Onte festexamos a festa de toda a nosa cultura, festexamos a nosa lingua!
💙 Neste día das Letras Galegas de 2023, baixo o paraugas de Fernández del Riego, o Mago Teto deleitounos co espectáculo “A Maxia dos Contos” do programa de dinamización da lectura “Ler Conta Moito” financiado pola Xunta de Galicia.

Co gallo do Día das Letras Galegas, adicado este ano á figura de Florencio Delgado Gurriarán, tivemos na Fonsagrada o espectáculo “Vendimando versos” de Sole Felloza. Esta representación de versos e crónicas xira ao redor da obra e vida deste escritor valdeorrés. Embarcamonos nunha viaxe dende o Barco de Valdeorras ata México. Coñecemos unha historia de amor pola terra, a lingua e os costumes e tradicións da súa xente.

Este venres, na Biblioteca Pública de A Fonsagrada tivemos o pracer de celebrar con Fran Amil, o Día do Libro. Os máis pequenos puideron desfrutar desta actividade que mezclou de maneira moi orixinal a música cos contos. A actuación de “Contos de Chuches a mil”, do programa Ler Conta Moito, encantoulles ao nenos e tamén ás familias.

No Día das Artes Galegas adicado a Laxeiro desfrutamos na Biblioteca Municipal de A Fonsagrada dun obradoiro de creación plástica no que se coñeceu ao artista e nos achegamos á súa obra e ás cidades onde desenvolveu a súa vida. Neste taller fomentouse a creatividade coa elaboración dunha peza coas técnicas pop up e pregado de papel. Esta actividade animou á lectura e descubriu a importancia das artes como medio de expresión artística. Primeiro fíxose unha parte teórica introducindo os conceptos literarios e artísticos necesarios para o desenvolvemento da parte práctica e finalmente os nenos comezaron a crear os seus propios libriños coa técnica de pop up e pregado de papel.

Nos últimos días vimos un rato que ía e viña pola Biblioteca Pública Municipal de A Fonsagrada pero non dabamos falado con el. Por fin o pasado venres soubemos o motivo da súa visita: contar contos dos ratos de lonxedetodo. Contos divertidos, curiosos, engaiolantes, emocionantes. Pasámolo tan ben que lle deixamos un anaco de queixo para animalo a volver outro día.

Na alta montaña lucense gozamos dun pequeno gran festival de cine: o Festivaliño na biblio. Todxs xs asistentes puideron ver as mellores curtas do mundo seleccionadas en exclusiva para a ocasión. Ademais, entre curta e curta, cantamos unha canción (ou dúas).

O martes 13 de xullo, na Biblioteca Pública Municipal de A Fonsagrada, festexamos o Día Mundial do Rock con Ramona Órbita. Grazas a ela viaxamos á prehistoria a comer churrasco de mamut, visitamos a Leonardo Da Vinci no Renacemento, achegámonos ao Antigo Exipto cun tal Ramsés que lle cheiran os pés e teletransportámonos a un futuro máis ecolóxico.

Os nosos agradecementos a Pakolas por facernos pasar unha tarde tan divertida.

A pirata escarlata chegou á Biblioteca Pública Municipal de A Fonsagrada da man de Marisa Irimia. Así, as nenas e nenos usuarixs da escola infantil A Galiña Azul, puideron coñecer as súas aventuras e os seus soños para alcanzar un mundo en igualdade de xéneros. Ademais Marisa, na súa maleta, agochaba cousas fantásticas para estimular os sentidos. Que ben o pasamos!

En colaboración co CEIP Plurilingüe Santa María de A Fonsagrada, levamos a cabo o obradoiro de escritura creativa O poder das non tan pequenas cousas. Grazas a Andrea Barreira Freije que guiou ás alumnas e alumnos de 4.º, 5.º e 6.º de primaria deste centro para que imaxinaran e crearan outras historias posibles para os contos clásicos. Así logramos desarmar estereotipos aceptados que moi a miúdo impiden a educación na igualdade de dereitos das nenas e nenos.

A galiña Carolina visitou a Biblioteca Pública Municipal de A Fonsagrada para defender a amizade, a igualdade de xéneros e as condutas non violentas. Grazas a Menos dá unha pedra por este conto teatralizado co que aprendemos e gozamos tanto!