombrosa que nos deixou a todos abraiados.

Dende aquí queremos agradecer a Pedro a súa entrega e o seu bonfacer no seu oficio. Así como tamén queremos darlle as grazas por lembrarlle a todos os presentes que ser socios dunha biblioteca é gratuito e permíte gozar infinitamente alén de contos e lendas. Parabéns Pedro!  Contamos contigo para o ano que vén.

Grazas tamén a todos os que vos achegástedes até a biblioteca e compartíchedes a tarde connosco.

O martes 2 de outubro na Biblioteca Municipal de Neda tivemos a primeira sesión do programa Ler conta moito coa visita de Pablo Sánchez.

O paroleiro é moi amigo de parolar… gosta de laretear, enredar, falar e de contar. Conta sucedidos, historias e sobre todo moitos contos que leve na súa memoria, nas súas maletas, nos seus petos e nos seus zapatos.

¡Pasámolo xenial!

Parabéns polo gran traballo.

Bebés (de 1 a 3 anos) e maiores pasárono estupendamente participando de maneira moi activa nesta actividade na que Charo Pita cantou, acompañada de guitarra e de tambor africano, cancións das que tanto a letra como a música son da súa autoría.
Tamén dramatizou O trapiño de Ioké e, mesturando outros contos como Unha eiruga moi larpeira e Pío Pío, teceu unha historia que ten como protagonistas ás campás Dondondirindonga e Dondondirindón e a razón pola que deixan de tocar.

O mércores día 3 de outubro tivo lugar na biblioteca municipal do concello de Meis, a actividade de “Un banquete con moito conto” da compañia “Andamiaxe”.

Os asistentes gozaron deste taller crativo, e tiveron a oportunidade de adentrarse nun restaurante moi especial donde a imaxinación e os libros  foron os ingredientes principais dos pratos que degustaron.