O venres, 25 de setembro, Charo Pita agasallounos con historias sobre mulleres aventureiras reais e ficticias, aderezadas con algunha canción.
Os nen@s estiveron engailoados durante toda a sesión.
Para volver a repetir.
O venres , 18 de setembro iniciamos a hora do conto na biblioteca de Mera ( Oleiros) coa visita de María dos Contos e o Señor Dorremi, fixéronnos gozar dos contos tradicionais e dos de creación propia, enfeitados, con música , cancións e sons.
Pasámolo moi ben!
O venres, 11 de outubro, Lorena Pinheiro desbordou simpatía e conquistou ao seu público dende o primeiro momento.
O venres, 4 de outubro, Electra visitounos na biblioteca de Mera e ensinounos unha casiña moi especial. Invitounos a pasar á casa das letras e puidemos ver como se visten, lavan os dentes, almorzan e mesmo, a máis agarimosa de todas, deunos unha forte aperta.
Para rematar as nenas e os nenos fixeron o seu propio monicreque das letras e pasamos unha tarde verdadeiramente divertida todxs xuntxs.
O venres, 27 de setembro, nenos/as e maiores cantamos e bailamos na biblioteca de Mera (Oleiros) ao son da guitarra de Gloria Mosquera e do teclado de Javier Constenla.
Desfrutamos de cancións e historias nas que se trataron temas como o medo, o coidado da natureza, o acoso escolar, o saber dicir non… facendo reflexionar sobre a importancia da empatía, da prudencia, da superación persoal, da cooperación e da responsabilidade como necesarios mecanismos de paz e felicidade.
O venres, 20 de setembro, introducímonos da man de Miguel Cortés no apaixoante mundo da escritura chinesa.
As nenas e os nenos tiveron a oportunidade de coñecer e soster nas súas máns os catro tesouros do escribán: pincel, tinta, tinteiro e papel cos que reproduciron algúns dos misteriosos caracteres da escritura chinesa.
Un obradoiro moi interesante que nos achegou un pouquiño máis á filosofía e beleza de todo un pobo. Especialmente recomendado para familias.
O xoves, 12 de setembro, tivo lugar na biblioteca de Mera o espectáculo “Elas pintan moito” a cargo de Migallas Teatro.
Foi unha sesión de contos baseada na obra das pintoras Xulia Minguillón, Sonia Delaunay, Frida Khalo e Yayoi Kusama e nos elementos que as inspiraron. A través das artistas abordouse a cuestión da igualdade entre homes e mulleres en todos os ámbitos da vida, desde o máis cotián ata o da creación artística.
O público quedou encantado coa excelente interpretación de María dos contos e o señor Dorremí que nos achegaron dun xeito moi divertido as principais obras e facetas da vida persoal destas pintoras.
O venres, 6 de setembro, recibimos a visita dos ratiños de Lonxedetodo na biblioteca de Mera (Oleiros) . A gran Lilí Gruyère e o rato Fuco entusiasmaron ao seu público coa lectura dos contos “Oliver Button es una nena” e “A ratiña presumida” e coa representación do musical “O ratiño presumido” que precisou da colaboración das nais e pais.
O venres, 5 de outubro, Raquel da editora OQO chegou á biblioteca de Mera cargada de mobiliario e utensilios de cociña. E non só iso … tamén trouxo música, contos e xogos cos que elaboramos a nosa mellor sopa do mundo.
Deliciosa !!!
O venres, 28 de setembro, tivemos o pracer de recibir a Migallas teatro na biblioteca de Mera (Oleiros).
Migallas engaiolou ao seu público co espectáculo Canta connosco! desde o primeiro momento. Pasamos unha tarde verdadeiramente divertida en familia na que os cativos e maiores cantamos, bailamos e sobre todo non paramos de rir.
Séguenos