Pepablo Patiño convidounos a realizar unha viaxe polo medio do cosmos cos personaxes como ‘O saltón astronauta’ que cautivou aos asistentes polas súas dimensións. Camiñamos entre as estrelas dun xeito  ilustrado para ver a formación destas,  dos planetas, dos astros, … unha actividade distendida que puxo o seu broche para esta edición coa representación das perseidas ou choiva de estrelas

Gargalladas, sorrisos, aplausos, e un bo clima dotado dunha gran participación foron os eixes principais deste contacontos na nosa Biblioteca para celebrar o Día das Bibliotecas.

As inclemencias do tempo non foron quen de impedir na xornada de onte, que os cativos/as da Gardería Municipal levasen acabo a súa saída programada para visitarnos na Biblioteca.
A cita agardávaos cunha sesión de contos con música para bebés, na que un lobo con chupete como protagonista, choraba desconsoladamente ao intentar quitarllo. A solución a tomar foron os contos, cantos e cancións da man de Migallas Teatro.

Unha tarde moi participativa chea de actividade e emocións, na que viaxamos polos distintos continentes recollendo un conxunto de historias narradas e musicadas da man de Andrea Vázquez, acompañada dos seus amigos “Os Piñeiriños” cos nenos e nenas da Biblioteca Pública de Meis.

En conmemoración ao DÍA DO LIBRO celebrado este domingo 23 de abril, onte luns pola tarde coa comunidade escolar de secundaria do CPI Mosteiro, descubrimos que un libro amais de ser lido, donde nos contan historias e transmiten ideas e coñecemento; tamén podemos escoitalo a través dunha lectura musical interpretada. E así foi cun formato de charla-concerto como, SIRGO TORCENDO nos deixou introducir nese universo oculto que agochan as obras, interpretado con instrumentos como portativo, laúde, cítola, frauta, guitarra, arpa e unha espectacular voz, facendo protagonistas obras que forman parte do fondo da nosa biblioteca e en especial á literatura galega.

O cantautor galego Manoele de Felisa, acompañounos o pasado mércores na nosa Biblioteca para celebrar o DÍA DA POESÍA, tarde na que nos ofreceu coas súas interpretacións musicais unha actividade lúdica que acadou a atención tanto de cativos e cativas como dos maiores, facendo unha sesión moi participativa, atractiva e entretida. Entre aclamos e aplausos pechouse a actividade. Para concluir asinou cunha dedicatoria a publicación do conto  “Canta a lúa coas estrelas” como agasallo   para a Biblioteca.

O mércores pasado puidemos saborear unha sopa de cocido solidaria na Bilbioteca  Pública do Concello de Meis coa actividade COCER E CANTAR de Seisdedos.

Unha sesión moi divertida, dinámica e participativa na que todas e todos os participantes xunto cos máis cativos e cativas estimamos moi divertida e da cal saimos cun gran sorriso.

Con sensibilidade e grandes doses de humor Fátima falounos de Castelao e da vida … e de historias e contos de agora e de antes. O 26 de outubro fíxonos disfrutar nesta nova sesión do seu repertorio

O día 21 de outubro actuaron na nosa Biblioteca os persoaxes de Choupiña e Tranón de Forma Teatro. Con poesía, canción e contos deleitaron a un público de grandes e pequenos.