Juste ofreceu unha montaxe  onde narrou e interpretou contos e lendas de todos os continentes así como historias propias que tiñan como obxectivo inculcar unha serie de valores positivos nos asistentes sobre a natureza, o planeta e os seus habitantes.

Fantástica mañá de sábado durante a cal grandes e pequenos puideron disfrutar xuntos das historias, que combinaron a manipulación do teatro de papel tradicional xaponés (kamishibai), a técnica emaki (teatro lumínico tradicional xaponés a partir de pergaminos ilustrados) e despregable po-up, mesturados cunha revisión persoal do teatro de papel español e francés.

O xoves, 6 de outubro, contamos con Xosé Luís Cousillas e o seu obradoiro Arte nos libros, neste caso dedicado ao pintor Luís Seoane.

En primeiro lugar os nenos e nenas asistiron a unha presentación sobre a figura do pintor. Esta consistiu nun breve apunte biográfico e tamén mostrou debuxos e portadas de libros e outras creacións realizadas polo autor en diferentes artes.

Despois realizaron unha ilustración de motivo mariño, inspirada nun dos debuxos de Luís Seoane. O obxectivo era realizar a ilustración sen necesidade de lapis nin pintura, simplemente dando forma ás cartolinas coas tesouras.

O mércores 20 de xullo e da man de Maumarela os rapaces e rapazas das Pontes aprenderon moitas cousas sobre os dinosaurios. Ademais crearon o seu propio fósil.

Este venres, 17 de xuño de 2016, coincidindo coa finalización das clases trasladamos a nosa biblioteca ambulante á Escola de Educación Infantil de Lañas (A Baña) para continuar coa campaña de animación á lectura con nenos e nenas.

Co BRINCA VAI! de aquí e dacolá de Paco Nogueiras lemos, vimos e escoitamos a variedade de instrumentos que nos poden acompañar para facer unha canción de cada celebración do ano. Pasamos medo no Samaín, disfrazámonos no Entroido, visitounos o Apalpador… un mundo cheo de animación combinado en diferentes cancións que case sabían cantar e bailar todos os pequenos e pequenas que acudiron á escola de Lañas. Traballouse co audio libro previamente e sacouselle moito partido a esta actividade. Os nenos e as nenas da Baña xa saben o que é ter os pés na terra para medrar cheos de ganas de brincar e de cultura.

Ata outra brincador@s!!!

O sábado 21 de maio tivemos unha actividade moi interesante para todos e todas os interesados/as nas nosas tradicións, para os grupos folclóricos da vila, para a xente dedicada ao mundo da costura e o deseño..

A actividade “Cóntoche un traxe” dirixida a público adulto, mocidade e rapazada a partir de 6 anos.

Montse Rivera, dunha forma amena, orixinal e divertida, levounos nunha viaxe no tempo para ver como era o vestiario dos nosos ancestros. Con catro voluntarias do público foi amosando e describindo unha a unha todas as pezas do noso traxe

Minia Regos realizou coas quince rapazas e rapaces asistentes ó obradoiro unha actividade consistente na realización de pequenas curtametraxes mediante montaxes fotográficas coa utilización de diferentes técnicas (modelado de personaxes de plastilina, cartolina,…) durantes os catro primeiros sábados do mes de abril. Foi unha actividade completísima na que a rapazada tivo a oportunidade de desenvolver diferentes destrezas coma a creación literaria, a imaxinación, a capacidade de síntese, a creatividade, estratexias de ilustración e deseño de personaxes, gravación de voces e sons,…
Minia conduciu a actividade dun xeito ameno e divertido e os nenos e nenas disfrutaron e aprenderon moito.

O xoves día 17 de Marzo, ás 11:00 horas na Sala de Lectura de Bibliopazos, conmemoramos o Día da Narración Oral (20 de Marzo), o Día da Poesía (21 de Marzo), e o Día Internacional do Teatro (27 de Marzo) co espectáculo de narración oral e dinamización con música, teatro e danza “CANTACONTOS” da actriz, presentadora de televisión e contacontos Raquel Galavís que nos fixo pasar un rato moi especial.

Estiveron acompañándonos a nosa amiga Patri Pa e os rapaces de 5º de Primaria do CPI Curros Enríquez de Pazos cos seus profesores Manuel e Uxía.

Esta actividade incluída no programa LER CONTA MOITO 2016 de BiblioPazos.

Aquí van unhas imaxes para que vexades o ben que o pasamos.

Onte 5 de outubro, a Asociación Musical Musicreques visitou a biblioteca de Oseiro “Dora Vázquez”, no concello de Arteixo, para representar a obra “Iván e o lobo grís”, asistiron 11 nenos acompañados por 5 adultos, que non perderon detalle da historia contada por medio de títeres e completada con imaxes por medio dun proxector e de música en directo.

Este mes na Biblioteca Municipal Infantil e Xuvenil da Coruña indagamos sobre isto co conto de Selma, de Jutta Bauer, ao que lle demos vida en stop-motion nun obradoiro de LerContaMoito grazas a Illa Bufarda e ás súas integrantes, Sabela e Adriana.

Os rapaces e rapazas que asistiron puideron crear os personaxes un a un, as súas voces, e tódolos escenarios do conto para mostrar que é a felicidade para Selma, que podedes ver na montaxe final.

E para vós, que é a felicidade?

O día 22 de xullo tivemos a oportunidade de afondar na polifacética figura do galego Luís Seoane. Crearte Servizos Culturais, mediante imaxes proxectadas e pequenas actividades, permitiulle aos cativos descubrir como a arte forma parte da nosa historia e do noso presente.

O diálogo entre a educadora e os participantes foi esencial para favorecer a creatividade e a interpretación das imaxes artísticas. O obradoiro resultou marabilloso e os nenos e nenas que se achegaron á Biblioteca do Concello de Riós amosaron o seu entusiasmo en todo momento.