O sábado 13 de maio Expresión Produccións achegou ata a Axencia de Lectura de San Vicente o espectáculo “Contos máxicos”
Ademais de contos, tivemos maxia, trabalinguas, cancións, concursos, monicreques… un espectáculo interactivo, dinámico e moi divertido co que grandes e pequenos pasaron unha fantástica mañá de sábado.
Co gallo da festividade das Letras Galegas, na biblioteca de Covelo marchamos de Romaría con Raquel Queizás e todolos nenos do colexio. Foi unha mañá moi divertida onde os nenos escoitaron as lendas tradicionais de fai moitos anos.
Foi realmente un prodixio o xeito como Iria Piñeiro nos atrapou cos seus relatos. Os nenos/as convertíronse en personaxes improvisados de contos que buscaban desterrar os medos. Ao final os rapaces desvelaron cales eran as súas inseguridades. Creouse unha atmosfera especial na biblioteca acollendo ao libro como elemento curativo da alma.
O venres 12 e o martes 16 tivemos con nós na Biblioteca Pública Municipal de Vedra as actuación de “Comechíns, segundo prato” e “Contos de medo que deixan durmir” para celebrar o Día das Letras Galegas dentro do programa Ler Conta Moito. Dúas propostas lúdicas que conectaron moi ben cos máis pequenos da biblioteca.
O mago Paco foi quen fixo a actividade de maxia na biblioteca coa que disfrutaron nenos e non tan nenos.
Unha tarde divertida con contos, xogos e maxia para nenos e non tan nenos.
A xornada anterior ó Día das Letras Galegas a TITIRICLETA do TITIRICLETEIRO chegou á biblioteca dos Tilos, pilotada por un grupo de monicreques solidarios chegados de Bangladesh, a India, Guatemala… Anxo Moure levou ás nenas e os nenos de viaxe a mundos fantásticos, na procura da paz. As persoas que asistiron desfrutaron dunha tarde fermosa de contos na nosa lingua e de historias de todo o mundo.
O pasado luns 15 de maio, adiantamos a homenaxe a Carlos Casares para celebrar cos centros de ensino do concello unha fermosa xornada na que houbo recitados, teatro e sobre todo música para honrar ás nosas letras da man de Migallas.
A compañía veu co seu espectáculo Canta connosco! que fixo as delicias de pequenos… e non tan pequenos… A biblioteca municipal Luís Rei, grazas ao programa Ler conta moito, puido contar con esta actividade que serviu para unir a todos os colexios da vila no Paseo da Calzada de cara a festexar o día das Letras Galegas dun xeito especial… velaí van algunhas imaxes…
Soledad contou dunha maneira moi sinxela pero con gran sentimento os contos máis coñecidos de Casares, como a historia de Ana, a nena que máis felicidade esparexía pola súa aldea, pero un día a súa familia decide emigrar para buscar un futuro mellor, entón Carlos queda pensativo, non pode permitir q Ana perda a súa lingua e as aventuras da xente da aldea. Idea un plan en que vaille escribir tódolos feitos tan peculiares que pasan nese lugar: como o día que apareceu unha galiña azul que dicía kokorÓ, e as autoridades querían facerlle dano; ou o día que o peixe do estanque morreu por ser solidario cun paxariño; ou cando Leoncio creou a bomba da felicidade…
O 15 de maio Sole Felloza, veunos a contar por medio de pequenas historias a vida e obra de Carlos Casares que durante este semana lle estamos rendindo homenaxe na biblioteca. Un espectáculo dinámico, divertido e que fixo pasar un rato estupendo a todos os asistentes.
O pasado 13 de maio a biblioteca pública “Varela Jácome” de Lalín acolleu, co gallo do mes das Letras Galegas, “Unha viaxe ao mundo de Carlos Casares”, de Soledad Felloza. Incluída dentro do programa “Ler conta moito”, nesta actividade para nenos e nenas de 4 a 11 anos as persoas asistentes puideron achegarse máis de cheo á figura de Carlos Casares, homenaxeado este ano no Día das Letras Galegas. Durante case unha hora nenos/as e maiores gozaron das marabillosas historias que a contadora lles transmitiu, un percorrido por un universo creado a partir de feitos cotiás que non deixou indiferente a ninguén.
Séguenos