O pasado luns 25 de abril e para celebrar o día do libro, a B.P.M. El Viejo Pancho de Ribadeo recibiu ás nenas e nenos de primeiro de primaria dos colexios Gregorio Sanz e Sagrado Corazón de Jesús cun espectáculo moi especial, visitounos Lilí Gruyére! Esta vella amiga da biblioteca veu para recordarnos que as ratiñas e os ratiños de biblioteca ademais do queixo, encántalles ler contos e pasan horas e horas rebuscando e lendo os pequenos tesouros que atopan nos andeis das bibliotecas de todo o mundo. Lilí coñece mil historias e é unha experta contándoas. Coa axuda do seu amigo, o Coelliño Branco, Lilí narrou contos, fixo maxia, cantou cancións e ata nos aprendeu o himno do seu país, “Lonxedetodo” con coreografía incluída! Tamén as nenas e nenos e o profesorado que visitaron biblioteca colaboraron na representación do conto do Coelliño Branco. Unha mañá divertida e diferente na biblioteca, á que todo o mundo está invitado a explorar nos andeis coma Lilí para descubrir todas as historias, mundos, soños, personaxes… que se atopan en cada libro.

O día 25 de abril na Axencia de Lectura de San Sadurniño, Crearte Servizos Culturais propúxolles aos nenos e nenas de 10-11 anos un xeito distinto de descubriren a obra dun dos persoeiros fundamentais da nosa cultura. Nado en 1910 na Arxentina como fillo da emigración, Luís Seoane pasou a súa mocidade e xuventude en Galicia nun dos momentos de maior fervenza creativa. Unha época truncada pola Guerra Civil que o obrigarían a retornar á súa terra natal, desde onde continuaría sementando o galeguismo político e creativo. Escritor, avogado, xornalista, activista, ceramista -impulsou con Díaz-Pardo o Laboratorio de Formas do que xurdiría a segunda época de Sargadelos-, pintor e ilustrador… Seoane xuntaba nunha mesma persoa múltiples facetas que exerceu implicado en ducias de proxectos.

Á rapazada falóuselle principalmente da súa obra pictórica e de como contribuiu aos “ismos” gráficos coas súas cores planas e trazos en movemento, reflectindo en todo momento a Galicia máis desfavorecida, a mesma á que axudaba e defendía nos seus tempos de avogado mozo na Coruña antes do golpe de estado do 36.

A sesión, planificada seguindo a técnica do descubrimento guiado, rematou cunha actividade de creación, na que os nenos e nenas emularon o estilo de Seoane empregando cartolinas, tesouras e pegamento de barra.

A actividade desta mañá (26 de abril)  optou polo formato do contacontos, se cadra o máis axeitado para as idades iniciais de escolarización. Rodeado de libros, o alumnado asistiu a unha narración interactiva pragada de personaxes misteriosos que ían saíndo entre sorpresa e sorpresa dunha maleta que semellaba non ter fondo. Lóxico se temos en conta que se trataba dunha maleta máxica, case tanto coma os propios libros.

Na biblioteca Municipal do Grove celebramos o “Día Internacional do Libro” na compañía de Trinketrinke Teatro.

Un nutrido grupo de rapaces e rapazas asistiron ao contacontos acompañados dos seus familiares, que tampouco quixeron perderse o espectáculo. “Riciños de Ouro e os Tres Osos” é un conto que nunca pasa de moda, imprescindible para a animación á lectura dos pre-lectores e primeiros lectores.

Unha divertida mañá de sábado na que grandes e pequenos o pasaron en grande escoitando contos, cantando, bailando e xogando co rato Fuco.

Co gaio do Día do Libro e dentro do programa Ler Conta Moito, a biblioteca pública de Pantón programou a representación “AS TRES REINA MAGAS a cargo de ” Teatro

Para iniciar o obradoiro Guitián e Leandro lanzan a pregunta de que é o humor gráfico. Despois dunha breve introducción, fan un percorrido pola obra e as principias características dos grandes humoristas gráficos, aquele que podemos considerar “clásicos”: Castelao, Charles Addams, con quen diferencian o humor negro do humor absurdo, Chumy Chúmez ou Forges.

Centrándose en Forges, destacan que para facer humor gráfico no é necesario debuxar ben, pois o que interesa é a idea, que debe prevalecer sempre sobre a forma.

Continúan o percorrido con Quino, considerado un dos mellares humoristas gráficos do século XX. Destacan asimesmo a  Ann Telnaes, muller e Premio Pullitzer como humorista gráfica, Saúl Steinberg, as viñetas de denuncia social de El Roto, as da retranca de Xaquín Marín.

Así chegamos ao humor máis contemporáneo de Banksy, a páxina web de “cinismo ilustrado”, o humor negro de Joán Cornellá ou o máis amable de Liniers.

Ata chegar ao humor gráfico con e a través do móbil, o que está na rede, os  “memes” e “trollfaces”.

O meme é unha imaxe recurrente con distintas frases. Funciona por acumulación e ten sentido por acumulación.

O obradoiro remata cunha parte práctica. Os participantes  realizan humor gráfico servíndose dos seus propios móbiles, constrúen montaxes fotográficas con moito sentido do humor.

Actividade cunha valoración excelente polos participantes.

En resumo, un obradoiro que resulta moi interesante e atractivo para realizar coa mocidade.

Espectáculo de maxia e de animación á lectura inspirado no libro “Érase una vez Don Quijote” de Miguel de Cervantes co motivo do cuarto centenario do pasamento de Cervantes a cargo do mago Chrystian Magic.

O pasado venres 15 de abril puidemos gozar na Baña da VI Maratón de contacontos e co Obradoiro de marionetas de papel de Viravolta títeres na Casa da cultura.

Pequenos e pequenas, acompañados/as das súas familias descubriron o que a imaxinación pode facer, xunto cunha dose de boa interpretación para que os contos estén cheos de vida.

Achegamos a papiroflexia a menores e familias. A imaxinación flúe acompañada duns folios de cores, pegamento e unhas tesoiras para que puideran crear a súa propia marioneta de cores.

Foi unha tarde na que estivemos rodeados/as de cultura, xogo e aprendizaxe.

O sábado 23 de abril ás 12 horas a Biblioteca Pública de Vigo Juan Compañel  celebrou o Día do Libro co contacontos teatral de Trinketrinke Teatro “O coelliño branco”. A actividade conxugou teatro, contacontos, maxia…,  resultou  moi entretida e divertida, e captou en todo momento a atención de cativos e maiores.

O pasado sábado 23 de abril, no Concello de Ourol celebramos o día do libro cun verdadeiro espectáculo de maxia e humor.

A través do programa “Ler Conta Moito” da Consellería de Cultura, Educación e Ordenación Universitaria en colaboración coas bibliotecas municipais, a maga Leo Leíño visitou o noso concello e fíxonos pasar unha maña moi divertida e amena. A actividade estaba destinada para nenos/as a partir de 3 anos e ás familias; os nenos/as que acudiron puideron ser por un día os axudantes desta simpática maga. Nós estamos desexando que volva polo concello pois foi unha actividade valorada moi positivamente por todos os asistentes.