O venres, 21 de outubro, tivo lugar na biblioteca de Mera (Oleiros) o obradoiro COAS MANS NA MASA da man da editorial OQO.

A partir da lectura do conto Maruxa (texto de Eva Mejuto, a partir dunha canción tradicional polaca) as nenas e os nenos pasárono estupendamente creando con masa de pan as personaxes do conto. Os cativos amasaron, moldearon e pintaron a Maruxa e a Pepiño en diferentes situacións e o resultado foi unha explosión de imaxinación, cor e moitas risas.

O venres, 7 de outubro, a biblioteca de Mera (Oleiros) encheuse de meniños/as que viñeron cargados de ilusión a escoitar e ver a un dos seus artistas preferidos. Pablo Díaz namorounos coas súas historias  e, sobre todo, coa súa música.

O venres, 30 de setembro, pasamos unha tarde máxica na biblioteca de Mera (Oleiros) co Mago Paco que veu cargado de diversión, historias e xogos que entusiasmaron aos nenos/as (e aos máis grandiños/as tamén).  Polo seu escenario pasaron moitos  aprendices de mago que fixeron de todo … mesmo  houbo quen tivo que beber unha poción máxica!

O venres, 23 de outubro, Maumarela impartiu o obradoiro “Crea fósiles de dinosauros” na biblioteca de Mera (Oleiros).

Plastilina, xeso, area e auga foron os ingredientes que utilizaron as nenas e os nenos  para facer cadanseu fósil. Cada cativo fixo dous fósiles, un con forma de dinosauro do que vimos o resultado esa mesma tarde e outro cunha cuncha fosilizada nun vasiño pendente de descubrir nun prazo de tres días.

As nenas e os nenos quedaron verdadeiramente encantados con esta actividade e mostraron moito interese polos  libros de dinosauros dispoñibles na biblioteca. Prestáronse todiños !!!

O venres, 9 de outubro, tivo lugar na biblioteca de Mera (Oleiros)o espectáculo Lobo Bobo a cargo de Elefante Elegante  no marco do programa Ler Conta Moito.

Gonçalo fixo as delicias do público con esta divertida representación na que os protagonistas dos máis coñecidos contos clásicos nos sorprenderon con  curiosas escenas e finais inesperados.

Pasámolo estupendamente !!!

O venres, 25 de setembro, as nenas e os nenos da biblioteca de Mera (Oleiros) desfrutaron pintando nas súas mans personaxes imaxinarios cos que despois tiveron conversas e pequenas historias inventadas. Mesmo algún pintou o brazo!!!

O venres, 22 de maio, tivemos a Manuel Solla na nosa biblioteca contándonos contos sobre animais que tiñan poderes, ratos de biblioteca ou libros que, por arte de maxia, enchíanse de debuxos.

A actuación foi moi participativa facendo interactuar aos nenos e nenas que gozaron co espectáculo.

O venres, 17 de outubro, Raquel Galavís transformou a biblioteca de Mera (Oleiros) durante 45 minutos nunha festa na que pequenos e maiores  cantaron e bailaron ao ritmo da guitarra e do bater das palmas.

O venres, 10 de outubro, Teatro Garabullo fixo unha parada  na biblioteca de Mera (Oleiros) e deleitounos co seu espectáculo de monicreques para a concienciación ambiental “Unha pinga de mel”. Unha viaxe polo mundo das abellas chea de sorpresas, gargalladas e aventuras que gustou ao público e foi moi didáctica. A función rematou cun pequeno obradoiro no que cada participante fixo a súa propia candea.

O venres, 3 de outubro, tivemos o pracer de contar na biblioteca de Mera (Oleiros) con Leo Leiño e o seu espectáculo “Maxia Cómica” no marco do programa Ler Conta Moito.

Con maxia e sobre todo moito, moito  humor Leo conquistou nun abrir e pechar de ollos ao seu público. A contadora amosounos unha corda voante, un can que muda de cor, libros que botan lume e unha chea de cousas máis. A sesión destacou pola alta participación  e logrou espertar o interese das nenas e dos nenos polos libros de maxia dispoñibles na biblioteca.

Non quedou nin un nos andeis!!!