O sábado 9 de maio os rapaces e rapazas que participaron no obradoiro Gravado con Begoña Caamaño desfrutaron dunha mañán na que se achegaron á figura da autora homenaxeada este ano no Día das Letras Galegas a través da arte do estampado con linóleo.

O pasado sábado día 25 finalizamos a programación do Día do Libro en Ames con este oradoiro na biblioteca de Bertamiráns. Con cartolinas de cores, cola e explorando as posibilidades das distintas texturas e achegándonos ao concepto de volume, os cativos e cativas pasaron unha divertida tarde creando o seu personaxe literario favorito. 

O sábado 25, en Ames seguimos coas actividades do “Día da biblioteca”, e desta volta foi na biblioteca de Bertamiráns onde a rapazada tivo o gusto de diseñaren as súas mochilas utilizando distintas teas, cores e texturas, cun resultado fantástico.

O mércores 24, tivemos na biblioteca de Bertamiráns a Caxoto co espectáculo “Grandes Éxitos 2004 – 2024”, unha actividade onde estivo presente a narración oral e a música. Foi moi divertido ver como tocaba e facía son con distintos instrumentos, moitos deles descoñecidos polos cativos que en todo momentos estiveron atentos e participativos.

Empregando a papiroflexia as rapazas e rapaces que acudiron este sábado 10 de maio ao obradoiro de Sheila García elaboraron un fermoso caderno cun código QR co que xeraron unha peza audiovisual. Desta maneira, unindo artes plásticas e tecnolóxicas os participantes elaboraron un precioso material co que uniron a tradición e a vangarda e repasaron a poesía popular, as cantigas, as cantareiras, os instrumentos tradicionais e as figuras clave da escena musical galega. Unha actividade do máis completa e divertida! 

Neste obradoiro, que se levou a cabo na biblioteca de Bertamiráns o pasado xoves 24, Día da Biblioteca, os participantes gozaron da tranquilidade e atención que proporciona a técnica Zentangle  que aprenderon con Elisabet. Fixeron o seus cadernos de lectura trazando patróns repetitivos cos que conseguiron preciosos debuxos.

Este sábado, día 5 de outubro, 18 rapazas e rapaces de Bertamiráns aprenderon a facer o seu primeiro cómic e empregaron os recursos da linguaxe do cómic facendo a sua própia páxina de BD. Un éxito!

O pasado sábado 4 de maio inauguramos a programación das Letras Galegas con este obradoiro conducido por Laura Romero no que con libros expurgados os rapaces e rapazas deron renda solta a súa imaxinación. Ademais de coñecer máis de preto a figura de Luisa Villata crearon as súas propias obras traballando a técnica coñecida como “book art”.

Este sábado día 20 de abril dentro da programación do Día do Libro, 9 rapazas de Bertamiráns fixeron neste obradoiro da Asociación Jóvenes Científicos y Emprendedores Atlantic a súa propia caixa de luz coas ilustracións dos seus contos preferidos.  

Con motivo do Día da Biblioteca o pasado sábado 21 de outubro 15 rapaces e rapazas puideron gozar deste obradoiro no que cada un, aprendendo distintas técnicas de pregado de papel, elaboraron cadanseu libro pop-up.